سیدنا جابر بن عبداللہ رضی اللہ عنہما سے روایت ہے کہ جب رسول اللہ صلی اللہ علیہ وسلم فتح مکہ سے فارغ ہوئے تو آپ صلی اللہ علیہ وسلم نے حنین کا رخ فرمایا، ادھر مالک بن عوف نصری نے بنو نصر، جشم، سعد بن بکر، بنو ہلال کے کچھ گروہوں اور بنو عمرو بن عاصم بن عوف کے لوگوں کو جمع کر لیا تھا، اور ان کے ساتھ قبیلہ ثقیف کے حلیف اور بنو مالک بھی پوری قوت کے ساتھ شامل ہو گئے تھے، پھر وہ اپنے اموال، عورتوں اور بچوں کو ساتھ لے کر رسول اللہ صلی اللہ علیہ وسلم کے مقابلے کے لیے نکلا، جب رسول اللہ صلی اللہ علیہ وسلم کو ان کے متعلق اطلاع ملی تو آپ صلی اللہ علیہ وسلم نے سیدنا عبد الرحمن بن ابی حدرید اسلمی رضی اللہ عنہ کو بھیجا اور فرمایا: ”جاؤ اور ان لوگوں میں گھل مل جاؤ یہاں تک کہ ہمارے لیے ان کی یقینی خبر لے آؤ“، وہ گئے اور وہاں ایک یا دو دن قیام کیا، پھر واپس آ کر آپ صلی اللہ علیہ وسلم کو صورتحال بتائی، تو رسول اللہ صلی اللہ علیہ وسلم نے سیدنا عمر بن خطاب رضی اللہ عنہ سے فرمایا: ”اے عمر! کیا تم سن رہے ہو جو ابن ابی حدرید کہہ رہا ہے؟“ سیدنا عمر رضی اللہ عنہ نے (حیرت سے) کہا: ابن ابی حدرید نے جھوٹ کہا ہے، اس پر ابن ابی حدرید رضی اللہ عنہ نے کہا: اگر آپ مجھے جھٹلا رہے ہیں تو بسا اوقات آپ نے اس ہستی (نبی صلی اللہ علیہ وسلم ) کو بھی جھٹلایا ہے جو مجھ سے بہتر ہے، سیدنا عمر رضی اللہ عنہ نے عرض کیا: یا رسول اللہ! کیا آپ سن رہے ہیں کہ ابن ابی حدرید کیا کہہ رہا ہے؟ رسول اللہ صلی اللہ علیہ وسلم نے فرمایا: ”اے عمر! تم پہلے «ضال» تھے پھر اللہ عزوجل نے تمہیں ہدایت عطا فرمائی“، پھر رسول اللہ صلی اللہ علیہ وسلم نے صفوان بن امیہ کی طرف پیغام بھیجا اور ان سے سو زرہیں اور ان کے ساتھ کا ضروری جنگی سامان طلب فرمایا، انہوں نے پوچھا: اے محمد ( صلی اللہ علیہ وسلم )! کیا یہ زبردستی لے رہے ہو؟ آپ صلی اللہ علیہ وسلم نے فرمایا: ”نہیں، بلکہ یہ واپسی کی ضمانت کے ساتھ عاریت «عارِيَّةً مَضْمُونَةً» (ادھار) ہے، یہاں تک کہ ہم اسے تمہیں واپس کر دیں“، پھر رسول اللہ صلی اللہ علیہ وسلم (لشکر لے کر) روانہ ہوئے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب المغازي والسرايا/حدیث: 4417]