سیدنا زید بن ارقم رضی اللہ عنہ سے روایت ہے کہ جب رسول اللہ صلی اللہ علیہ وسلم حجۃ الوداع سے واپس تشریف لائے اور غدیر خم کے مقام پر پڑاؤ کیا، تو آپ صلی اللہ علیہ وسلم نے چند گھنے درختوں کے متعلق حکم دیا اور ان کے نیچے کی جگہ صاف کر دی گئی۔ پھر آپ صلی اللہ علیہ وسلم نے فرمایا: ”مجھے لگتا ہے کہ عنقریب (اپنے رب کی طرف سے) بلاوا آنے والا ہے اور میں اسے قبول کر لوں گا، میں تمہارے درمیان دو گراں قدر چیزیں «الثقلين» چھوڑ کر جا رہا ہوں جن میں سے ایک دوسری سے بڑی ہے: اللہ تعالیٰ کی کتاب اور میری عترت (اہلِ بیت)، پس تم یہ دیکھنا کہ تم میرے بعد ان دونوں کے ساتھ کیا سلوک کرتے ہو، کیونکہ یہ دونوں ہرگز ایک دوسرے سے جدا نہیں ہوں گے یہاں تک کہ حوضِ کوثر پر میرے پاس پہنچ جائیں۔“ پھر آپ صلی اللہ علیہ وسلم نے فرمایا: ”بے شک اللہ عزوجل میرا مولا ہے اور میں ہر مومن کا ولی ہوں،“ پھر آپ صلی اللہ علیہ وسلم نے سیدنا علی رضی اللہ عنہ کا ہاتھ پکڑا اور فرمایا: ”جس کا میں ولی (دوست و سرپرست) ہوں، پس یہ (علی) اس کا ولی ہے، «اللَّهُمَّ وَالِ مَنْ وَالَاهُ، وَعَادِ مَنْ عَادَاهُ» ”اے اللہ! تو اس سے محبت و دوستی رکھ جو اس سے محبت رکھے اور اس سے دشمنی رکھ جو اس سے دشمنی رکھے۔“ اور اس کے بعد راوی نے طویل حدیث ذکر کی۔
یہ حدیث امام بخاری اور امام مسلم کی شرط پر صحیح ہے لیکن انہوں نے اسے اس طوالت کے ساتھ روایت نہیں کیا۔ سلمہ بن کہیل کی ابو طفیل سے مروی روایت بھی ان دونوں کی شرط پر صحیح ہے جو اس حدیث کی شاہد (تائید کرنے والی) ہے: [المستدرك على الصحيحين/كتاب معرفة الصحابة رضي الله تعالى عنهم/حدیث: 4627]