محمد بن عمر فرماتے ہیں: سیدنا ابوحذیفہ رضی اللہ عنہ، رسول اللہ صلی اللہ علیہ وسلم کے دارارقم میں داخل ہونے سے پہلے اسلام لے آئے تھے، اور آپ دو ہجرتیں کرنے والے صحابہ میں سے ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5055]

عبدالرحمن بن ابی الزناد اپنے والد کا یہ بیان نقل کرتے ہیں کہ سیدنا ابوحذیفہ رضی اللہ عنہ جنگ بدر میں شریک ہوئے، انہوں نے اپنے باپ کو جنگ کے لئے بلایا تھا۔ جب انہوں نے اپنے باپ کو جنگ کے لئے بلایا تو ان کی بہن ہند بنت عتبہ نے یہ اشعار کہے: خوبصورت، بھینگا، بدبخت ابوحذیفہ دین میں تمام لوگوں سے برا۔ تو اپنے اس باپ کا شکریہ ادا نہیں کرتا جس نے تجھے بچپن سے پالا حتی کہ تو صحیح سالم نوجوان ہو گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5055M]