محمد بن عمر نے سیدنا ابوسفیان کا نام یوں ذکر کیا ہے ” ابوسفیان حارث بن عبدالمطلب بن ہاشم “ یہ رسول اللہ صلی اللہ علیہ وسلم کے رضاعی بھائی بھی ہیں اور چچا زاد بھائی بھی ہیں۔ سیدنا حلیمہ سعدیہ رضی اللہ عنہا نے کئی دن ان کو دودھ پلایا ہے یہ رسول اللہ صلی اللہ علیہ وسلم سے بہت پیار کیا کرتے تھے۔ لیکن جب رسول اللہ صلی اللہ علیہ وسلم نے اعلان نبوت فرمایا تو یہ بہت سخت دشمنی کرنے لگا، آپ کو اور آپ صلی اللہ علیہ وسلم کے ساتھیوں کو گالیاں دیا کرتا تھا۔ 20 سال تک یہ مسلسل رسول اللہ صلی اللہ علیہ وسلم سے دشمنی کرتا رہا، جب بھی قریش نے رسول اللہ صلی اللہ علیہ وسلم کے خلاف جنگ کی، یہ اس میں لازمی شریک ہوئے، پھر جب فتح مکہ کے موقع پر رسول اللہ صلی اللہ علیہ وسلم کے مکہ میں آنے کی اطلاع ملی تو اللہ تعالیٰ نے ان کے دل میں اسلام کی ہیبت ڈال دی، چنانچہ حضور صلی اللہ علیہ وسلم کے مکہ آنے سے پہلے ہی یہ اپنے بیٹے جعفر کو ساتھ لے گئے اور مقام ابواء پر جا کر رسول اللہ صلی اللہ علیہ وسلم سے ملے اور اسلام قبول کر لیا۔ پھر رسول اللہ صلی اللہ علیہ وسلم کے ہمراہ مکہ کی جانب روانہ ہوئے اور فتح مکہ اور جنگ حنین میں شریک ہوئے۔ سیدنا ابوسفیان رضی اللہ عنہ کہتے ہیں: جب جنگ حنین میں ہماری دشمن سے مڈبھیڑ ہوئی، میں اپنے گھوڑے کو حقیر جانتے ہوئے اس نیچے اتر آیا، میرے ہاتھ میں تلوار سونتی ہوئی تھی۔ خدا کی قسم! میں صرف موت کا ارادہ کئے ہوئے تھا جب جبکہ نبی اکرم صلی اللہ علیہ وسلم مجھے دیکھ رہے تھے، سیدنا عباس رضی اللہ عنہ نے کہا: یا رسول صلی اللہ علیہ وسلم یہ آپ کا بھائی اور آپ کا چچازاد، ابوسفیان بن حارث ہے، آپ اس سے راضی ہو جائیں۔ رسول اللہ صلی اللہ علیہ وسلم نے فرمایا: اللہ تعالیٰ اس کی وہ تمام دشمنی معاف فرمائے جو آج تک انہوں نے میرے ساتھ کی ہے، پھر آپ میری جانب متوجہ ہوئے اور بولے: میری عمر کی قسم یہ میرا بھائی ہے۔ میں نے رکاب میں آپ کے قدموں کا بوسہ لیا۔ لوگ کہتے ہیں کہ سیدنا ابوسفیان بن حارث رضی اللہ عنہ اپنے بھائی نوفل بن حارث رضی اللہ عنہ کی وفات کے تین ماہ اور سترہ دن بعد مدینہ میں وفات پا گئے۔ یہ بھی کہا جاتا ہے کہ سن 20 ہجری میں فوت ہوئے اور سیدنا عمر رضی اللہ عنہ نے ان کی نماز جنازہ پڑھائی اور جنت البقیع کے اندر دار عقیل بن ابی طالب میں ان کا روضہ مبارک بنایا گیا، یہی وہ صحابی ہیں جنہوں نے اپنی وفات سے تین دن پہلے خود ہی اپنے لئے قبر کھود لی تھی۔ سیدنا سفیان بن حارث رضی اللہ عنہ کے اسلام لانے کا واقعہ اس سے پہلے بیان ہو چکا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5187]