عبدالرحمن بن زید بن اسلم اپنے والد سے وہ ان کے دادا سے روایت کرتے ہیں کہ سیدنا عمر بن خطاب رضی اللہ عنہ نے سیدنا عباس بن عبدالمطلب رضی اللہ عنہ سے کہا کہ رسول اللہ صلی اللہ علیہ وسلم نے ارشاد فرمایا: ہم مسجد کی توسیع کرنا چاہتے ہیں اور تیرا گھر مسجد کے قریب ہے۔ اس لئے آپ اپنا گھر ہمیں دے دیجئے ہم مسجد کی توسیع میں اس کو شامل کر لیں گے اور اس کے بدلے میں آپ کو اس سے بھی زیادہ وسیع گھر دیتے ہیں۔ سیدنا عباس رضی اللہ عنہ نے انکار کر دیا۔ سیدنا عمر رضی اللہ عنہ نے کہا: (اگر تم نے رضا مندی کے ساتھ یہ مکان ہمیں نہ دیا تو) ہم زبردستی تم سے یہ مکان خالی کروا لیں گے۔ سیدنا عباس رضی اللہ عنہ نے کہا: آپ کو یہ حق نہیں پہنچتا۔ یہ لوگ سیدنا حذیفہ رضی اللہ عنہ کے پاس آئے اور ان کو پورا معاملہ سنایا۔ انہوں نے کہا: اس سلسلے میں میرے پاس ایک حدیث موجود ہے۔ انہوں نے پوچھا: وہ کیا؟ انہوں نے کہا: سیدنا داؤد علیہ السلام نے بیت المقدس کی توسیع کرنا چاہی، اور مسجد کے قریب جو مکان تھا وہ ایک یتیم کا تھا، سیدنا داؤد علیہ السلام نے اس سے مکان مانگا لیکن اس نے دینے سے انکار کر دیا، سیدنا داؤد علیہ السلام اس سے وہ مکان زبردستی چھیننا چاہتے تھے کہ الله تعالیٰ نے وحی نازل فرمائی کہ میرے گھر کو دوسروں کے گھروں پر ظلم سے بچایا جائے تو سیدنا داؤد علیہ السلام نے وہ ارادہ ترک فرما دیا۔ سیدنا عباس رضی اللہ عنہ نے سیدنا عمر رضی اللہ عنہ سے کہا: کیا اب بھی کوئی بات باقی رہ گئی ہے؟ انہوں نے کہا: نہیں۔ راوی کہتے ہیں: پھر سیدنا عمر بن خطاب رضی اللہ عنہ مسجد میں آئے، سیدنا عباس رضی اللہ عنہ کے پرنالے کا رخ مسجد نبوی کی جانب تھا اور بارش کا پانی اس کے ذریعے مسجد میں گرتا تھا سیدنا عمر رضی اللہ عنہ نے وہ پرنالہ اکھیڑ ڈالا اور کہا: یہ پرنالہ رسول اللہ صلی اللہ علیہ وسلم کی مسجد میں نہیں گر سکتا۔ سیدنا عباس رضی اللہ عنہ نے ان سے کہا: اس ذات کی قسم! جس نے محمد صلی اللہ علیہ وسلم کو حق کے ساتھ بھیجا ہے رسول اللہ صلی اللہ علیہ وسلم نے بذات خود یہ پرنالہ اسی مقام پر رکھا تھا اور اے عمر تم نے (رسول اللہ صلی اللہ علیہ وسلم کا بنایا ہوا پرنالہ) اکھیڑ دیا۔ سیدنا عمر صلی اللہ علیہ وسلم نے کہا: آپ اپنے پاؤں میری گردن پر رکھ کر چڑھ جائیے اور یہ پرنالہ جہاں پر تھا وہیں لگا لیجئے۔ سیدنا عباس رضی اللہ عنہ نے ایسا ہی کیا۔ پھر فرمایا: میں نے یہ مکان تمہیں دیا تم مسجد نبوی شریف کی توسیع کر لو، تب سیدنا عمر رضی اللہ عنہ نے ان کا مکان مسجد میں شامل کر لیا اور ان کو اس کے بدلے مقام زوراء پر ایک وسیع و عریض مکان دیا۔ ٭٭ یہ حدیث ہم نے ابوجعفر اور ابوعلی حافظ کے حوالے سے نقل کی ہے اور انہوں نے اس کو صرف اسی اسناد کے ہمراہ لکھا ہے اور امام بخاری رحمۃ اللہ علیہ اور امام مسلم رحمۃ اللہ علیہ نے عبدالرحمن بن زید بن اسلم کی روایات نقل نہیں کیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5516]