سیدنا عبداللہ بن عمر رضی اللہ عنہما فرماتے ہیں: سیدنا عمر بن خطاب رضی اللہ عنہ نے قحط کے سال سیدنا عباس بن عبدالمطلب رضی اللہ عنہ کا واسطہ اور وسیلہ دے کر بارش کی دعا یوں مانگی ”اے اللہ! یہ تیرے نبی کے چچا سیدنا عباس رضی اللہ عنہ ہیں، ہم تیری بارگاہ میں ان کا واسطہ اور وسیلہ پیش کرتے ہیں تو ان کے صدقے ہم پر رحمت کی برسات نازل فرما“۔ (اس دعا کے بعد) ابھی زیادہ وقت نہیں گزرا تھا کہ برسات نازل ہو گئی۔ سیدنا عمر بن خطاب رضی اللہ عنہ نے لوگوں کو خطبہ دیا اور فرمایا: اے لوگو! رسول الله صلی اللہ علیہ وسلم سیدنا عباس رضی اللہ عنہ کو والد کا احترام دیتے تھے اور ایک والد ہی کی طرح عزت کرتے تھے، ان کی قسم کو پورا کرتے تھے، تو اے لوگو! ان کے چچا کے حوالے سے رسول اللہ صلی اللہ علیہ وسلم کی پیروی کرو اور ان کو الله تعالیٰ کی بارگاہ میں اس کی نازل کردہ چیز کے سلسلے میں وسیلہ بنا کر رکھو۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5527]