سیدنا زبیر بن عوام رضی اللہ عنہ فرماتے ہیں ایک انصاری نے مقام حرہ کے پانی کے معاملہ میں رسول اللہ صلی اللہ علیہ وسلم کی بارگاہ میں میری شکایت کی، رسول اللہ صلی اللہ علیہ وسلم نے مجھے فرمایا: اے زبیر! اپنی کھیتی کو سیراب کرنے کے بعد اپنے پڑوسی کی جانب پانی چھوڑ دیا کرو، اس انصاری نے کہا: یا رسول اللہ صلی اللہ علیہ وسلم یہ آپ کا پھوپھی زاد بھائی ہے نا، اس لئے آپ نے اس کے حق میں فیصلہ کیا ہے۔ یہ بات سن کر رسول اللہ صلی اللہ علیہ وسلم کے چہرہ انور پر ناراضگی کے آثار نمایاں ہوئے، پھر آپ نے سیدنا زبیر رضی اللہ عنہ سے فرمایا: اے زبیر! اپنی کھیتی کو سیراب کرو اور پانی کو روک کر رکھو یہاں تک کہ وہ پانی (کھالے کی) دیواروں کے برابر ہو جائے۔ اس کے بعد اپنے پڑوسی کی طرف چھوڑو۔ اس طرح رسول اللہ صلی اللہ علیہ وسلم نے سیدنا زبیر رضی اللہ عنہ کو ان کا پورا حق عطا فرمایا۔ سیدنا زبیر رضی اللہ عنہ فرماتے ہیں: میرا خیال ہے کہ یہ آیت میرے اسی جھگڑے کے بارے میں نازل ہوئی تھی فَلَا وَرَبِّکَ لَا یُؤْمِنُوْنَ حَتّٰی یُحَکِّمُوْکَ فِیْمَا شَجَرَ بَیْنَھُمْ (النساء: 65) ” تو اے محبوب! تمہارے رب کی قسم وہ مسلمان نہ ہوں گے جب تک اپنے آپس کے جھگڑے میں تمہیں حاکم نہ بنائیں پھر جو کچھ تم حکم فرما دو اپنے دلوں میں اس سے رکاوٹ نہ پائیں “ [المستدرك على الصحيحين/كتاب معرفة الصحابة رضي الله تعالى عنهم/حدیث: 5664]