ابوالتیاح فرماتے ہیں: بصرہ میں سیدنا عبداللہ بن عباس رضی اللہ عنہما کے ہمراہ ایک سیاہ فام شخص ہوتا تھا، وہ سیدنا ابوموسیٰ اشعری رضی اللہ عنہ کے حوالے سے نبی اکرم صلی اللہ علیہ وسلم کی احادیث بیان کیا کرتا تھا۔ سیدنا عبداللہ بن عباس رضی اللہ عنہما نے سیدنا ابوموسیٰ اشعری رضی اللہ عنہ کی جانب ایک خط لکھا جس میں اس شخص کے بارے میں ان سے وضاحت طلب کی (کہ یہ شخص آپ کے حوالے سے بہت احادیث بیان کرتا ہے آپ اس کے بارے میں کیا کہتے ہیں؟ سیدنا ابوموسیٰ اشعری رضی اللہ عنہ نے جوابی مکتوب میں لکھا: بے شک آپ اپنے زمانے کے لوگوں کو بہتر جانتے ہیں، میں نے رسول اللہ صلی اللہ علیہ وسلم کے حوالے سے صرف یہی ایک حدیث (اس کو) بیان کی ہے کہ میں نبی اکرم صلی اللہ علیہ وسلم کے ہمراہ تھا، آپ صلی اللہ علیہ وسلم نے پیشاب کرنے کا ارادہ فرمایا تو آپ وہاں قریب ایک دیوار کے ساتھ نرم ریتلی زمین پر گئے، (اور وہاں پیشاب کیا اور بعد میں) فرمایا: بنی اسرائیل کے کسی فرد کے جسم پر نجاست لگ جاتی تو ان کو اپنا جسم قینچیوں کے ساتھ کاٹنا پڑتا، اس لئے جب تم پیشاب کرنا چاہو تو پیشاب کے لئے (کوئی نرم زمین والی جگہ) تلاش کرو۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6077]