اخنس بن خلیفہ ضبی فرماتے ہیں: سیدنا کعب الاحبار رضی اللہ عنہ نے سیدنا عبداللہ بن عمرو رضی اللہ عنہ کو لوگوں کو فتویٰ دیتے دیکھا تو پوچھا: یہ کون ہے؟ لوگوں نے بتایا کہ یہ ” سیدنا عبداللہ بن عمرو بن عاص رضی اللہ عنہ “ ہیں۔ انہوں نے اپنے ایک ساتھی کو ان کی جانب بھیجا اور کہا: ان کو کہنا: اے عبداللہ بن عمرو! اللہ تعالیٰ کی ذات پر جھوٹ مت بولو، ورنہ تم اللہ تعالیٰ کے عذاب کے مستحق ہو جاؤ گے۔ اور وہ شخص ناکام ہوا جس نے اللہ تعالیٰ کی ذات پر جھوٹ باندھا۔ وہ آدمی ان کے پاس آیا، اور وہ سب کہہ ڈالا، سیدنا عبداللہ بن عمرو رضی اللہ عنہ فرماتے ہیں: سیدنا کعب نے سچ کہا، واقعی وہ شخص ناکام ہوا جس نے اللہ تعالیٰ کی ذات پر جھوٹ بولا۔ اور عبداللہ بن عمرو نے اس کا برا نہیں منایا، سیدنا کعب رضی اللہ عنہ نے اس آدمی کو دوبارہ ان کے پاس بھیجا اور کہا: ان سے پوچھا کہ حشر کیا ہے؟ اور مومنین کی ارواح کہاں جمع ہوں گی؟ اور مشرکین کی ارواح کہاں جمع کی جائیں گی؟ اس شخص نے ان کے پاس آ کر یہ سوالات پوچھے، انہوں نے جواب دیا: مسلمانوں کی ارواح مقام ” اریحاء “ میں جمع ہوں گی، اور مشرکین کی ارواح ” مقام صنعاء “ میں جمع ہوں گی، اور حشر کا آغاز یوں ہو گا کہ ایک آگ نمودار ہو گی جو لوگوں کو اپنے آگے آگے ہانکتی لے جائے گی، لوگوں کو ہر طرف رات کی طرح اندھیرا نظر آئے گا، اور دن کی روشنی دکھائی نہیں دے گی۔ سیدنا کعب کا نمائندہ ان کے سوالوں کے جواب لے کر ان کے پاس واپس آیا اور تمام جواب سنا دیئے، جوابات سن کر سیدنا کعب رضی اللہ عنہ نے کہا: اس آدمی نے سچ کہا ہے۔ یہ واقعی عالم دین ہے، اس سے مسائل پوچھ لیا کرو۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6377]