سیدنا زید بن ارقم رضی اللہ عنہ فرماتے ہیں: ہم رسول اللہ صلی اللہ علیہ وسلم کے ہمراہ روانہ ہوئے، اور غدیر خم کے مقام پر پہنچے، رسول اللہ صلی اللہ علیہ وسلم نے وہاں پر سائبان لگانے کا حکم دیا، اسی دن سخت گرم ہوائیں چلنا شروع ہو گئیں، ہماری زندگی میں اس سے زیادہ گرم دن کبھی نہیں آیا۔ نبی اکرم صلی اللہ علیہ وسلم نے اللہ تعالیٰ کی حمد و ثناء کے بعد فرمایا: اے لوگو! اللہ تعالیٰ نے جس نبی کو بھی دنیا میں بھیجا ہے، وہ اپنے سے سابقہ نبی سے آدھی زندگی جیا ہے۔ ہو سکتا ہے کہ میرا بلاوا آ جائے اور میں اس بلاوے کو قبول کر لوں، میں تمہارے اندر وہ چیز چھوڑ کر جا رہا ہوں کہ اس (کو مضبوطی سے تھام لینے) کے بعد تم کبھی گمراہ نہیں ہو گے، وہ ہے اللہ تعالیٰ کی کتاب قرآن پاک۔ پھر رسول اللہ صلی اللہ علیہ وسلم سیدنا علی رضی اللہ عنہ کا ہاتھ تھام کر کھڑے ہوئے اور فرمایا: اے لوگو! کونسی ذات ہے جو تمہاری جانوں سے بڑھ کر تمہاری مالک ہے؟ لوگوں نے کہا: اللہ اور اس کا رسول ہی بہتر جانتے ہیں۔ حضور صلی اللہ علیہ وسلم نے فرمایا: کیا میں تمہیں تمہاری جانوں کا تم سے زیادہ مالک نہیں ہوں؟ لوگوں نے کہا: جی ہاں۔ تو آپ صلی اللہ علیہ وسلم نے فرمایا: جس کا میں مولیٰ ہوں، علی بھی اس کا مولیٰ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6403]