علی بن عبداللہ بن عباس نے اپنے والد (سیدنا عبداللہ بن عباس رضی اللہ عنہما) کا یہ ارشاد نقل کیا ہے (وہ فرماتے ہیں) مجھے میرے والد سیدنا عباس رضی اللہ عنہ نے حکم دیا (ان کے حکم کے مطابق) میں نے رسول اللہ صلی اللہ علیہ وسلم کے گھر والوں کے پاس رات گزاری، میں مسجد کی جانب گیا، رسول اللہ صلی اللہ علیہ وسلم نے لوگوں کو عشاء کی نماز پڑھائی، (نماز پڑھ کر سب لوگ اپنے اپنے گھروں کو چلے گئے) رسول اللہ صلی اللہ علیہ وسلم کے علاوہ دوسرا کوئی شخص مسجد میں باقی نہ بچا تھا۔ پھر حضور صلی اللہ علیہ وسلم میرے پاس سے گزرے، آپ صلی اللہ علیہ وسلم نے پوچھا: یہ کون ہے؟ میں نے کہا: عبداللہ بن عباس۔ آپ صلی اللہ علیہ وسلم نے آنے کی وجہ پوچھی، تو میں نے بتایا کہ میرے والد صاحب نے مجھے حکم دیا ہے کہ میں رات آپ کے پاس گزاروں۔ آپ صلی اللہ علیہ وسلم مجھے ساتھ لے گئے، جب گھر پہنچے تو حضور صلی اللہ علیہ وسلم نے فرمایا: عبداللہ کے لئے اچھا بستر بچھاؤ، مجھے بالوں کی پوشش والا تکیہ دیا گیا۔ سیدنا عباس میرے پاس آ گئے تاکہ مجھے نیند نہ آئے اور میں نبی اکرم صلی اللہ علیہ وسلم کی نماز کی حفاظت کر سکوں۔ پھر رسول اللہ صلی اللہ علیہ وسلم تشریف لائے اور سو گئے، (آپ اتنی گہری نیند سوئے تھے کہ) میں نے آپ صلی اللہ علیہ وسلم کے مبارک خراٹوں کی آواز سنی۔ پھر حضور صلی اللہ علیہ وسلم اپنے بستر پر دراز ہو گئے، اپنا سر آسمان کی جانب اٹھا لیا اور تین مرتبہ ” سبحان اللہ الملک القدوس “ پڑھا۔ پھر سورہ آل عمران کی آخری آیت ان فی خلق السموات والارض سے لے کر اختتام سورت تک پڑھا، پھر آپ کھڑے ہوئے اور مسواک کی۔ پھر وضو کیا، پھر مسجد میں تشریف لائے۔ پھر دو رکعت نوافل پڑھے، یہ دونوں رکعتیں نہ بہت چھوٹی تھیں اور نہ زیادہ لمبی تھیں۔ راوی کہتے ہیں، پھر حضور صلی اللہ علیہ وسلم نے نماز پڑھی، اس کے بعد وتر پڑھے۔ اور یہ دعا مانگی ” اے اللہ! میری آنکھوں میں نور کر دے، میری سماعتوں کو روشن کر دے، میری زبان کو نور کر دے، میرے دل کو نور سے بھر دے، میرے دائیں نور کر دے، میرے بائیں نور کر دے۔ میرے آگے نور کر دے اور میرے پیچھے نور کر دے۔ اور جس دن میں تیری ملاقات کے لئے آؤں تو اس دن بھی مجھے نور عطا کر۔ اور اس کو میرے لئے بہت بڑا نور کر دے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6419]