ہشام بن محمد بن سائب کلبی فرماتے ہیں: جب زکوۃ کی فرضیت کا حکم نازل ہوا تو رسول اللہ صلی اللہ علیہ وسلم نے سیدنا ابوبکر صدیق رضی اللہ عنہ کو ان کی جانب بھیجا۔ سیدنا ابوبکر رضی اللہ عنہ نے سیدنا عوف بن مالک رضی اللہ عنہ سے کہا: بے شک اللہ تعالیٰ نے زکوہ کا حکم نازل فرمایا ہے۔ سیدنا عوف نے پوچھا: زکوۃ کا نصاب کیا ہے؟ سیدنا ابوبکر صدیق رضی اللہ عنہ نے فرمایا 40 اونٹوں میں ایک اونٹ۔ سیدنا عوف رضی اللہ عنہ نے کہا: آپ معائنہ فرمائیے اور ایک اونٹنی لے جائیے، سیدنا ابوبکر صدیق رضی اللہ عنہ نے معائنہ کیا اور سواری کے لئے ایک اونٹنی لے لی، سیدنا عوف رضی اللہ عنہ نے کہا: یہ تو میری سواری کے لئے ہے۔ سیدنا ابوبکر صدیق رضی اللہ عنہ نے فرمایا: اس کے بدلے اللہ تعالیٰ تمہیں بہت اجر عطا فرمائے گا، سیدنا عوف رضی اللہ عنہ نے کہا: تو پھر اس کا بچھڑا بھی ساتھ لے جائیے، سیدنا ابوبکر صدیق رضی اللہ عنہ وہ اونٹنی اور اس کا بچہ ساتھ لے کر رسول اللہ صلی اللہ علیہ وسلم کی بارگاہ میں حاضر ہو گئے، اور سیدنا عوف بن مالک اشجعی رضی اللہ عنہ کے حسن عمل اور حسن اخلاق کے بارے میں حضور صلی اللہ علیہ وسلم کو بتایا۔ نبی اکرم صلی اللہ علیہ وسلم نے فرمایا: واپس جاؤ اور عوف کو بتا دو کہ اللہ تعالیٰ نے اس کے بدلے میں اس کے لئے جنت میں گھر بنا دیا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6458]