مجاہد بن جبرابی الحجاج فرماتے ہیں: سیدنا علی ابن ابی طالب رضی اللہ عنہ پر اللہ تعالیٰ کے فضائل میں سے یہ بھی ہے کہ اللہ تعالیٰ نے ان پر یہ احسان فرمایا، قریش پر شدید قحط سالی آ گئی، اور ابوطالب کثیرالعیال تھے، رسول اللہ صلی اللہ علیہ وسلم کے چچا سیدنا عباس رضی اللہ عنہ پورے بنی ہاشم میں آسودہ حال تھے، حضور نے اپنے چچا سیدنا عباس رضی اللہ عنہ سے کہا: اے ابوالفضل آپ کے بھائی ابوطالب کے اہل و عیال زیادہ ہیں، اور جیسا کہ آپ دیکھ رہے ہیں کہ لوگ بیچارے قحط سالی کا شکار ہیں، آپ ہمارے ساتھ چلئے، ہم ابوطالب کے ساتھ تعاون کرتے ہیں، ان کا ایک بچہ میں اپنی کفالت میں لوں گا اور ایک بچہ آپ اپنی کفالت میں لے لیں۔ سیدنا عباس رضی اللہ عنہ نے حامی بھر لی، حضور صلی اللہ علیہ وسلم سیدنا عباس رضی اللہ عنہ کو ہمراہ لے کر ابوطالب کے گھر تشریف لے گئے، اور ان سے کہا: ہم آپ کے بچوں کے معاملے میں آپ پر آسانی کرنا چاہتے ہیں۔ تاکہ اس وقت لوگ جس پریشانی میں مبتلا ہیں، آپ اس سے نکل سکیں۔ سیدنا ابوطالب نے ان سے کہا: آپ لوگ عقیل کو میرے پاس رہنے دو اور باقی بچوں کے بارے میں جو تمہاری مرضی ہو، میں راضی ہوں۔ چنانچہ رسول اللہ صلی اللہ علیہ وسلم نے سیدنا علی کو اپنے ذمے لے لیا اور سیدنا عباس رضی اللہ عنہ نے سیدنا جعفر رضی اللہ عنہ کو اپنے ساتھ لے لیا۔ اس کے بعد سیدنا علی رضی اللہ عنہ مسلسل رسول اللہ صلی اللہ علیہ وسلم کے ہمراہ ہی رہے، حتیٰ کہ اللہ تعالیٰ نے آپ کو نبی بنایا اور سیدنا علی رضی اللہ عنہ نے حضور صلی اللہ علیہ وسلم کی اتباع اور پیروی کی۔ سیدنا عباس رضی اللہ عنہ نے سیدنا جعفر رضی اللہ عنہ کو لیا، اور سیدنا جعفر رضی اللہ عنہ مسلسل سیدنا عباس رضی اللہ عنہ کے پاس ہی رہے حتیٰ کہ وہ مسلمان ہو گئے، اور ان سے مستغنی ہو گئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6606]