سیدنا ضرار بن ازور رضی اللہ عنہ فرماتے ہیں: میں نبی اکرم صلی اللہ علیہ وسلم کی بارگاہ میں حاضر ہوا، میں نے عرض کی: یا رسول اللہ صلی اللہ علیہ وسلم آپ اپنا ہاتھ آگے بڑھائیے، تاکہ میں اسلام پر آپ کی بیعت کروں۔ (حضور صلی اللہ علیہ وسلم نے اپنا ہاتھ بڑھایا) میں نے آپ صلی اللہ علیہ وسلم کی بیعت کی پھر میں نے درج ذیل اشعار پڑھے۔ * میں نے جوئے کے تیر، گانے باجے کے آلات اور شراب نوشی وغیرہ عاجزی کی بناء پر برکت حاصل کرنے کے لئے چھوڑ دیئے ہیں۔ * نشے کے عالم میں کرایہ پر دینے والا گھوڑا اور مسلمانوں کے خلاف جنگ سب چھوڑ دیئے ہیں۔ * اور جمیلہ نے کہا: تو نے ہمیں دور کر دیا اور اپنے اہل و عیال کو مختلف مقامات پر بکھیر دیا ہے۔ * اے میرے رب میرے سودے میں مجھے نقصان نہ ہو، کیونکہ میں نے اپنا گھر بار، دھن دولت سب تیری رضا کے لئے چھوڑ دیئے ہیں۔ نبی اکرم صلی اللہ علیہ وسلم نے فرمایا: اے ضرار تیرے سودے میں تجھے دھوکا نہیں ہوا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6747]