سیدنا عمیر بن سلمہ ضمری رضی اللہ عنہ فرماتے ہیں: ایک دفعہ کا ذکر ہے کہ ہم لوگ رسول اللہ صلی اللہ علیہ وسلم کے ہمراہ مقام روحاء کے کسی نواحی علاقے میں سفر میں تھے۔ حضور صلی اللہ علیہ وسلم اس وقت احرام میں تھے۔ ہم نے ایک گدھا دیکھا جس کی کونچیں کٹی ہوئی تھیں، آپ صلی اللہ علیہ وسلم نے فرمایا: اس کو چھوڑ دو۔ اس کے بعد اس گدھے کا وہ مالک جس نے اس کی کونچیں کاٹی تھیں وہ بہز قبیلے سے تعلق رکھنے والا کوئی شخص تھا، وہ نبی اکرم صلی اللہ علیہ وسلم کی بارگاہ میں آیا اور کہنے لگا: یا رسول اللہ صلی اللہ علیہ وسلم یہ گدھا آپ کے لئے ہی تو تھا، نبی اکرم صلی اللہ علیہ وسلم نے سیدنا ابوبکر صدیق رضی اللہ عنہ کو حکم دیا کہ اس کو اپنے ساتھیوں میں تقسیم کر دو۔ آپ صلی اللہ علیہ وسلم پھر آگے چل دیئے، جب مقام اثابہ میں پہنچے تو ہم نے ایک درخت کے سائے میں ایک ہرن کو پایا، اس کو تیر لگا ہوا تھا، نبی اکرم صلی اللہ علیہ وسلم نے ایک آدمی کو کہا کہ اعلان کر دو کہ کوئی شخص اس کا گوشت نہ کھائے، چنانچہ تمام لوگ اس کو اسی طرح چھوڑ کر آگے گزر گئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6763]