عبداللہ بن زمعہ بن اسود بن مطلب بن اسد فرماتے ہیں: جب رسول اللہ صلی اللہ علیہ وسلم زیادہ علیل ہوئے، تو میں مسلمانوں کی ایک جماعت کے ہمراہ میں حضور صلی اللہ علیہ وسلم کی خدمت میں حاضر تھا، سیدنا بلال نے اذان دی، حضور صلی اللہ علیہ وسلم نے فرمایا: کسی کو کہہ دو کہ وہ لوگوں کو نماز پڑھائے، آپ فرماتے ہیں: میں وہاں سے نکلا، میں نے دیکھا کہ سیدنا عمر رضی اللہ عنہ لوگوں میں موجود تھے جبکہ سیدنا ابوبکر صدیق رضی اللہ عنہ موجود نہ تھے، میں نے سیدنا عمر رضی اللہ عنہ سے عرض کی: اے عمر! آپ لوگوں کو نماز پڑھا دیجئے، سیدنا عمر رضی اللہ عنہ نماز پڑھانے کے لئے کھڑے ہو گئے، سیدنا عمر رضی اللہ عنہ کی آواز نسبتاً بلند تھی، جب انہوں نے تکبیر تحریمہ کہی، رسول اللہ صلی اللہ علیہ وسلم نے جب ان کی آواز سنی، تو پوچھا: ابوبکر کہاں ہے؟ اللہ تعالیٰ اور مسلمان اس بات کو پسند نہیں کرتے (کہ ابوبکر کے ہوتے ہوئے کوئی دوسرا نماز پڑھائے) حضور صلی اللہ علیہ وسلم نے سیدنا ابوبکر رضی اللہ عنہ کو بلوایا، جب سیدنا ابوبکر رضی اللہ عنہ حاضر بارگاہ ہوئے تو اس وقت تک سیدنا عمر نماز پڑھا چکے تھے، آپ نے آ کر لوگوں کو (دوبارہ) نماز پڑھائی۔ سیدنا عبداللہ بن زمعہ رضی اللہ عنہ فرماتے ہیں: سیدنا عمر رضی اللہ عنہ نے مجھے کہا: تو ہلاک ہو جائے، اے ابن زمعہ! تو نے میرے ساتھ یہ کیا کیا؟ خدا کی قسم! جب تم نے مجھے کہا: تو میں یہی سمجھا تھا کہ رسول اللہ صلی اللہ علیہ وسلم نے مجھے نماز پڑھانے کا حکم دیا ہے، اگر مجھے پتا ہوتا کہ رسول اللہ صلی اللہ علیہ وسلم نے مجھے حکم نہیں دیا تو میں نماز نہ پڑھاتا، میں نے کہا: اللہ کی قسم! رسول اللہ صلی اللہ علیہ وسلم نے حکم نہیں دیا تھا، لیکن میں نے جب سیدنا ابوبکر رضی اللہ عنہ کو نہ دیکھا، اور حاضرین میں مجھے آپ ہی نماز پڑھانے کے زیادہ اہل نظر آئے، تو میں نے آپ کو کہہ دیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6848]