حکیم بن معاویہ بن حیدہ اپنے والد کا یہ بیان نقل کرتے ہیں کہ انہوں نے اپنے بھائی مالک بن حیدہ سے کہا: تم میرے ساتھ رسول اللہ صلی اللہ علیہ وسلم کے پاس چلو، کیونکہ وہ تمہیں پہچانتے ہیں، مجھے نہیں پہچانتے، انہوں نے میرے کچھ پڑوسیوں کو گرفتار کر لیا ہوا ہے۔ ہم رسول اللہ صلی اللہ علیہ وسلم کے پاس چلے آئے، مالک بن حیدہ نے کہا: یا رسول اللہ صلی اللہ علیہ وسلم میں بھی اسلام لا چکا ہوں اور میرے پڑوسی بھی مسلمان ہو چکے ہیں، اس لئے آپ ان کو رہا کر دیجئے، آپ صلی اللہ علیہ وسلم نے ان کو کوئی جواب نہ دیا، مالک نے دوبارہ کہا، حضور صلی اللہ علیہ وسلم نے پھر کوئی جواب نہ دیا، وہ غصے میں بپھر کر کھڑا ہوا اور کہنے لگا: اگر تم اسی طرح کرو گے تو وہ سمجھیں گے کہ تم جس چیز کا دوسروں کو حکم دیتے ہو، خود اسی حکم کی خلاف ورزی کرتے ہو، میں اس کو ڈانٹنے لگ گیا اور اس کو ایسی باتیں کرنے سے روکنے لگ گیا۔ حضور صلی اللہ علیہ وسلم نے فرمایا: یہ کیا کہہ رہے ہیں؟ لوگوں نے بتایا کہ یہ فلاں فلاں باتیں کر رہا ہے۔ حضور صلی اللہ علیہ وسلم نے فرمایا: میں جو کچھ کر رہا ہوں، اس کا وبال میرے اوپر ہو گا، اس سے ان کا تو کوئی نقصان نہیں ہے، اس کے پڑوسیوں کو چھوڑ دو۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6853]