محمد بن عمر نے اپنی سند کے ہمراہ حبیب جو کہ عروہ کے آزاد کردہ غلام ہیں کا یہ بیان نقل کیا ہے ” جب ام المومنین سیدہ خدیجہ رضی اللہ عنہا کا انتقال ہوا تو رسول اللہ صلی اللہ علیہ وسلم بہت شدید پریشان ہوئے تو سیدنا جبریل امین علیہ السلام ام المومنین سیدہ عائشہ رضی اللہ عنہا کو ایک پنگھوڑے میں لے کر حاضر ہوئے، اور عرض کی: یا رسول اللہ صلی اللہ علیہ وسلم یہ آپ کا غم کافی حد تک ختم کر دے گی، اس میں (آپ کو) خدیجہ رضی اللہ عنہا جیسا سکون ملے گا، پھر ان کو واپس لے گئے۔ رسول اللہ صلی اللہ علیہ وسلم اکثر سیدنا ابوبکر رضی اللہ عنہ کے گھر تشریف لے جایا کرتے تھے اور (سیدہ عائشہ کی والدہ سے) کہتے: اے ام رومان! عائشہ کا خیال رکھا کرو اور اس کے حوالے سے میری بھی حفاظت کیا کرو۔ سیدہ عائشہ رضی اللہ عنہا کے گھر میں ان کی بہت عزت تھی، اور ان کے بارے میں ان کو اللہ تعالیٰ کے حکم کا کچھ پتا نہ تھا۔ جب سے سیدنا ابوبکر نے اسلام قبول کیا اس وقت سے ہجرت تک حضور صلی اللہ علیہ وسلم بلاناغہ سیدنا ابوبکر رضی اللہ عنہ کے گھر تشریف لے جایا کرتے تھے، ایک دفعہ کا ذکر ہے کہ رسول اللہ صلی اللہ علیہ وسلم ان کے گھر تشریف لائے ہوئے تھے، آپ نے دیکھا کہ سیدہ عائشہ رضی اللہ عنہا دروازے کے پیچھے چھپی ہوئی ہیں، بہت غمگین ہیں اور رو رہی ہیں۔ رسول اللہ صلی اللہ علیہ وسلم نے ان سے پریشان اور رونے کا سبب پوچھا تو انہوں نے اپنی والدہ کی شکایت کی، اور بتایا کہ وہ آپ صلی اللہ علیہ وسلم سے بہت محبت کرتی ہیں، یہ سن کر رسول اللہ صلی اللہ علیہ وسلم کی آنکھ سے آنسو نکل پڑے، آپ ام رومان کے پاس گئے اور فرمایا: اے ام رومان! میں نے تمہیں تاکید نہیں کی تھی کہ اس کے سلسلے میں تم میری حفاظت کرنا، انہوں نے بتایا: یا رسول اللہ صلی اللہ علیہ وسلم اس نے ابوبکر صدیق کو ہماری شکایت کی ہے جس کی وجہ سے وہ ہم سے خفا ہو گئے ہیں۔ نبی اکرم صلی اللہ علیہ وسلم نے کہا: اس نے اگرچہ یہ کیا ہے (لیکن آپ کو نہیں چاہیے تھا کہ اس کو پریشان کرتی) ام رومان نے کہا: آج کے بعد آپ کو پھر کبھی شکایت کا موقع نہیں ملے گا۔ ام المومنین سیدہ عائشہ رضی اللہ عنہا نبوت کے چوتھے سال پیدا ہوئیں، رسول اللہ صلی اللہ علیہ وسلم نے نبوت کے دسویں سال ان سے نکاح کیا، نکاح کے وقت ان کی عمر 6 سال تھی، سیدہ سودہ بنت زمعہ رضی اللہ عنہا کے ایک ماہ بعد رسول اللہ صلی اللہ علیہ وسلم نے ان سے نکاح کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6863]