ام سلمہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: جب تمہیں کوئی مصیبت آئے تو یوں دعا مانگو:” ہم اللہ ہی کے لئے ہیں اور اسی کی جانب ہمیں لوٹ کر جانا ہے، اے اللہ میں اپنی مصیبت کا معاملہ تیری بارگاہ میں پیش کرتا ہوں تو مجھے اس میں اجر عطا فرما۔“ ام المومنین فرماتی ہیں (اس دعا میں اس سے آگے یہ الفاظ ہیں، یا اللہ! مجھے اس کا اچھا بدل عطا فرما، چنانچہ) میں جب اگلے لفظ بولنے لگتی تو میں سوچتی کہ ابوسلمہ سے بہتر مجھے کونسا شوہر مل سکتا ہے؟ لیکن میں یہ دعا مسلسل مانگتی رہی، حتیٰ کہ جب میری عدت پوری ہو گئی تو سیدنا ابوبکر رضی اللہ عنہ نے مجھے پیغام نکاح بھیجا، میں نے انکار کر دیا، پھر سیدنا عمر رضی اللہ عنہ نے پیغام بھیجا، میں نے ان کو بھی انکار کر دیا، پھر نبی اکرم صلی اللہ علیہ وسلم نے پیغام نکاح دے کر ایک خاتون کو بطور نمائندہ بھیجا، ام المومنین ام سلمہ رضی اللہ عنہا نے کہا: اللہ تعالیٰ کے رسول کو خوش آمدید اور رسول اللہ صلی اللہ علیہ وسلم کے سفیر کو بھی خوش آمدید۔ (پھر اس خاتون سے کہا) تم رسول اللہ صلی اللہ علیہ وسلم کو میرا سلام کہنا اور آپ صلی اللہ علیہ وسلم کو بتا دینا کہ مجھ میں بچے پیدا کرنے کی صلاحیت ختم ہو چکی ہے اور میں بہت زیادہ غیرت مند بھی ہوں۔ اور یہ کہ میرے قریبی رشتہ داروں میں کوئی بھی اس وقت میرے پاس نہیں ہے۔ رسول اللہ صلی اللہ علیہ وسلم نے جواباً پیغام بھیجا کہ بچوں کے معاملہ میں، اللہ تعالیٰ تیرے بچوں کو تیرے لئے سلامت رکھے (میری طرف سے اس بات کی پرواہ نہ کرو) اور جہاں تک غیرت کا معاملہ ہے تو میں دعا کروں گا کہ اللہ تعالیٰ تمہاری اس کیفیت میں نرمی عطا فرمائے۔ اور جہاں تک اولیاء کا ہے تو تمہارے جتنے بھی اولیاء ہیں چاہے یہاں حاضر ہیں یا غائب ہیں سب کو راضی کرنا میری ذمہ داری ہے۔ ام المومنین نے اپنے بیٹے سے کہا: اے بیٹے عمر جاؤ اور رسول اللہ صلی اللہ علیہ وسلم کے ساتھ میرا نکاح کر دو، ان کے بیٹے نے ان کا نکاح رسول اللہ صلی اللہ علیہ وسلم کے ساتھ کر دیا۔ اور ان سے کہا: میں نے جتنا سامان تمہاری فلاں بہن کو دیا تھا اتنا ہی آپ کو بھی دوں گا، اس میں کچھ بھی کمی نہیں کروں گا۔ چنانچہ دو مٹکے، دو چکیاں اور ایک تکیہ جس میں لیف بھرا ہوا تھا ان کو جہیز میں دیا۔ رسول اللہ صلی اللہ علیہ وسلم ان کے پاس تشریف لاتے تھے۔ ان ایام میں ام سلمہ رضی اللہ عنہا کی بیٹی ” زینب “ دودھ پیتی تھی، رسول اللہ صلی اللہ علیہ وسلم جب بھی تشریف لاتے تو ام سلمہ رضی اللہ عنہا اپنی بیٹی زینب کو گود میں لٹا کر دودھ پلانے لگ جاتی تھیں۔ آپ فرماتی ہیں: رسول اللہ صلی اللہ علیہ وسلم بہت نرم مزاج اور حیا دار تھے، آپ غصہ کئے بغیر واپس تشریف لے جاتے تھے، عمار بن یاسر رضی اللہ عنہ، سیدہ ام سلمہ رضی اللہ عنہا کے رضاعی بھائی ہیں، وہ معاملہ سمجھ گئے۔ ایک دن رسول اللہ صلی اللہ علیہ وسلم نے سیدہ ام سلمہ رضی اللہ عنہا کے پاس جانے کا ارادہ کیا، تو سیدنا عمار بن یاسر، سیدہ ام سلمہ رضی اللہ عنہا کے پاس گئے اور ان کی گود سے زینب کو چھین لیا اور کہا: اس گندی بچی کو چھوڑ دو تو نے اس کے سبب رسول اللہ صلی اللہ علیہ وسلم کو تکلیف دی ہے۔ اس کے بعد رسول اللہ صلی اللہ علیہ وسلم تشریف لے آئے، آپ نے حجرے کے چاروں طرف نظر دوڑائی اور پوچھا: زناب کہاں ہے؟ کیا بات ہے آج زناب نظر نہیں آ رہی؟ سیدہ ام سلمہ رضی اللہ عنہا نے عرض کی: عمار آیا تھا وہ اس کو اپنے ساتھ لے گیا، اس دن رسول اللہ صلی اللہ علیہ وسلم نے اپنی اس بیوی کے ساتھ سلسلہ ازدواج شروع کیا۔ اور ان سے فرمایا: اگر تم چاہو تو میں ساتوں دن تمہارے پاس آیا کروں اور (اس صورت میں دیگر) ازواج کے پاس بھی ساتوں دن جایا کروں گا۔ ٭٭ یہ حدیث صحیح الاسناد ہے لیکن شیخین نے اس کو نقل نہیں کیا۔ ابن عمر بن ابی سلمہ کہتے ہیں: اس حدیث میں حماد بن سلمہ نے جس راوی کا نام ذکر نہیں کیا ہے، ایک اور محدث نے ان کا نام ذکر کر دیا ہے۔ وہ ” سعید بن عمر بن ابی سلمہ “ ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6912]