ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے اپنی ازواج سے کہا: تم سب سے پہلے میرے پاس وہ آئے گی جس کے ہاتھ سب سے زیادہ لمبے ہیں۔ ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم کے انتقال کے بعد ایک دفعہ ہم ایک گھر میں اکٹھی ہوئیں اور ایک دیوار کے ساتھ اپنے ہاتھ ناپنے لگیں، ہم یونہی اپنے ہاتھ ناپا کرتی تھیں کہ سیدہ زینب بنت جحش رضی اللہ عنہا کا انتقال ہو گیا، ان کا قد سب سے چھوٹا تھا، یہ ہم میں سے کسی سے بھی لمبی نہیں تھیں۔ تب ہم سمجھیں کہ ہاتھ لمبے ہونے سے رسول اللہ صلی اللہ علیہ وسلم کی مراد ” صدقہ و خیرات کرنا “ تھی، راوی کہتے ہیں: سیدہ زینب کو دستکاری کے بہت کام آتے تھے، آپ چمڑے کو دباغت دیتی تھیں، پودے لگاتی تھیں اور جو رقم آتی، اس کو اللہ تعالیٰ کے راستے میں خرچ کر دیا کرتی تھیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6939]