ابوعبیدہ معمر بن مثنیٰ سے مروی ہے کہ جب قبیلہ کِندہ کا وفد آیا تو رسول اللہ صلی اللہ علیہ وسلم نے سنہ 10 ہجری میں اشعث بن قیس کی بہن قتیلہ بنت قیس سے نکاح فرمایا، پھر پندرہ صفر کو آپ صلی اللہ علیہ وسلم بیمار ہوئے اور دو ربیع الاول بروز پیر آپ صلی اللہ علیہ وسلم کی وفات ہوئی، اس وقت تک وہ آپ صلی اللہ علیہ وسلم کے پاس نہیں پہنچی تھی اور نہ ہی آپ صلی اللہ علیہ وسلم نے اس کے ساتھ خلوت فرمائی تھی۔ بعض نے اس نکاح کا وقت آپ صلی اللہ علیہ وسلم کی وفات سے دو ماہ قبل بتایا ہے، جبکہ دوسروں کا گمان ہے کہ آپ صلی اللہ علیہ وسلم نے اپنی بیماری کے دوران نکاح کیا۔ بعض کے نزدیک آپ صلی اللہ علیہ وسلم نے وصیت فرمائی تھی کہ قتیلہ کو اختیار دیا جائے، اگر وہ چاہے تو پردہ اختیار کر لے اور وہ مومنوں پر حرام ہو جائے، اور اگر چاہے تو جس سے چاہے نکاح کر لے۔ اس نے نکاح کا انتخاب کیا اور حضرموت میں عکرمہ بن ابی جہل نے اس سے نکاح کر لیا، جب یہ خبر سیدنا ابوبکر رضی اللہ عنہ کو پہنچی تو انہوں نے فرمایا: ”میرا پختہ ارادہ ہے کہ ان دونوں کو آگ لگا دوں“، مگر سیدنا عمر بن خطاب رضی اللہ عنہ نے کہا: ”وہ امہات المومنین میں سے نہیں ہے، نہ ہی نبی کریم صلی اللہ علیہ وسلم نے ان کے ساتھ خلوت فرمائی اور نہ ان پر حجاب کا حکم نافذ ہوا تھا“۔ بعض کا یہ بھی خیال ہے کہ وہ مرتد ہو گئی تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6987]