سیدنا ابوالاحوص اپنے والد کا یہ بیان نقل کرتے ہیں (وہ فرماتے ہیں) میں نبی اکرم صلی اللہ علیہ وسلم کی خدمت میں حاضر ہوا۔ اس وقت میری حالت ناگفتہ بہ تھی۔ آپ صلی اللہ علیہ وسلم نے پوچھا: تیرے پاس مال ہے؟ میں نے کہا: جی ہاں۔ آپ صلی اللہ علیہ وسلم نے پوچھا: کس قسم کا مال ہے؟ میں نے کہا: اونٹ، گھوڑے، بھیڑ، بکریاں، غلام، خدام ہر طرح کا مال ہے۔ حضور صلی اللہ علیہ وسلم نے فرمایا: جب اللہ تعالیٰ تمہیں مال سے نوازے تو اس کا اثر تمہاری شخصیت پر نظر بھی آنا چاہیے۔ پھر فرمایا: تمہاری قوم میں صحیح سلامت کانوں والا اونٹ کا بچہ پیدا ہوتا ہے، اس کا مالک استرے کے ساتھ اس کے کان کاٹ ڈالتا ہے، اور کہتا ہے ” یہ بحیرہ ہے “۔ اور اس کی کھال چیر کر کہتا ہے ” یہ صرم ہے “ یہ کہہ کر ازخود اپنے اوپر اور اپنے اہل و عیال پر اس کو حرام قرار دے لیتا ہے، میں نے کہا: جی ہاں۔ آپ صلی اللہ علیہ وسلم نے فرمایا: اللہ تعالیٰ نے تجھے جو چیز عطا فرمائی ہے وہ تیرے لیے حلال ہے، اور اللہ کا استرا تیرے استرے سے زیادہ تیز ہے، اور اللہ تعالیٰ کی کلائی، تیری کلائی سے زیادہ مضبوط ہے، اور اللہ تعالیٰ کا استرا تیرے استرے سے زیادہ تیز ہے۔ میں نے کہا: یا رسول اللہ صلی اللہ علیہ وسلم آپ کا اس بارے میں کیا خیال ہے کہ میں کسی آدمی کا مہمان بنوں اور وہ نہ تو میری عزت کرے اور نہ میری مہمان نوازی کرے، ایسا شخص جب میرا مہمان بنے تو کیا میں اس کے سلوک کا اسی انداز میں بدلہ دے سکتا ہوں؟ یا میں اس کی مہمان نوازی کروں؟ حضور صلی اللہ علیہ وسلم نے فرمایا: تم اس کی مہمان نوازی کرو۔ ٭٭ یہ حدیث صحیح الاسناد ہے، لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7551]