سیدنا عبداللہ بن عمرو بن عاص رضی اللہ عنہما سے روایت ہے کہ جب قیامت کا دن ہوگا تو زمین کو چمڑے کی طرح پھیلا دیا جائے گا اور اللہ تعالیٰ تمام مخلوقات یعنی انسانوں، جنوں، چوپایوں اور وحشی جانوروں کو اکٹھا فرمائے گا، پس جب وہ دن ہوگا تو اللہ تعالیٰ جانوروں کے درمیان بھی قصاص قائم فرمائے گا یہاں تک کہ بغیر سینگوں والی بکری کو سینگوں والی بکری کے مارنے کا بدلہ دلایا جائے گا، پھر جب اللہ تعالیٰ جانوروں کے درمیان قصاص کے فیصلے سے فارغ ہوگا تو ان سے فرمائے گا: تم مٹی ہو جاؤ، تو وہ سب مٹی ہو جائیں گے، اس وقت کافر (یہ منظر دیکھ کر) کہے گا: ﴿يَا لَيْتَنِي كُنْتُ تُرَابًا﴾ ”اے کاش! میں مٹی ہوتا۔“ [سورة النبأ: 40]
اس کے تمام راوی ثقہ ہیں سوائے ابومغیرہ کے جو کہ مجہول ہیں، اور صحابی کی تفسیر مسند ہوتی ہے۔ [المستدرك على الصحيحين/كتاب : الأهوال/حدیث: 8931]