2425. حضرت خباب ؓ سے روایت ہے انھوں نے کہا: میں زمانہ جاہلیت میں لوہار تھا۔ عاص بن وائل کے ذمے میرے کچھ درہم تھے۔ میں اس کے پاس آیا اور اس سے اپنے قرض کا مطالبہ کیا تو اس نے کہا: میں اس وقت تک تمہارے پیسے نہیں دوں گا جب تک تم محمد(ﷺ) کا انکار نہیں کروگے۔ میں نے کہا: اللہ کی قسم!میں حضرت محمد ﷺ کا انکار نہیں کروں گا حتیٰ کہ اللہ تعالیٰ تجھے مارے اور پھر زندہ کرے۔ اس نے جواب دیا: تو پھر مجھے مارے اور پھر زندہ کرے۔ اس نے جواب دیا: تو پھر مجھے چھوڑ دو حتیٰ کہ میں مروں اور پھر اٹھایا جاؤں، اور مجھے مال واولاد ملے، تب میں تمہارا قرض ادا کردوں گا۔ وہ کہتے ہیں کہ یہ آیات اس سلسلے میں نازل ہوئیں: ”کیا آپ نے اس شخص کو دیکھا جس نے میری آیات کا انکار کیا اور کہا: میں وہاں مال واولاد دیا جاؤں گا۔۔۔ “ [صحيح بخاري، حديث نمبر:2425]

حدیث حاشیہ:
حضرت خباب ؓ، عاص بن وائل غیر مسلم کے ہاں اپنی مزدوری وصول کرنے کا تقاضا کرنے گئے۔
اسی سے مقصد باب ثابت ہوا۔
عاص نے جو جواب دیا وہ انتہائی نامعقول جواب تھا۔
جس پر قرآن مجید میں نوٹس لیا گیا۔
اس حدیث سے مجتہد مطلق امام بخاری ؒ نے کئی ایک مسائل کا استنباط فرمایا ہے۔
ا س لیے متعدد مقامات پر یہ حدیث نقل کی گئی ہے جو حضرت امام بخاری ؒ کے تفقہ و قوت اجتہاد کی بین دلیل ہے۔
ہزار افسوس ان اہل جبہ و دستار پر جو حضرت امام بخاری ؒ جیسے فقیہ امت کی شان میں تنقیص کرتے اورآپ کی فہم و درایت سے منکر ہو کر خود اپنی نافہمی کا ثبوت دیتے ہیں۔
حافظ ابن حجر ؒ ان ابواب کے خاتمہ پر فرماتے ہیں:
اشْتَمَلَ كِتَابُ الِاسْتِقْرَاضِ وَمَا مَعَهُ مِنَ الْحَجْرِ وَالتَّفْلِيسِ وَمَا اتَّصَلَ بِهِ مِنَ الْإِشْخَاصِ وَالْمُلَازَمَةِ عَلَى خَمْسِينَ حَدِيثًا الْمُعَلَّقُ مِنْهَا سِتَّةٌ الْمُكَرَّرُ مِنْهَا فِيهِ وَفِيمَا مَضَى ثَمَانِيَةٌ وَثَلَاثُونَ حَدِيثًا وَالْبَقِيَّةُ خَالِصَةٌ وَافَقَهُ مُسْلِمٌ عَلَى جَمِيعِهَا سِوَى حَدِيثِ أَبِي هُرَيْرَةَ مَنْ أَخَذَ أَمْوَالَ النَّاسِ يُرِيدُ إِتْلَافَهَا وَحَدِيثِ مَا أُحِبُّ أَنَّ لِي أُحُدًا ذَهَبا وَحَدِيث لي الْوَاجِد وَحَدِيث بن مَسْعُودٍ فِي الِاخْتِلَافِ فِي الْقِرَاءَةِ وَفِيهِ مِنَ الْآثَارِ عَنِ الصَّحَابَةِ وَمَنْ بَعْدَهُمْ اثْنَا عَشَرَ أثرا وَالله أعلم (فتح الباري)
یعنی یہ کتاب الاستقراض و الملازمہ پچاس احادیث پر مشتمل ہے۔
جن میں احادیث معلقہ صرف چھ ہیں۔
مکرر احادیث اڑتیس ہیں اور باقی خاصل ہیں۔
امام مسلم نے بجز چند احادیث کے جویہاں مذکور ہیں سب میں حضرت امام بخاری ؒ سے موافقت کی ہے اور ان ابواب میں صحابہ و تابعین کے بارہ آثار مذکور ہوئے ہیں۔
سند میں مذکورہ بزرگ حضرت مسروق ابن الاجداع ہیں۔
جو ہمدانی اور کوفی ہیں۔
آنحضرت ﷺ کی وفات سے قبل مشرف بہ اسلام ہوئے۔
صحابہ کے صدر اول جیسے ابوبکر، عمر، عثمان، علی ؓ کا زمانہ پایا۔
سرکردہ علماءاور فقہاءمیں سے تھے۔
مرہ بن شرحبیل نے فرمایا کہ کسی ہمدانی عورت نے مسروق جیسا نیک سپوت نہیں جنا۔
شعبی نے فرمایا اگر کسی گھرانے کے لوگ جنت کے لیے پیدا کئے گئے ہیں تو یہ ہیں اسود، علقمہ اور مسروق محمد بن منتشر نے فرمایا کہ خالد بن عبداللہ بصرہ کے عامل (گورنر)
تھے۔
انہوں نے بطور ہدیہ تیس ہزار روپوں کی رقم حضرت مسروق کی خدمت میں پیش کی۔
یہ ان کے فقر کا زمانہ تھا۔
پھر بھی انہوں نے اسے قبول کرنے سے انکار کر دیا۔
کہا جاتا ہے کہ بچپن میں ان کو چرا لیا گیا تھا، پھر مل گئے تو ان کانام مسروق ہو گیا۔
ان سے بہت سے لوگوں نے روایت کی ہے۔
62ھ میں بمقام کوفہ وفات پائی۔
رحمه اللہ رحمة واسعة شہر کوفہ کی بنیاد حضرت سعد بن ابی وقاص ؒ نے رکھی تھی۔
اس وقت آپ نے وہاں فرمایا تھا:
تکوفوا في هذا الموضع یہاں پر جمع ہوجاؤ۔
اسی روز اس شہر کا نام کوفہ پڑ گیا۔
بعض نے اس کا کا پرانا نام کوفان بتایا ہے۔
یہ شہر عرا ق میں واقع ہے۔
عرصہ تک علوم و فنون کا مرکز رہا ہے۔

2425. حضرت خباب ؓ سے روایت ہے انھوں نے کہا: میں زمانہ جاہلیت میں لوہار تھا۔ عاص بن وائل کے ذمے میرے کچھ درہم تھے۔ میں اس کے پاس آیا اور اس سے اپنے قرض کا مطالبہ کیا تو اس نے کہا: میں اس وقت تک تمہارے پیسے نہیں دوں گا جب تک تم محمد(ﷺ) کا انکار نہیں کروگے۔ میں نے کہا: اللہ کی قسم!میں حضرت محمد ﷺ کا انکار نہیں کروں گا حتیٰ کہ اللہ تعالیٰ تجھے مارے اور پھر زندہ کرے۔ اس نے جواب دیا: تو پھر مجھے مارے اور پھر زندہ کرے۔ اس نے جواب دیا: تو پھر مجھے چھوڑ دو حتیٰ کہ میں مروں اور پھر اٹھایا جاؤں، اور مجھے مال واولاد ملے، تب میں تمہارا قرض ادا کردوں گا۔ وہ کہتے ہیں کہ یہ آیات اس سلسلے میں نازل ہوئیں: ”کیا آپ نے اس شخص کو دیکھا جس نے میری آیات کا انکار کیا اور کہا: میں وہاں مال واولاد دیا جاؤں گا۔۔۔ “ [صحيح بخاري، حديث نمبر:2425]

حدیث حاشیہ:
اس سے پہلے امام بخاری ؒ نے قرض کے متعلق ایک عنوان ان الفاظ میں قائم کیا تھا:
(باب حسن التقاضي)
”نرمی سے تقاضا کرنا“ اور اس مقام پر قرض کا مطالبہ کرنے کا عنوان قائم کیا ہے۔
عام طور پر یہ محاورہ ہے:
(القرض مقراض المحبة)
قرض، محبت کی قینچی ہے۔
کہا جاتا ہے کہ جس سے تعلقات خراب کرنا ہوں اسے قرض دے دیا جائے یا اس سے لے لیا جائے۔
شاید کوئی ان باتوں سے یہ تاثر لے کہ قرض دے کر واپسی کا مطالبہ کرنا اخلاق و مروت کے منافی ہے۔
امام بخاری ؒ نے ثابت کیا ہے کہ قرض خواہ کا حق ہے کہ قرض دار سے اس کی واپسی کا مطالبہ کرے، بلکہ اس کے پاس جا کر اسے احساس دلانے میں بھی کوئی حرج نہیں، چنانچہ حضرت خباب ؓ اپنی مزدوری کا مطالبہ کرنے کے لیے عاص بن وائل غیر مسلم کے ہاں تشریف لے گئے۔
یہ مزدوری گویا وائل کے ذمے قرض تھی۔
اس نے جو کردار ادا کیا وہ انتہائی نامعقول اور تکلیف دہ تھا، اللہ تعالیٰ نے قرآن مجید میں اس کا نوٹس لیا۔
الغرض قرض کی واپسی کا مطالبہ کرنا جائز اور درست ہے اور یہ اخلاقی روا داری کے منافی نہیں۔
واللہ أعلم