´شام میں رہنے کی فضیلت کا بیان۔`
عبداللہ بن عمرو رضی اللہ عنہما کہتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ”عنقریب ہجرت کے بعد ہجرت ہو گی تو زمین والوں میں بہتر وہ لوگ ہوں گے جو ابراہیم علیہ السلام کی ہجرت گاہ (شام) کو لازم پکڑیں گے، اور زمین میں ان کے بدترین لوگ رہ جائیں گے، ان کی سر زمین انہیں باہر پھینک دے گی ۱؎ اور اللہ کی ذات ان سے گھن کرے گی اور آگ انہیں بندروں اور سوروں کے ساتھ اکٹھا کرے گی ۲؎۔‏‏‏‏“ [سنن ابي داود/كتاب الجهاد /حدیث: 2482]

فوائد ومسائل:
جزیرۃ العرب کے شمال مغربی علاقہ کو شام سے تعبیر کیا جاتا ہے۔
جس میں آج کل لبنان اردن فلسطین اور سوریا (شام) کی ریاستیں قائم ہیں۔
اس کی وجہ تسمیہ یہ ہے کہ یہ علاقہ قبلہ سے بایئں جانب واقع ہے۔
یا بنو کنعان نے اس کی بایئں جانب کا رخ کیا تھا۔
یا یہ کہ اس میں زمین کے طبقات مختلف ہیں۔
اس میں سرخ سفید اور سیاہ ہر طرح کی زمین پائی جاتی ہے۔
اور اس مفہوم کے لئے شامات کا لفظ استعمال کرتے ہیں۔
(قاموس)