2924. حضرت عمیر بن اسودعنسی نے بیان کیا کہ وہ حضرت عبادہ بن صامت ؓ کی خدمت میں حاضر ہوئے، جبکہ ان کا قیام ساحل حمص پر ان کے اپنے ہی مکان میں تھا۔ اور(ان کی بیوی) حضرات ام حرام ؓبھی ان کے ساتھ تھیں۔ عمیر نے کہا: ہم سے حضرت ام حرام ؓنے بیان کیا کہ انھوں نے نبی کریم ﷺ کو یہ فرماتے سنا: ”میری امت میں سب سے پہلے جو لوگ بحری جنگ لڑیں گے، ان کے لیے جنت واجب ہے۔“ حضرت ام حرام کہتی ہیں کہ میں نے عرض کیا: اللہ کے رسول ﷺ! کیا میں انھی میں سے ہوں؟ آپ نے فرمایا: ”تم انھی میں سے ہو۔“ حضرت ام حرام ؓ کہتی ہیں کہ پھر نبی کریم ﷺ نے فرمایا: ”میری امت میں سب سے پہلے جو لوگ قیصر روم کے دارالحکومت (قسطنطنیہ) پر حملہ آور ہوں گے وہ مغفرت یافتہ ہیں۔“ میں نے عرض کیا: اللہ کے رسول ﷺ! میں بھی ان لوگوں میں سے ہوں؟ آپ نے فرمایا: ”نہیں!“ [صحيح بخاري، حديث نمبر:2924]

حدیث حاشیہ:
پہلا جہاد حضرت عثمان ؓکے زمانۂ میں (حضرت معاویہ ؓ کی قیادت میں)
۲۸ھ میں ہوا جس پر جزیرہ قبرص کے نصاریٰ پر چڑھائی کی گئی‘ اسی میں حضرت ام حرام ؓ شریک تھیں‘ واپسی میں یہ راستہ پر سواری سے گر کر شہید ہوگئیں۔
دوسرا جہاد ۵۵ھ میں بزمانہ حضرت معاویہ ؓ ہوا جس میں قسطنطنیہ پر حملہ کیا گیا تھا۔
حضرت ابو ایوب انصاری ؓ نے اسی میں شہادت پائی اور قسطنطنیہ ہی میں دفن کئے گئے۔
یہ لشکر یزید بن معاویہ کے زیر قیادت تھا۔
مگر خلافت حضرت معاویہ ؓ ہی کی تھی اس لئے اس سے یزید کی خلافت کی صحت پر دلیل پکڑنا غلط ہوا اور لشکر والوں کی بخشش کی جو بشارت دی گئی اس سے یہ لازم نہیں آتا کہ لشکر کا ہر ہر فرد بخشا جائے۔
خود آنحضرتﷺ کے ساتھ ایک آدمی خوب بہادری سے لڑا تھا۔
آپ نے اس کے بارے میں فرمایا کہ وہ دوزخی ہے پس بہشتی اور دوزخی ہونے میں خاتمہ کا اعتبار ہے۔
(وحیدی)
نوٹ:
یہاں علامہ وحید الزماں کو ایک زبردست غلط فہمی ہوئی ہے۔
اور نبیﷺ کی پیشین گوئی کی بے جا تاویل کر ڈالی ہے۔
حالانکہ نبی ﷺ کو کہی ہوئی بات حرف بحرف پوری ہوتی ہے۔
نبیﷺ کے ساتھ جو لشکر لڑ رہا تھا‘ ان سب کے جنتی ہونے کی پیشین گوئی آپ نے نہیں فرمائی تھی اور اس کے برعکس قسطنطنیہ کے سارے لشکریوں کے جنتی ہونے کی آپﷺ نے پیشین گوئی فرمائی ہے۔
اللہ تعالیٰ کی رحمتوں کو محدود کرنے کا اختیار کسی انسان کے پاس نہیں ہے۔
(محمود الحسن اسد)

2924. حضرت عمیر بن اسودعنسی نے بیان کیا کہ وہ حضرت عبادہ بن صامت ؓ کی خدمت میں حاضر ہوئے، جبکہ ان کا قیام ساحل حمص پر ان کے اپنے ہی مکان میں تھا۔ اور(ان کی بیوی) حضرات ام حرام ؓبھی ان کے ساتھ تھیں۔ عمیر نے کہا: ہم سے حضرت ام حرام ؓنے بیان کیا کہ انھوں نے نبی کریم ﷺ کو یہ فرماتے سنا: ”میری امت میں سب سے پہلے جو لوگ بحری جنگ لڑیں گے، ان کے لیے جنت واجب ہے۔“ حضرت ام حرام کہتی ہیں کہ میں نے عرض کیا: اللہ کے رسول ﷺ! کیا میں انھی میں سے ہوں؟ آپ نے فرمایا: ”تم انھی میں سے ہو۔“ حضرت ام حرام ؓ کہتی ہیں کہ پھر نبی کریم ﷺ نے فرمایا: ”میری امت میں سب سے پہلے جو لوگ قیصر روم کے دارالحکومت (قسطنطنیہ) پر حملہ آور ہوں گے وہ مغفرت یافتہ ہیں۔“ میں نے عرض کیا: اللہ کے رسول ﷺ! میں بھی ان لوگوں میں سے ہوں؟ آپ نے فرمایا: ”نہیں!“ [صحيح بخاري، حديث نمبر:2924]

حدیث حاشیہ:
1۔
پہلا جہاد حضرت عثمان ؓکے دور میں حضرت امیر معاویہ ؓکے زیر کمان تھا۔
انھوں نے بحری بیڑا تیار کیا اور 28ہجری میں جزیره قبرص کے عیسائیوں پر چڑھائی کی۔
اس میں اُم حرام ؓشریک تھیں۔
واپسی پر اپنی سواری سے گر کر شہید ہو گئیں۔
اس کی تفصیل گزشتہ احادیث میں دیکھی جا سکتی ہے دوسرا جہاد حضرت امیر معاویہ ؓ کے دور حکومت میں ہوا۔
یزید بن معاویہ کے زیر کمان روم کے دارالحکومت قسطنطنیہ پر مسلمانوں نے حملہ کیا۔
اس لشکر کے تمام سپاہی اللہ کے ہاں مغفرت یافتہ ہیں اور اسی لشکر میں حضرت ابن عباس ؓحضرت ابن عمر ؓ، حضرت ابو ایوب انصاری ؓ جیسے اکابر صحابہ شامل تھے۔
اس حملے میں حضرت ایوب انصاری ؓشہید ہوئے۔
انھوں نے شہادت کے وقت وصیت کی کہ انھیں قسطنطنیہ کے دروازے کے پاس دفن کیا جائے۔
چنانچہ ایسا ہی کیا گیا۔
2۔
حضرت محمود بن ربیع ؓ کے بیان کے مطابق اس لشکر کے سر براہ یزید بن معاویہ تھے۔
اور ان میں حضرت ابو ایوب انصاری ؓ بھی شامل تھے۔
(صحیح البخاري، التھجد، حدیث: 1186)
3۔
علامہ مہلب کہتے ہیں اس حدیث میں حضرت امیر معاویہ ؓ کی تعریف ہے کیونکہ انھوں نے سب سے پہلے سمندری جہاد کیا نیز ان کے بیٹے یزید بن معاویہ کی بھی تعریف ہے کیونکہ انھوں نے سب سے پہلے روم کے دارالحکومت قسطنطنیہ پر حملہ کیا۔
(فتح الباري: 125/6)
علامہ مہلب ؒکے بیان پر ابن تین اور ابن منیر کا تبصرہ محل نظر ہے۔
جس کی تفصیل آئندہ بیان ہو گی۔