´ سجدہ سے اٹھنا`
«. . . حَدَّثَنَا خَالِدُ بْنُ إِلْيَاسَ، عَنْ صَالِحٍ مَوْلَى التَّوْءَمَةِ، عَنْ أَبِي هُرَيْرَةَ، قَالَ: " كَانَ النَّبِيُّ صَلَّى اللَّهُ عَلَيْهِ وَسَلَّمَ يَنْهَضُ فِي الصَّلَاةِ عَلَى صُدُورِ قَدَمَيْهِ .»
”ابوہریرہ رضی الله عنہ کہتے ہیں کہ نبی اکرم صلی اللہ علیہ وسلم نماز میں اپنے دونوں قدموں کے سروں یعنی دونوں پیروں کی انگلیوں پر زور دے کر اٹھتے تھے۔“ [سنن ترمذي/كتاب الصلاة: 288]

تبصرہ:
اس کی سند میں، خالد بن ایاس راوی ہے، اس کے متعلق:
◈ امام احمد فرماتے ہیں۔ متروک الحدیث ہے۔
◈ امام ابن معین کا کہنا ہے کہ ہیچ محض ہے اس کی روایات لکھی ہی نہ جائیں،
◈امام ابو حاتم کا کہنا ہے کہ ضعیف الحدیث، منکر الحدیث ہے۔
◈ امام ابو زرعہ فرماتے ہیں کہ ضعیف و غیر قوی ہے۔
◈امام بخاری ارشاد فرماتے ہیں کہ منکر الحدیث اور ہیچ محض ہے،
◈ امام نسائی فرماتے ہیں کہ متروک الحدیث ہے دوسری بار فرمایا ثقہ نہیں اور اس کی مرویات لکھی ہی نہ جائیں۔
◈ امام ابن عدی فرماتے ہیں کہ اس کی تمام مرویات غرائب اور افراد ہیں باوجود ضعیف کے اس کی مرویات کو لکھا جائے،
◈ امام ترمذی، امام ابن شاہین، امام محمد بن عمار،امام ساجی، امام ابن مثنی نے ضعیف قرار دیا ہے۔
◈ امام ابن حبان فرماتے ہیں کہ ثقات سے موضوع اور من گھڑت روایات نقل کرتا ہے، اور دل اس طرف مائل ہوتا ہے کہ جان بوجھ کر روایات وضع کرتا تھا،
◈ امام حاکم فرماتے ہیں سعید المقبری وغیرہ سے موضوع روایات نقل کرتا ہے،
◈ ابن عبدالبر فرماتے ہیں کہ تمام محدثین کرام کے نزدیک ضعیف ہے۔ [تھذیب: ص 81 ج 3]
◈ حافظ ابن حجر اور علامہ البانی رحمها اللہ نے اس روایت کو ضعیف قرار دیا ہے۔ [فتح الباری: ص 231 ج 2، وارواء الغلیل ص 81 ج 1]

اردو حاشہ:
1؎:
جو لو گ جلسئہ استراحت کے قائل نہیں ہیں اور دونوں قدموں کے سروں پر زور دے کر بغیر بیٹھے کھڑے ہو جانے کو پسند کرتے ہیں انہوں نے اسی روایت سے استدلال کیا ہے،
لیکن یہ حدیث ضعیف ہے استدلال کے قابل نہیں۔

نوٹ:
(سند میں دو راوی خالد اور صالح مولیٰ التوامہ ضعیف ہیں)