´تثویب کا بیان۔`
مجاہد کہتے ہیں کہ میں ابن عمر رضی اللہ عنہما کے ساتھ تھا کہ ایک شخص نے ظہر یا عصر میں تثویب ۱؎ کی، تو ابن عمر رضی اللہ عنہما نے کہا: ہمیں یہاں سے لے چلو، اس لیے کہ یہ بدعت ہے۔ [سنن ابي داود/كتاب الصلاة /حدیث: 538]

538۔ اردو حاشیہ:
تثویب سے مراد ایک تو وہ کلمہ ہے جو فجر کی اذان میں کہا جاتا ہے۔ «الصلوة خير من النوم» یہ حق اور مسنون ہے۔ مگر یہاں اس سے مراد وہ اعلانات وغیرہ ہیں، جو اذان ہو جانے کے بعد لوگوں کو مسجد میں بلانے کے لئے کئے جاتے ہیں۔ اس مقصد کے لئے کچھ حیلہ بھی کیا جاتا ہے۔ مثلاً کہیں درود شریف پڑھا جاتا ہے اور کہیں تلاوت قرآن کی جاتی ہے اور کہیں صاف سیدھا اعلان بھی کیا جاتا ہے کہ جماعت میں اتنے منٹ باقی ہیں، تو ایسی کوئی بھی صورت جائز نہیں۔ مسلمانوں پر وا جب ہے کہ نماز کا وقت ہو جانے کے بعد بروقت نماز کے لئے حاضر ہوں۔ ہاں مسجد کی طرف راہ چلتے ہوئے کسی سوئے ہوئے کو جگانا یا غافل اور ست لوگوں کو متنبہ کر دینا کہ اٹھو نماز کے لئے چلو، بلاشبہ جائز اور مطلو ب ہے، یہ ممنوعہ تثویب میں شمار نہیں۔:
➊ حضرت ابن عمر رضی اللہ عنہما آخر میں نابینا ہو گئے تھے، اس لئے انہوں نے اپنے قائد سے کہا کہ مجھے یہاں سے لے چلو۔
2۔ صحابہ کرام رضوان اللہ عنہم ا جمعین بدعت اور بدعتیوں سے بہت نفرت کرتے تھے اور حضرت ابن عمر رضی اللہ عنہما کا اتباع سنت کا شوق مثالی تھا۔