حضرت سعید بن جبیر رضی اللہ عنہ سے روایت ہے، انہوں نے کہا کہ ”میں نے حضرت ابن عباس رضی اللہ عنہما سے عرض کیا: یہ سورۃ الحشر ہے، تو انہوں نے فرمایا: ”اسے سورہ نضیر کہو۔““ ہشام نے ابوبشر سے روایت کرنے میں ابوعوانہ کی متابعت کی ہے۔ [صحيح البخاري/كتاب المغازي/حدیث: 4029]

حضرت سعید بن جبیر رحمہ اللہ سے روایت ہے، انہوں نے کہا: ”میں نے حضرت ابن عباس رضی اللہ عنہما سے پوچھا: سورہ انفال کے متعلق آپ کی کیا رائے ہے؟ تو فرمایا: ”وہ غزوہ بدر کے متعلق نازل ہوئی“۔“ «الشَّوْكَةِ» کے معنی ہیں: ”تلوار کی دھار“۔ «مُرْدِفِينَ» کا مطلب ہے: ”ایک جماعت کے بعد دوسری جماعت“۔ «رَدَفَنِي» اور «أَرْدَفَنِي» دونوں کے معنی ایک ہیں، یعنی ”میرے بعد آیا“۔ «ذُوقُوا» کے معنی ہیں: ”عذاب برداشت کرو اور اس کا خود تجربہ کرو، اس سے مراد منہ سے چکھنا نہیں“۔ «فَيَرْكُمَهُ» کے معنی ہیں: ”اس کو جمع کر دے“۔ «شَرِّدْ»: ”متفرق اور منتشر کرنا“۔ «جَنَحُوا»: ”صلح و سلامتی طلب کریں“۔ «السَّلْمِ»، «السِّلْمِ» اور «السَّلَامِ» ان تینوں الفاظ کے ایک ہی معنی ہیں، یعنی ”امن و امان اور صلح و سلامتی“۔ «يُثْخِنَ» کے معنی ہیں: ”خون ریزی کر کے غلبہ پانا“۔ مجاہد رحمہ اللہ نے کہا: «مُكَاءً» کے معنی ہیں: ”اپنی انگلیوں کو منہ میں داخل کرنا“ اور «وَتَصْدِيَةً» کے معنی ہیں: ”سیٹی بجانا“۔ «لِيُثْبِتُوكَ» کے معنی ہیں: ”آپ کو قید کر لیں، آپ کو روک لیں“۔ [صحيح البخاري/كتاب المغازي/حدیث: 4645]

حضرت سعید بن جبیر رحمہ اللہ سے روایت ہے، انہوں نے کہا: میں نے حضرت ابن عباس رضی اللہ عنہما سے پوچھا: ”آپ سورہ توبہ کے متعلق کیا کہتے ہیں؟“ انہوں نے فرمایا: ”یہ سورہ توبہ تو رسوا کرنے والی ہے۔ اس سورت میں تو مسلسل یہی نازل ہوتا رہا کہ ان میں سے کچھ لوگ ایسے ہیں، ان میں سے کچھ لوگ ایسے ہیں، حتی کہ لوگوں کو گمان ہوا کہ یہ سورت کسی کا کچھ بھی نہیں چھوڑے گی بلکہ سب کے بھید کھول دے گی۔“ میں نے سورہ انفال کے متعلق دریافت کیا تو انہوں نے بتایا کہ ”یہ جنگ بدر کے متعلق نازل ہوئی تھی۔“ میں نے سورہ حشر کے متعلق عرض کیا تو انہوں نے فرمایا: ”یہ یہود کے قبیلہ بنو نضیر کے متعلق نازل ہوئی تھی۔“ [صحيح البخاري/كتاب المغازي/حدیث: 4882]

حضرت سعید بن جبیر رضی اللہ عنہ ہی سے روایت ہے، انہوں نے کہا: ”میں نے حضرت ابن عباس رضی اللہ عنہما سے سورہ حشر کے متعلق پوچھا تو انہوں نے کہا: ”اس سورت کو «سُورَةُ النَّضِيرِ» ”سورۃ النضیر“ کہا کرو۔““ [صحيح البخاري/كتاب المغازي/حدیث: 4883]