حضرت ثعلبہ بن مالک رضی اللہ عنہ سے روایت ہے کہ حضرت عمر بن خطاب رضی اللہ عنہ نے مدینہ طیبہ کی خواتین میں چادریں تقسیم کرائیں۔ ایک عمدہ قسم کی نفیس چادر بچ گئی تو ایک صاحب نے، جو وہیں موجود تھے، عرض کی: ”اے امیر المومنین! یہ چادر رسول اللہ صلی اللہ علیہ وسلم کی بیٹی (نواسی) کو دے دیں جو آپ کے نکاح میں ہیں۔“ اس کا اشارہ حضرت ام کلثوم بنت علی رضی اللہ عنہا کی طرف تھا، لیکن حضرت عمر بن خطاب رضی اللہ عنہ نے فرمایا: ”حضرت ام سلیط رضی اللہ عنہا اس چادر کی ان سے زیادہ حق دار ہیں۔“ ان کا تعلق قبیلہ انصار سے تھا اور انہوں نے رسول اللہ صلی اللہ علیہ وسلم سے بیعت بھی کی تھی۔ حضرت عمر بن خطاب رضی اللہ عنہ نے (یہ بھی) فرمایا: ”غزوہ اُحد میں وہ ہمارے لیے پانی کی مشکیں بھر بھر کر لاتی تھیں۔“ [صحيح البخاري/كتاب المغازي/حدیث: 4071]

حضرت ثعلبہ بن ابو مالک رضی اللہ عنہ سے روایت ہے، انہوں نے کہا کہ حضرت عمر بن خطاب رضی اللہ عنہ نے مدینہ طیبہ کی خواتین میں کچھ چادریں تقسیم کیں تو ایک بہترین نئی چادر بچ گئی۔ آپ کے قریبی حضرات نے کہا: امیر المؤمنین رضی اللہ عنہ! یہ چادر رسول اللہ صلی اللہ علیہ وسلم کی نواسی کو عنایت کر دیں جو آپ کے نکاح میں ہیں۔ ان کی مراد حضرت ام کلثوم بنت علی رضی اللہ عنہما تھیں۔ حضرت عمر رضی اللہ عنہ نے جواب دیا کہ حضرت ام سلیط رضی اللہ عنہا اس کی زیادہ حقدار ہیں۔ اور حضرت ام سلیط رضی اللہ عنہا ان انصاری عورتوں میں سے تھیں جنہوں نے رسول اللہ صلی اللہ علیہ وسلم سے بیعت کی تھی۔ حضرت عمر رضی اللہ عنہ نے فرمایا: یہ ام سلیط رضی اللہ عنہا جنگِ احد کے دن ہمارے لیے پانی کے مشکیزے اٹھا اٹھا کر لاتی تھیں۔ ابوعبداللہ (امام بخاری رحمہ اللہ) فرماتے ہیں کہ «تَزْفِرُ» کے معنی ہیں: وہ مشکیزوں کو سی کر لاتی تھیں۔ [صحيح البخاري/كتاب المغازي/حدیث: 2881]