حضرت عروہ سے روایت ہے، انہوں نے کہا: ”میری موجودگی میں حضرت اسامہ بن زید رضی اللہ عنہ سے پوچھا گیا کہ حجۃ الوداع کے موقع پر نبی صلی اللہ علیہ وسلم کی سواری کی رفتار کیسی تھی؟ انہوں نے بتایا کہ (عام طور پر) درمیانی رفتار تھی اور جب کشادہ راستہ مل جاتا تو اسے تیز چلاتے تھے۔“ [صحيح البخاري/كتاب المغازي/حدیث: 4413]

عروہ بن زبیر رحمہ اللہ سے روایت ہے، انہوں نے کہا کہ میری موجودگی میں اسامہ بن زید رضی اللہ عنہ سے دریافت کیا گیا کہ حجۃ الوداع میں عرفات سے واپسی کے وقت رسول اللہ صلی اللہ علیہ وسلم کی رفتار کیسی تھی؟ انہوں نے فرمایا کہ آپ صلی اللہ علیہ وسلم عام رفتار سے چلتے تھے اور جب میدان آجاتا تو تیز ہو جاتے۔ (راوی حدیث) ہشام رحمہ اللہ نے کہا: «النَّصُّ» اس تیز رفتاری کو کہتے ہیں جو عام رفتار سے زیادہ ہو۔ «فَجْوَةٍ» وسیع میدان کو کہتے ہیں۔ اس کی جمع «فَجَوَاتٌ» اور «فِجَاءٌ» ہے جیسا کہ «رَكْوَةٍ» کی جمع ( «رَكَوَاتٌ» اور) «رِكَاءٌ» ہے۔ «مَنَاصٍ» کے معنی ہیں: بھاگنے کا وقت نہیں رہا۔ [صحيح البخاري/كتاب المغازي/حدیث: 1666]

حضرت ہشام بن عروہ رحمہ اللہ سے روایت ہے، انہوں نے کہا: مجھے میرے باپ نے بتایا کہ حضرت اسامہ بن زید رضی اللہ عنہما سے نبی صلی اللہ علیہ وسلم کی حجۃ الوداع میں رفتار کے متعلق پوچھا گیا... یحییٰ کہتے ہیں کہ عروہ رحمہ اللہ نے کہا: میں یہ گفتگو سن رہا تھا (یحییٰ کہتے ہیں) لیکن مجھ سے یہ ساقط ہو گیا... تو انہوں نے جواب دیا کہ آپ صلی اللہ علیہ وسلم درمیانی چال سے چلتے تھے اور جب وسیع میدان پاتے تو اپنی سواری کو دوڑا دیتے۔ «نَصٌّ» ”اونٹ کی اس رفتار کو کہتے ہیں جو عام رفتار سے تیز ہوتی ہے“۔ [صحيح البخاري/كتاب المغازي/حدیث: 2999]