حضرت زید بن ارقم رضی اللہ عنہ سے روایت ہے، انہوں نے کہا: ”ہم نماز میں بات چیت کر لیا کرتے تھے۔ ہم میں سے کوئی بھی اپنے بھائی سے ضروری بات کر لیتا تھا حتیٰ کہ یہ آیت نازل ہوئی: ﴿حَافِظُوا عَلَى الصَّلَوَاتِ وَالصَّلَاةِ الْوُسْطَىٰ وَقُومُوا لِلَّهِ قَانِتِينَ﴾ [سورة البقرة: 238] ”تمام نمازوں کی حفاظت کرو خاص طور پر نمازِ وسطیٰ کا اہتمام کرو اور اللہ کے حضور خاموشی سے کھڑے ہوا کرو۔“ چنانچہ ہمیں اس آیت کے ذریعے سے دورانِ نماز میں چپ رہنے کا حکم دیا گیا۔“ [صحيح البخاري/كتاب تفسير القرآن/حدیث: 4534]

حضرت زید بن ارقم رضی اللہ عنہ سے روایت ہے کہ ہم نبی صلی اللہ علیہ وسلم کے عہد مبارک میں دورانِ نماز میں ایک دوسرے سے بات چیت کر لیتے تھے اور اپنی ضرورت و حاجت کو بھی ایک دوسرے سے بیان کر دیتے تھے حتی کہ یہ آیت نازل ہوئی: ﴿حَافِظُوا عَلَى الصَّلَوَاتِ﴾ [سورة البقرة: 238] ”تمام نمازوں (بالخصوص درمیانی نماز) کی حفاظت کرو۔“ اس کے بعد ہمیں خاموش رہنے کا حکم دیا گیا (اور دورانِ نماز میں گفتگو کرنے سے بھی ہمیں منع کر دیا گیا)۔ [صحيح البخاري/كتاب تفسير القرآن/حدیث: 1200]