حضرت عائشہ رضی اللہ عنہا سے روایت ہے کہ نبی صلی اللہ علیہ وسلم ان کے پاس تشریف لائے تو ان کے پاس ایک آدمی تھا، یہ دیکھ کر آپ صلی اللہ علیہ وسلم کا چہرہ متغیر سا ہو گیا، گویا آپ صلی اللہ علیہ وسلم نے اس کی موجودگی کو برا محسوس کیا۔ حضرت عائشہ رضی اللہ عنہا نے کہا: ”یہ میرا رضاعی بھائی ہے۔“ نبی صلی اللہ علیہ وسلم نے فرمایا: ”خوب غور کیا کرو کہ تمہارے بھائی کون ہیں؟ رضاعت تو بھوک سے ثابت ہوتی ہے۔“ [صحيح البخاري/كتاب النكاح/حدیث: 5102]

حضرت عائشہ رضی اللہ عنہا سے روایت ہے، انہوں نے فرمایا: نبی صلی اللہ علیہ وسلم میرے گھر تشریف لائے تو ایک شخص میرے پاس بیٹھا تھا۔ آپ صلی اللہ علیہ وسلم نے دریافت فرمایا: ”عائشہ رضی اللہ عنہا! یہ کون ہے؟“ میں نے عرض کیا: یہ میرا رضاعی بھائی ہے۔ آپ صلی اللہ علیہ وسلم نے فرمایا: ”عائشہ رضی اللہ عنہا! ذرا اپنے رضاعی بھائی کے بارے میں غور و فکر کر لیا کرو، کیونکہ اس رضاعت کا اعتبار ہے جس میں دودھ بھوک کی وجہ سے پیا جائے۔“ ابن مہدی نے سفیان سے روایت کرنے میں محمد بن کثیر کی متابعت کی ہے۔ [صحيح البخاري/كتاب النكاح/حدیث: 2647]