حضرت انس رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم کی خدمت میں اپنے نومولود بھائی کو لایا تاکہ آپ اسے گھٹی دیں۔ اس وقت رسول اللہ صلی اللہ علیہ وسلم اونٹوں کے باڑے میں تھے۔“ ہشام نے کہا: ”میرا خیال ہے کہ حضرت انس رضی اللہ عنہ نے کہا تھا کہ بکریوں کے کان داغ رہے تھے۔“ [صحيح البخاري/كتاب الذبائح والصيد/حدیث: 5542]

حضرت انس بن مالک رضی اللہ عنہ سے روایت ہے، انہوں نے فرمایا کہ میں ایک صبح حضرت ابو طلحہ رضی اللہ عنہ کے بیٹے عبداللہ رضی اللہ عنہما کو لے کر رسول اللہ صلی اللہ علیہ وسلم کی خدمت میں حاضر ہوا تاکہ آپ کچھ چبا کر اس کے منہ میں ڈال دیں تو میں نے آپ کو اس حالت میں پایا کہ آپ کے ہاتھ میں داغ دینے والا ایک آلہ تھا، آپ اس سے زکوٰۃ کے اونٹوں کو داغ رہے تھے۔ [صحيح البخاري/كتاب الذبائح والصيد/حدیث: 1502]