حضرت عبدالرحمن بن ابوبکر رضی اللہ عنہما سے روایت ہے، انہوں نے فرمایا: اصحابِ صفہ نادار لوگ تھے۔ نبی صلی اللہ علیہ وسلم نے (ان کے متعلق) فرمایا تھا: ”جس کے پاس دو آدمیوں کا کھانا ہے، وہ تیسرا آدمی ساتھ لے جائے اور اگر چار کا ہو تو پانچواں یا چھٹا (ان میں سے لے جائے)۔“ چنانچہ حضرت ابوبکر صدیق رضی اللہ عنہ اپنے ساتھ تین آدمی لے کر گئے اور خود نبی صلی اللہ علیہ وسلم نے اپنے ہمراہ دس آدمیوں کو لیا۔ حضرت عبدالرحمن رضی اللہ عنہما نے کہا کہ گھر میں اس وقت میں اور میرے والدین (حضرت ابوبکر رضی اللہ عنہ اور ام رومان رضی اللہ عنہا) تھے۔ راوی کہتا ہے کہ مجھے یاد نہیں کہ آپ نے یہ کہا یا نہیں کہ گھر میں میری اہلیہ اور خادم بھی تھا جو میرے اور میرے والد گرامی کے گھر میں مشترکہ طور پر کام کرتا تھا۔ الغرض حضرت ابوبکر صدیق رضی اللہ عنہ نے نبی صلی اللہ علیہ وسلم کے ہاں رات کا کھانا کھا لیا اور تھوڑی دیر کے لیے وہاں ٹھہر گئے، پھر عشاء کی نماز پڑھ لی گئی، لوٹ کر پھر تھوڑی دیر ٹھہرے، یہاں تک کہ نبی صلی اللہ علیہ وسلم نے رات کا کھانا تناول فرمایا۔ اس کے بعد آپ کافی رات گئے اپنے گھر واپس آئے تو ان کی بیوی (رضی اللہ عنہا) نے کہا: تم اپنے مہمانوں یا مہمان کو چھوڑ کر کہاں اٹک گئے تھے؟ وہ بولے: کیا تم نے انہیں کھانا نہیں کھلایا؟ انہوں نے بتایا کہ آپ کے آنے تک مہمانوں نے کھانا کھانے سے انکار کر دیا تھا۔ کھانا پیش کیا گیا لیکن وہ نہ مانے۔ حضرت عبدالرحمن رضی اللہ عنہما کہتے ہیں: میں تو (مارے خوف کے) کہیں چھپ گیا۔ حضرت ابوبکر رضی اللہ عنہ نے کہا: اے غنثر! آپ نے بہت سخت سست کہا اور خوب کوسا، پھر مہمانوں سے گویا ہوئے: کھاؤ تمہیں خوشگوار نہ ہو، اور کہا: اللہ کی قسم! میں ہرگز نہ کھاؤں گا۔ (حضرت عبدالرحمن رضی اللہ عنہما کہتے ہیں:) اللہ کی قسم! ہم جب لقمہ لیتے تو نیچے سے زیادہ بڑھ جاتا تاآنکہ سب مہمان سیر ہو گئے اور جس قدر کھانا پہلے تھا اس سے کہیں زیادہ بچ گیا۔ حضرت ابوبکر صدیق رضی اللہ عنہ نے جب کھانا دیکھا کہ وہ ویسے ہی بلکہ اس سے بھی زیادہ ہے تو انہوں نے اپنی اہلیہ (رضی اللہ عنہا) سے فرمایا: اے قبیلہ بنو فراس کی بہن! یہ کیا ماجرا ہے؟ انہوں نے عرض کیا: اے میری آنکھوں کی ٹھنڈک! یہ کھانا اس وقت پہلے سے تین گنا ہے بلکہ اس سے بھی زیادہ۔ پھر اس میں سے حضرت ابوبکر رضی اللہ عنہ نے کچھ تناول فرمایا اور کہا کہ ان کی یہ قسم شیطان ہی کی طرف سے تھی۔ پھر ایک لقمہ اس سے (مزید) کھایا اور باقی ماندہ کھانا نبی صلی اللہ علیہ وسلم کے پاس اٹھا کر لے گئے اور وہ صبح تک آپ صلی اللہ علیہ وسلم کے پاس پڑا رہا۔ (حضرت عبدالرحمن رضی اللہ عنہما نے کہا:) ہمارے اور ایک گروہ کے درمیان کچھ عہد تھا جس کی مدت گزر چکی تھی تو ہم نے بارہ آدمی علیحدہ کر دیے۔ ان میں سے ہر ایک کے ساتھ کچھ آدمی تھے۔ یہ تو اللہ ہی جانتا ہے کہ ہر شخص کے ساتھ کتنے آدمی تھے۔ ان سب نے اس میں سے کھانا، یا جیسے حضرت عبدالرحمن رضی اللہ عنہما نے کہا۔ [صحيح البخاري/كتاب مواقيت الصلاة/حدیث: 602]

حضرت عبدالرحمان بن ابوبکر رضی اللہ عنہما سے روایت ہے کہ اصحابِ صفہ بہت نادار اور مفلس لوگ تھے۔ نبی کریم صلی اللہ علیہ وسلم نے ایک دن فرمایا: ”جس کے پاس دو آدمیوں کا کھانا ہو وہ تیسرے آدمی کو ساتھ لے جائے اور جس کے پاس چار آدمیوں کا کھانا ہو وہ پانچویں، چھٹے کو ساتھ لے جائے۔“ یا اسی طرح آپ صلی اللہ علیہ وسلم نے کچھ فرمایا۔ حضرت ابوبکر رضی اللہ عنہ اپنے ساتھ تین مہمان لے آئے جبکہ نبی کریم صلی اللہ علیہ وسلم اپنے ساتھ دس مہمانوں کو لے کر گئے۔ بہرحال حضرت ابوبکر رضی اللہ عنہ گھر کے افراد سے تین آدمی زائد لائے تھے کیونکہ گھر میں میں (عبدالرحمان)، میرا باپ اور میری والدہ وغیرہ تھے۔ (راوی کہتا ہے کہ) مجھے یاد نہیں کہ انہوں نے (عبدالرحمان رضی اللہ عنہما نے) بیوی بھی کہا تھا یا نہیں۔ ایک خادم جو میرے اور حضرت ابوبکر رضی اللہ عنہ کے گھر میں کام کرتا تھا۔ حضرت ابوبکر رضی اللہ عنہ نے شام کا کھانا نبی کریم صلی اللہ علیہ وسلم کے ساتھ کھایا، پھر کچھ وقت وہاں ٹھہرے اور نمازِ عشاء وہیں ادا کی، حتیٰ کہ رسول اللہ صلی اللہ علیہ وسلم نے شام کا کھانا تناول فرمایا۔ حضرت ابوبکر رضی اللہ عنہ جب کافی رات گزرنے کے بعد گھر تشریف لائے تو ان کی بیوی نے کہا: آپ کو مہمانوں کا خیال نہ رہا تھا، کیا بات تھی؟ (حضرت ابوبکر رضی اللہ عنہ نے) فرمایا: ”کیا آپ نے مہمانوں کو ابھی تک کھانا نہیں کھلایا؟“ بیوی نے عرض کیا: مہمانوں نے آپ کے آنے تک کھانا کھانے سے انکار کر دیا تھا، ہم نے ان کے سامنے کھانا پیش کیا لیکن وہ نہیں مانے۔ عبدالرحمان رضی اللہ عنہما کہتے ہیں کہ میں تو وہاں سے (خوف کی وجہ سے) کسی دوسری جگہ چھپ گیا۔ حضرت ابوبکر رضی اللہ عنہ نے (غصے میں آکر) کہا: اے کم عقل! اور مجھے بہت بُرا بھلا کہا، پھر مہمانوں سے کہا: ”کھانا کھاؤ۔“ (اور قسم کھا کر کہا) ”میں تو اس کھانے کو کبھی نہیں کھاؤں گا۔“ حضرت عبدالرحمان رضی اللہ عنہما بیان کرتے ہیں: اللہ کی قسم! ہم اس کھانے سے جو لقمہ بھی اٹھاتے تھے وہ نیچے سے بڑھ کر پہلے سے زیادہ ہو جاتا تھا حتیٰ کہ سب لوگوں نے خوب شکم سیر ہو کر کھایا لیکن کھانا پہلے سے بھی زیادہ بچ گیا۔ حضرت ابوبکر رضی اللہ عنہ نے بغور ملاحظہ کیا تو کھانا جوں کا توں یا پہلے سے بھی زیادہ تھا۔ انہوں نے اپنی بیوی سے کہا: اے بنو فراس کی بہن! یہ کیا معاملہ ہے؟ انہوں نے کہا: میری آنکھ کی ٹھنڈک! یہ تو پہلے سے تین گنا زیادہ ہے۔ تاہم حضرت ابوبکر رضی اللہ عنہ نے اس میں سے کھایا اور فرمایا کہ میری وہ قسم شیطان کی طرف سے تھی۔ پھر انہوں نے دوبارہ اس میں سے کئی لقمے تناول فرمائے۔ بعد ازاں اسے اٹھا کر نبی کریم صلی اللہ علیہ وسلم کی خدمت میں لے گئے جو صبح کے وقت تک آپ صلی اللہ علیہ وسلم کے پاس رہا۔ اتفاق سے ہمارے اور دیگر لوگوں کے درمیان ایک معاہدہ تھا۔ میعاد ختم ہونے پر وہ لوگ آئے۔ ہم نے ان میں سے بارہ نمائندوں کا انتخاب کیا اور ہر نمائندے کے ساتھ کئی کئی آدمی تھے۔ اللہ ہی بہتر جانتا ہے کہ ان کی تعداد کتنی تھی۔ بہرحال آپ صلی اللہ علیہ وسلم نے یہ کھانا ان کے پاس بھیجا اور تمام لوگوں نے اس میں سے کھانا کھایا، یا عبدالرحمان رضی اللہ عنہما نے کچھ ایسا ہی کہا۔ [صحيح البخاري/كتاب مواقيت الصلاة/حدیث: 3581]

حضرت عبدالرحمن بن ابی بکر رضی اللہ عنہ سے روایت ہے کہ حضرت ابوبکر صدیق رضی اللہ عنہ نے چند لوگوں کو مہمان بنایا اور عبدالرحمن سے کہا: ”ان مہمانوں کا پوری طرح خیال رکھنا کیونکہ میں نبی صلی اللہ علیہ وسلم کی خدمت میں جا رہا ہوں، میرے آنے سے پہلے پہلے انہیں کھانا کھلا دینا۔“ چنانچہ حضرت عبدالرحمن رضی اللہ عنہ گئے اور جو کھانا حاضر تھا وہ مہمانوں کے سامنے پیش کر دیا اور کہا: ”کھانا تناول فرمائیں۔“ مہمانوں نے کہا: ”صاحب خانہ کہاں ہیں؟“ عبدالرحمن رضی اللہ عنہ نے کہا: ”آپ کھانا کھائیں۔“ انہوں نے کہا: ”جب تک صاحب خانہ نہ آ جائیں ہم کھانا نہیں کھائیں گے۔“ حضرت عبدالرحمن رضی اللہ عنہ نے کہا: ”آپ ہماری درخواست قبول کریں کیونکہ حضرت ابوبکر صدیق رضی اللہ عنہ کے واپس آنے تک اگر آپ حضرات کھانے سے فارغ نہ ہوئے تو مجھے ان کی طرف سے خفگی کا سامنا کرنا پڑے گا۔“ انہوں نے کھانے سے انکار ہی کیا۔ میں جانتا تھا کہ حضرت ابوبکر صدیق رضی اللہ عنہ مجھ پر ناراض ہوں گے اس لیے جب وہ تشریف لائے تو میں ایک طرف ہو گیا۔ انہوں نے پوچھا: ”تم لوگوں نے کیا کیا ہے؟“ گھر والوں نے انہیں صورت حال سے آگاہ کیا تو انہوں نے ”عبدالرحمن“ کہہ کر آواز دی۔ میں خاموش رہا۔ پھر انہوں نے فرمایا: ”اے جاہل! میں تمہیں قسم دیتا ہوں کہ اگر تو میری آواز سنتا ہے تو میرے پاس آ جا۔“ چنانچہ میں باہر نکلا اور (مہمانوں نے) کہا: ”عبدالرحمن سچ کہہ رہا ہے، وہ کھانا ہمارے پاس لایا تھا۔“ آخر کار انہوں نے فرمایا: ”تم نے صرف میرے انتظار میں کھانا لیٹ کیا، اللہ کی قسم! میں آج رات کھانا نہیں کھاؤں گا۔“ مہمانوں نے بھی قسم اٹھائی: «وَاللّٰهِ» ”اللہ کی قسم! جب تک آپ نہیں کھائیں گے ہم بھی نہیں کھائیں گے۔“ حضرت ابوبکر صدیق رضی اللہ عنہ نے کہا: ”میں نے آج رات جیسی تکلیف دہ رات نہیں دیکھی، مہمانو! افسوس ہے تم لوگ ہماری میزبانی سے کیوں انکار کرتے ہو؟ اے عبدالرحمن! کھانا لاؤ۔“ چنانچہ وہ کھانا لائے تو آپ نے اس پر ہاتھ رکھ کر کہا: «بِسْمِ اللّٰهِ» ”اللہ کے نام سے (شروع کرتا ہوں)، پہلی حالت شیطان کی طرف سے تھی۔“ پھر انہوں نے کھانا کھایا تو مہمانوں نے بھی (ان کے ساتھ) تناول کیا۔ [صحيح البخاري/كتاب مواقيت الصلاة/حدیث: 6140]

حضرت عبدالرحمن بن ابی بکر رضی اللہ عنہ سے روایت ہے کہ حضرت ابوبکر صدیق رضی اللہ عنہ ایک یا کئی مہمان لے کر گھر آئے، پھر آپ شام ہی سے نبی صلی اللہ علیہ وسلم کی خدمت میں چلے گئے۔ جب وہ لوٹ کر آئے تو ان سے میری والدہ نے کہا: ”آج مہمانوں کو چھوڑ کر آپ کہاں رہ گئے تھے؟“ حضرت ابوبکر صدیق رضی اللہ عنہ نے پوچھا: ”کیا تم نے کھانا پیش کیا تھا؟“ لیکن انہوں نے کھانے سے انکار کر دیا۔ حضرت ابوبکر صدیق رضی اللہ عنہ کو یہ سن کر بہت غصہ آیا اور اہل خانہ کو برا بھلا کہا، پھر قسم اٹھائی کہ وہ کھانا نہیں کھائیں گے۔ عبدالرحمن رضی اللہ عنہ کہتے ہیں کہ میں تو (مارے ڈر کے) چھپ گیا۔ حضرت ابوبکر صدیق رضی اللہ عنہ نے آواز دی: ”اے جاہل! (تو کدھر ہے؟)“ میری والدہ نے بھی قسم اٹھالی کہ ”اگر آپ کھانا نہیں کھائیں گے تو وہ بھی نہیں کھائے گی۔“ ادھر مہمانوں نے بھی قسم اٹھالی کہ ”جب تک حضرت ابوبکر صدیق رضی اللہ عنہ کھانا نہیں کھائیں گے وہ (مہمان) بھی نہیں کھائیں گے۔“ آخر ابوبکر رضی اللہ عنہ نے فرمایا: ”یہ غصہ اور برہمی شیطان کی طرف سے تھی۔“ پھر آپ نے کھانا منگوایا، خود بھی کھایا اور مہمانوں کو بھی کھلایا۔ اس دوران میں جب وہ لقمہ اٹھاتے تو نیچے سے کھانا اور بڑھ جاتا۔ حضرت ابوبکر رضی اللہ عنہ نے یہ منظر دیکھ کر کہا: ”اے قبیلہ بنو فراس کی بہن! یہ کیا ہو رہا ہے؟“ انہوں نے کہا: ”میری آنکھوں کی ٹھنڈک! بلاشبہ اب تو یہ اس سے بھی زیادہ ہو چکا ہے جتنا یہ ہمارے کھانے سے پہلے تھا،“ پھر ان سب نے کھایا اور بچا ہوا کھانا نبی صلی اللہ علیہ وسلم کی خدمت میں بھیج دیا۔ انہوں نے ذکر کیا کہ آپ صلی اللہ علیہ وسلم نے بھی اس کھانے میں سے کھایا۔ [صحيح البخاري/كتاب مواقيت الصلاة/حدیث: 6141]