سیدنا علی بن ابی طالب رضی اللہ عنہ سے مروی ہے کہ ”ایک انصاری نے ان کی اور سیدنا عبدالرحمٰن بن عوف رضی اللہ عنہ کی دعوت کی اور انہیں شراب پلائی اور یہ واقعہ حرمت شراب سے پہلے کا ہے۔ چنانچہ سیدنا علی رضی اللہ عنہ نے ان کی نماز مغرب میں امامت کرائی اور سورۃ الکافرون کی قراءت کرنے لگے مگر وہ ان پر غلط ہو گئی۔ چنانچہ یہ حکم نازل ہوا: ﴿لَا تَقْرَبُوا الصَّلَاةَ وَأَنْتُمْ سُكَارَى حَتَّى تَعْلَمُوا مَا تَقُولُونَ﴾ [سورة النساء: 43] ”نشے کی حالت میں نماز کے قریب مت جاؤ، حتیٰ کہ جاننے لگو کہ تم کیا کہہ رہے ہو۔“” [سنن ابي داود/كتاب الأشربة /حدیث: 3671]

سیدنا عمر بن خطاب رضی اللہ عنہ کے متعلق آتا ہے کہ جب شراب کی حرمت نازل ہوئی تو سیدنا عمر رضی اللہ عنہ نے کہا: ”اے اللہ! شراب کے بارے میں ہمیں صاف صاف حکم بیان فرما دے۔“ چنانچہ سورہ البقرہ کی یہ آیت نازل ہوئی: ﴿يَسْأَلُونَكَ عَنِ الْخَمْرِ وَالْمَيْسِرِ قُلْ فِيهِمَا إِثْمٌ كَبِيرٌ﴾ [سورة البقرة: 219] ”(اے نبی!) لوگ آپ سے خمر (شراب) اور جوئے کے متعلق دریافت کرتے ہیں، تو کہہ دیجیے کہ ان دونوں میں بہت بڑا گناہ ہے (اور لوگوں کے لیے (کچھ) فائدہ بھی ہے، لیکن ان دونوں کا گناہ ان کے فائدے سے بہت زیادہ ہے)۔“ پھر سیدنا عمر رضی اللہ عنہ کو بلایا گیا اور انہیں یہ آیت سنائی گئی۔ انہوں نے کہا: ”اے اللہ! ہمیں خمر کے بارے میں صاف صاف حکم بیان فرما دے۔“ چنانچہ سورہ النساء کی یہ آیت نازل ہوئی: ﴿يَا أَيُّهَا الَّذِينَ آمَنُوا لَا تَقْرَبُوا الصَّلَاةَ وَأَنْتُمْ سُكَارَى﴾ [سورة النساء: 43] ”اے ایمان والو! تم اس وقت نماز کے قریب نہ جاؤ جب تم نشے میں ہو۔“ چنانچہ رسول اللہ صلی اللہ علیہ وسلم کا منادی نماز کی اقامت کے وقت اعلان کیا کرتا تھا: ”خبردار! کوئی شخص نشے کی حالت میں نماز کے قریب نہ آئے۔“ سیدنا عمر رضی اللہ عنہ کے سامنے یہ آیت پڑھی گئی تو انہوں نے کہا: ”اے اللہ! ہمیں شراب کے بارے میں صاف صاف حکم بیان فرما دے۔“ چنانچہ سورہ المائدہ کی یہ آیت نازل ہوئی: ﴿فَهَلْ أَنْتُمْ مُنْتَهُونَ﴾ [سورة المائدة: 91] ”(یقیناً خمر حرام ہے اور شیطانی اعمال میں سے ہے) کیا تم ان سے باز آتے ہو؟“ تو سیدنا عمر رضی اللہ عنہ نے کہا: ”پھر ہم باز آ گئے۔“ [سنن ابي داود/كتاب الأشربة /حدیث: 3670]

سیدنا انس بن مالک رضی اللہ عنہ بیان کرتے ہیں کہ نبی کریم صلی اللہ علیہ وسلم نے (ایک دعا میں) فرمایا: ” «اللَّهُمَّ إِنِّي أَعُوذُ بِكَ مِنَ الْبُخْلِ وَالْهَرَمِ» ”اے اللہ! میں بخیلی اور عاجز کر دینے والے بڑھاپے سے تیری پناہ چاہتا ہوں۔“” [سنن ابي داود/كتاب الأشربة /حدیث: 3972]