کہا جو تمھارا رب اور تمھارے پہلے باپ دادا کا رب ہے۔[26]
تفسیر عبدالرحمٰن کیلانی
26۔ موسیٰ نے کہا: ”ہاں وہی تمہارا اور تمہارے آباء و اجداد [19] کا پروردگار ہے“
[19] درباریوں کے کوئی جواب دینے سے پہلے ہی موسیٰؑ نے بھرے دربار میں پھر فرعون کو مخاطب ہو کر کہا: تم یہ سمجھے بیٹھے ہو کہ ملک بھر کے وسائل معاش کو اپنے قبضہ میں کر لینے کے بعد تم ہی اپنی رعایا کے پروردگار بن گئے ہو۔ میں اس پروردگار کی بات کر رہا ہوں جس کا تمام تر وسائل پر براہ راست کنٹرول ہے۔ اگر وہ ایک سال یا چند سال بارش ہی نہ برسائے تو تم رعیت تو درکنار اپنی خوراک تک کے لئے ترس جاؤ گے۔ رب العالمین وہ ہے جو خود تمہیں اور تمہارے سب آباء و اجداد کو رزق دیتا رہا ہے اور وہی تمہارا حقیقی پروردگار ہے۔ میں اس رب العالمین کا رسول ہوں۔
