حدیث نمبر: 451 --- ‏‏‏‏ سیدنا ابوہریرہ ؓ سے روایت ہے ، کچھ لوگوں نے رسول اللہ ﷺ سے کہا : کیا ہم اپنے پروردگار کو دیکھیں گے قیامت کے روز ۔ رسول اللہ ﷺ نے فرمایا : ”کیا تم ایک دوسرے کو تکلیف دیتے ہو ؟ چودھویں رات کا چاند دیکھنے میں ؟ (یعنی ازدحام اور ہجوم کی وجہ سے) یا تم کو کچھ تکلیف ہوتی ہے ، چودھویں رات کے چاند دیکھنے میں ؟ “ لوگوں نے کہا : نہیں یا رسول اللہ ! آپ ﷺ نے فرمایا : ”بھلا تم کو کچھ مشقت ہوتی ہے یا ایک دوسرے کو صدمہ پہنچاتے ہو سورج کے دیکھنے میں جس وقت کہ بادل نہ ہو ؟ “ (اور آسمان صاف ہو) لوگوں نے کہا : نہیں ۔ آپ ﷺ نے فرمایا : ”پھر اسی طرح (یعنی بغیر تکلیف اور مشقت اور زحمت اور ازدحام کے) تم اپنے پروردگار کو دیکھو گے حق تعالیٰ لوگوں کو قیامت کے دن جمع کرے گا ۔ تو فرما دے گا جو کوئی جس کو پوجتا تھا اس کے ساتھ ہو جائے پھر جو شخص آفتاب کو پوجتا تھا وہ سورج کے ساتھ ہو گا اور جو چاند کو پوجتا تھا وہ چاند کے ساتھ اور جو طاغوت کو پوجتا تھا وہ طاغوت کے ساتھ اور یہ امت محمدیہ ﷺ باقی رہ جائے گی اس میں منافق لوگ بھی ہوں گے ، پھر اللہ تعالیٰ ان کے پاس آئے گا ایسی صورت میں جس کو وہ نہ پہچانیں گے اور کہے گا : میں تمہارا پروردگار ہوں وہ کہیں گے : اللہ کی پناہ مانگتے ہیں ہم تجھ سے اور ہم اسی جگہ ٹھہرے ہیں یہاں تک کہ ہمارا پروردگار آئے گا تو ہم اس کو پہچان لیں گے ، پھر اللہ تعالیٰ ان کے پاس آئے گا اور کہے گا : میں تمہارا رب ہوں ۔ وہ کہیں گے : تو ہمارا رب ہے ، پھر اس کے ساتھ ہو جائیں گے اور دوزخ کی پشت پر پل رکھا جائے گا ۔ تو میں اور میری امت سب سے پہلے پار ہوں گے اور سوائے پیغمبروں کے اور کوئی اس دن بات نہ کر سکے گا اور پیغمبروں کا بول اس وقت یہ ہو گا ۔ « اللَّہُمَّ سَلِّمْ سَلِّمْ » یا اللہ ! بچائیو (یہ شفقت کی راہ سے کہیں گے اور خلق پر) اور دوزخ میں آنکڑے ہیں (لوہے کے جن کا سر ٹیڑھا ہوتا ہے اور تنور میں گوشت جب ڈالتے ہیں تو آنکڑوں میں لگا کر ڈالتے ہیں) جیسے سعدان کے کانٹے ۔ “ (سعدان ایک جھاڑ ہے کانٹوں دار) آپ ﷺ نے فرمایا صحابہ ؓ سے ، تم نے سعدان کو دیکھا ہے ؟ انہوں نے کہا : ہاں دیکھا ہے یا رسول اللہ ! آپ ﷺ نے فرمایا : ”پس وہ آنکڑے سعدان کے کانٹوں کی وضع پر ہوں گے ۔ (یعنی سرخم) پر یہ کوئی نہیں جانتا سوائے اللہ کے کہ وہ آنکڑے کتنے بڑے بڑے ہوں گے ، وہ لوگوں کو دو...

حدیث نمبر: 6025 --- ‏‏‏‏ سیدنا انس بن مالک ؓ سے روایت ہے ، رسول اللہ ﷺ نے فرمایا : رات کو میرا ایک لڑکا پیدا ہوا جس کا نام میں نے اپنے باپ ابراہیم کا نام رکھا ، پھر آپ نے وہ لڑکا ام سیف کو دیا جو لوہار کی عورت تھی اور لوہار کا نام ابوسیف تھا ۔ آپ ایک روز چلے ابوسیف کے پاس ، میں بھی آپ کے ساتھ گیا ۔ جب ابوسیف کے گھر پر پہنچے تو وہ اپنی دھونکنی پھونک رہا تھا اور سارا گھر دھویں سے بھر گیا تھا میں دوڑ کر آپ کے آگے گیا اور میں نے کہا : اے ابوسیف ! ذرا ٹھہر جا ، رسول اللہ ﷺ تشریف لائے وہ ٹھہر گیا ۔ آپ نے بچے کو بلایا اور اپنے سے چمٹا لیا اور جو اللہ کو منظور تھا وہ فرمایا ۔ سیدنا انس ؓ نے کہا میں نے اس بچےکو دیکھا وہ اپنا دم چھوڑ رہا تھا ۔ رسول اللہ ﷺ کے سامنے یہ دیکھ کر آپ کی آنکھوں سے آنسو نکلے اور فرمایا آنکھ روتی ہے اور دل رنج کرتا ہے لیکن زبان سے ہم کچھ نہیں کہتے سوا اس کے جو اللہ تعالیٰ کو پسند ہے (یعنی اس کی تعریف کرتے ہیں اور صبر کی دعا مانگتے ہیں) قسم اللہ کی ، اے ابراہیم ! ہم تیرے سبب سے رنج میں ہیں ۔

حدیث نمبر: 5881 --- ‏‏‏‏ سیدنا ابوسعید خدری ؓ سے روایت ہے ، رسول اللہ ﷺ نے فرمایا : ”بنی اسرائیل کی قوم میں ٹھگنی عورت تھی چلا کرتی تھی دو لمبی عورتوں کے ساتھ ، سو اس نے لکڑی کی دو جوتیاں ؟ بنا کر پہنیں اور سونے کی خول دار انگوٹھی بنائی جو بند ہوتی تھی ، اس میں مشک بھری اور وہ تو بڑی عمدہ خوشبو ہے پھر چلی ، ان دونوں عورتوں کے بیچ میں تو لوگوں نے اس کو نہ پہچانا ۔ اس نے اپنے ہاتھ سے یوں اشارہ کیا ، شعبہ سے جو اس حدیث کی راوی ہے اپنا ہاتھ جھاڑ کر اس عورت کے اشارہ کو بتلایا ۔

حدیث نمبر: 4387 --- ‏‏‏‏ سیدنا علقمہ بن وائل ؓ سے روایت ہے ان کے باپ نے کہا : میں رسول اللہ ﷺ کے پاس بیٹھا ہوا تھا ۔ اتنے میں ایک شخص آیا دوسرے کو کھینچتا ہوا تسمہ سے اور کہنے لگا : اس نے میرے بھائی کو مار ڈالا ہے رسول اللہ ﷺ نے فرمایا : ”کیا تو نے اس کو قتل کر دیا ہے ؟ “ بولا : اگر یہ اقرار نہ کرتا تو میں اس پر گواہ لاتا تب وہ شخص بولا : بیشک میں نے اس کو قتل کیا ہے ۔ آپ ﷺ نے فرمایا : ”تو نے کیونکر قتل کیا ؟ “ وہ بولا : میں اور وہ دونوں درخت کے پتے جھاڑ رہے تھے اتنے میں اس نے مجھے گالی دی مجھے غصہ آیا میں نے کلہاڑی اس کے سر پر ماری وہ مر گیا رسول اللہ ﷺ نے فرمایا : ”تیرے پاس کچھ مال ہے جو اپنی جان کے بدلے میں دے ؟ “ وہ بولا : میرے پاس کچھ نہیں سوا اس کملی اور کلھاڑی کے ۔ آپ ﷺ نے فرمایا : ”تیری قوم کے لوگ تجھے چھڑائیں گے ؟ “ اس نے کہا : میری اتنی قدر نہیں ہے ان کے پاس ، تب وہ تسمہ مقتول کے وارث کی طرف پھینک دیا وہ لے کر چلا جب پیٹھ موڑی تو آپ ﷺ نے فرمایا : ”اگر وہ اس کو قتل کرے گا تو اس کے برابر ہی رہے گا ۔ “ (یعنی نہ اس کو کوئی درجہ ملے گا نہ اس کو کوئی مرتبہ حاصل ہو گا ۔ کیونکہ اس نے اپنا حق دنیا ہی میں وصول کر لیا) یہ سن کر وہ لوٹا اور کہنے لگا : یا رسول اللہ ! مجھے خبر پہنچی کہ آپ ﷺ نے فرمایا : ”اگر میں اس کو قتل کروں گا تو اس کے برابر ہوں گا اور میں نے تو اس کو آپ ﷺ کے حکم سے پکڑا ہے ۔ “ آپ ﷺ نے فرمایا : ”تو یہ نہیں چاہتا کہ وہ تیرا اور تیرے بھائی کا گناہ سمیٹ لے ۔ “ وہ بولا : ایسا ہو گا ۔ آپ ﷺ نے فرمایا : ”ہاں ۔ “ اس نے کہا : اگر ایسا ہے تو خیر اور اس کا تسمہ پھینک دیا اور اس کو چھوڑ دیا ۔ “

حدیث نمبر: 2305 --- ‏‏‏‏ سیدنا ابوذر ؓ نے کہا کہ میں نکلا ایک رات اور دیکھا کہ رسول اللہ ﷺ اکیلے جا رہے تھے ۔ کوئی آپ ﷺ کے ساتھ نہیں ، تو میں سمجھا کہ آپ ﷺ کو منظور ہے کہ کوئی ساتھ نہ آئے (ورنہ صحابہ کب آپ ﷺ کو اکیلا چھوڑتے تھے) تو میں یہ سمجھ کر چاندنی کے سایہ میں چلنے لگا (تاکہ آپ ان کو نہ دیکھیں) تو آپ ﷺ نے میری طرف مڑ کر دیکھا اور فرمایا : ”یہ کون ہے ؟ “ میں نے عرض کی ابوذر اللہ مجھ کو آپ پر فدا کرے ۔ آپ ﷺ نے فرمایا : ”ابوذر آؤ ! “ پھر آپ ﷺ کے ساتھ میں چلا ، تھوڑی دیر اور آپ ﷺ نے فرمایا : ”جو لوگ دنیا میں بہت مال والے ہیں وہ کم درجہ والے ہیں قیامت کے دن مگر جسے اللہ تعالیٰ مال دے اور وہ پھونک پر اڑا دے دائیں اور بائیں اور آگے اور پیچھے اور کرے اس مال سے بہت خوبیاں ۔ “ پھر انہوں نے کہا : میں آپ ﷺ کے ساتھ تھوڑی دیر ٹہلتا رہا پھر آپ ﷺ نے فرمایا : ”یہاں بیٹھو ۔ “ (اور مجھے ایک صاف زمین پر بٹھا دیا کہ اس کے گرد کالے پتھر تھے) اور مجھ سے فرمایا : ”تم یہیں بیٹھے رہو جب تک میں لوٹ کر آؤں ۔ “ اور آپ ﷺ چلے گئے ان پتھروں میں یہاں تک کہ میں آپ ﷺ کو نہ دیکھتا تھا اور وہاں بہت دیر تک ٹھہرے رہے ، پھر میں نے سنا کہ آپ ﷺ کہتے چلے آ رہے تھے کہ ”اگر چوری کرے اور زنا کرے ؟ “ پھر آئے تو مجھ سے صبر نہ ہو سکا اور میں نے کہا : اے اللہ کے نبی ! اللہ مجھے آپ پر فدا کرے (سبحان اللہ ! یہ کمال محبت کا فقرہ ہے کہ صحابہ ؓ کے زباں زد رہتا تھا) کون تھا ان کالے پتھروں میں ؟ میں نے تو کسی کو نہ دیکھا جو آپ ﷺ کو جواب دیتا آپ ﷺ نے فرمایا : ”جبرائیل علیہ السلام تھے کہ وہ میرے آگے آئے ان پتھروں میں اور فرمایا : بشارت دو اپنی امت کو کہ جو مرا اور اس نے اللہ کے ساتھ کسی چیز کو شریک نہ کیا تو وہ جنت میں داخل ہو گا ۔ میں نے کہا : ”اے جبرائیل ! اگرچہ وہ چوری کرے اور زنا کرے ؟ “ انہوں نے کہا : ہاں ۔ میں نے دوبارہ پھر کہا : ”اگرچہ وہ چوری کرے اور زنا کرے ؟ “ انہوں نے کہا : ہاں ۔ میں نے تیسری بار پھر کہا : ”اگرچہ وہ چوری اور زنا کرے ؟ “ انہوں نے کہا : ہاں اگرچہ وہ شراب بھی پیئے ۔ “

حدیث نمبر: 1500 --- ‏‏‏‏ سیدنا انس بن مالک ؓ نے کہا کہ رسول اللہ ﷺ اخلاق میں سب سے اچھے تھے ۔ اور کبھی آپ ﷺ کو نماز کا وقت آ جاتا اور آپ ﷺ ہمارے گھر میں ہوتے تو حکم کرتے ہمارے بچھونے کو جو آپ ﷺ کے نیچے ہوتا کہ اس کو جھاڑ دیتے ، پھر پانی چھڑک دیتے ، پھر رسول اللہ ﷺ امامت فرماتے اور ہم لوگ آپ ﷺ کے پیچھے کھڑے ہو جاتے اور آپ ﷺ ہمارے ساتھ نماز پڑھتے اور ان کا بچھونا کھجور کے پتوں کا تھا ۔

حدیث نمبر: 469 --- ‏‏‏‏ ابوالزبیر نے سنا سیدنا جابر بن عبداللہ انصاری ؓ سے ۔ ان سے پوچھا گیا : لوگوں کے آنے کا حال قیامت کے دن ۔ انہوں نے کہا ۔ ہم آئیں گے قیامت کے دن اس طرح سے دیکھ یعنی یہ اوپر سب آدمیوں کے ، پھر بلائی جائیں گی امتیں اپنے اپنے بتوں اور معبودوں کے ساتھ پہلی امت پھر دوسری امت بعد اس کے ہمارا پروردگار آئے گا اور فرمائے گا : تم کس کو دیکھ رہے ہو ؟ (یعنی امت محمدی ﷺ سے مخاطب ہو کر ارشاد فرمائے گا ۔) وہ کہیں گے : ہم اپنے پروردگار کو دیکھ رہے ہیں (یعنی اس کے منتظر ہیں) پروردگار فرمائے گا : میں تمہارا مالک ہوں وہ کہیں گے : ہم تجھ کو دیکھیں (تو معلوم ہو) پھر دکھائی دے گا پروردگار ان کو ہنستا ہوا اور ان کے ساتھ چلے گا ۔ اور لوگ سب اس کے پیچھے ہوں گے اور ہر ایک آدمی کو خواہ وہ منافق ہو یا مؤمن ایک نور ملے گا لوگ اس کے ساتھ ہوں گے اور جہنم کے پل پر آنکڑے اور کانٹے ہوں گے ۔ وہ پکڑ لیں گے جن کو اللہ چاہے گا ۔ بعد اس کے منافقوں کا نور بجھ جائے گا اور مؤمن نجات پائیں گے ۔ تو پہلا گروہ مؤمنوں کا ان کے منہ چودھویں رات کے چاند کے سے ہوں گے ، ستر ہزار آدمیوں کا ہو گا ۔ جس سے نہ حساب ہو گا ، نہ کتاب ان کے بعد کے گروہ خوب چمکتے تارے کی طرح ہوں گے ۔ پھر ان کے بعد کا ان سے اتر کر یہاں تک کہ شفاعت کا وقت آئے گا اور لوگ شفاعت کریں گے ۔ اور جہنم سے نکالا جائے گا ۔ وہ شخص بھی جس نے « لا الہٰ الا اللہ » کہا تھا اور اس کے دل میں ایک جو برابر نیکی اور بہتری تھی ۔ یہ لوگ جنت کے آنگن میں ڈال ديئے جائیں گے اور جنتی لوگ ان پر پانی چھڑکیں گے ۔ وہ اس طرح پنپیں گے جیسے جھاڑ پانی کے بہاؤ میں پنپتا ہے اور ان کی سوزش اور جلن بالکل جاتی رہے گی ۔ پھر وہ سوال کریں گے اللہ سے اور ہر ایک کو اتنا ملے گا جیسے ساری دنیا بلکہ دس دنیا کے برابر ۔

حدیث نمبر: 7416 --- ‏‏‏‏ سیدنا ابوہریرہ ؓ سے روایت ہے ، رسول اللہ ﷺ نے فرمایا : ”آدمی کے بدن میں ایک ہڈی ہے جس کو زمین نہیں کھاتی ۔ اسی سے جوڑا جائے گا قیامت کے دن ۔ “ لوگوں نے عرض کیا : وہ کون سی ہڈی ہے یا رسول اللہ ! آپ ﷺ نے فرمایا : ”ڈھڈی کی ۔ “