حدیث نمبر: 7373 --- ‏‏‏‏ سیدنا نواس بن سمعان ؓ سے روایت ہے ، رسول اللہ ﷺ نے ایک دن صبح کو دجال کا ذکر کیا تو کبھی اس کو گھٹایا اور کبھی بڑھایا (یعنی کبھی اس کی تحقیر کی اور کبھی اس کے فتنہ کو بڑا کہا یا کبھی بلند آواز سے گفتگو کی اور کبھی پست آواز سے) یہاں تک کہ ہم نے گمان کیا کہ دجال ان درختوں کے جھنڈ میں آ گیا ۔ جب ہم پھر آپ ﷺ کے پاس شام کو آ گئے تو آپ ﷺ نے ہمارے چہروں پر اس کا اثر معلوم کیا (یعنی ڈر اور خوف) ۔ آپ ﷺ نے فرمایا : ” تمہارا کیا حال ہے ؟ “ ہم نے عرض کیا یا رسول اللہ ! آپ نے دجال کا ذکر کیا اور اس کو گھٹایا اور بڑھایا یہاں تک کہ ہم کو گمان ہو گیا کہ دجال ان درختوں میں کھجور کے جھنڈ میں موجود ہے (یعنی اس کا آنا بہت قریب ہے) ۔ رسول اللہ ﷺ نے فرمایا : ” مجھ کو دجال کے سوا اور باتوں کا خوف تم پر زیادہ ہے (فتنوں کا ، آپس میں لڑائیوں کا) اگر دجال نکلا اور میں تم لوگوں میں موجود ہوا تو تم سے پہلے میں اس کو الزام دوں گا اور تم کو اس کے شر سے بچاؤں گا اور اگر وہ نکلا اور میں تم لوگوں میں موجود نہ ہوا تو ہر مرد مسلمان اپنی طرف سے اس کو الزام دے گا اور حق تعالیٰ میرا خلیفہ اور نگہبان ہے ہر مسلمان پر ۔ البتہ دجال تو جوان گھونگریالے بالوں والا ہے ، اس کی آنکھ میں ٹینٹ ہے گویا کہ میں اس کی مشابہت دیتا ہوں عبدالعزیٰ بن قطن کے ساتھ (عبدالعزیٰ ایک کافر تھا) ۔ سو جو شخص تم میں سے دجال کو پائے اس کو چاہیے کہ سورۂ کہف کے شروع کی آیتیں اس پر پڑھے ۔ مقرر وہ نکلے گا شام اور عراق کی راہ سے تو خرابی ڈالے گا داہنے اور فساد اٹھائے گا بائیں ۔ اے اللہ کے بندو ! ایمان پر قائم رہنا ۔ “ اصحاب بولے : یا رسول اللہ ! وہ زمین پر کتنی مدت رہے گا ؟ آپ ﷺ نے فرمایا : ” چالیس دن تک ۔ ایک دن ان میں سے ایک سال کے برابر ہو گا اور دوسرا ایک مہینے کے اور تیسرا ایک ہفتے کے اور باقی دن جیسے یہ تمہارے دن ہیں ۔ “ (تو ہمارے دنوں کے حساب سے دجال ایک برس دو مہینے چودہ دن تک رہے گا) ۔ اصحاب نے عرض کیا : یا رسول اللہ ! جو دن سال بھر کے برابر ہو گا اس دن ہم کو ایک ہی دن کی نماز کفایت کرے گی ؟ آپ ﷺ نے فرمایا : ” نہیں تم اندازہ کر لینا اس دن میں بقدر اس کے یعنی جتنی دیر کے بعد ان دنوں میں نماز پڑھتے ہو اسی طرح اس دن بھی اندازہ کر کے پڑھ لینا .“ (اب تو گھڑیاں بھی موجود ہیں ان سے وقت کا اندازہ بخوبی ہو...

حدیث نمبر: 7375 --- ‏‏‏‏ سیدنا ابوسعید خدری ؓ سے روایت ہے ، حدیث بیان کی ہم سے رسول اللہ ﷺ نے ایک لمبی حدیث دجال کے ذکر میں تو یہ بھی بیان کیا کہ اس پر حرام ہو گا مدینہ کی گھاٹی میں گھسنا اور آئے گا وہ ایک پتھریلی زمین پر مدینہ کے قریب ۔ پھر جائے گا اس کے پاس ایک شخص جو سب لوگوں میں بہتر ہو گا ۔ وہ کہے گا میں گواہی دیتا ہوں کہ تو دجال ہے جس کا ذکر رسول اللہ ﷺ نے اپنی حدیث میں کیا ہے ۔ دجال لوگوں سے کہے گا : بھلا اگر میں اس کو مار ڈالوں بھر جلا دوں تو تم کو کچھ شک رہے گا اس باب میں ؟ وہ کہیں گے نہیں ۔ دجال اس شخص کو قتل کرے گا پھر اس کو جلائے گا وہ کہے گا : اللہ کی قسم ! مجھے پہلے اتنا یقین نہ تھا تیرے باب میں جتنا اب ہے (یعنی اب تو یقین ہو گیا کہ تو دجال ہے) پھر دجال اس کو قتل کرنا چاہے گا لیکن قتل نہ کر سکے گا ۔ “

حدیث نمبر: 7350 --- ‏‏‏‏ سیدنا ابوسعید خدری ؓ سے روایت ہے ، ہم حج کو یا عمرہ کو نکلے اور ہمارے ساتھ ابن صائد تھا ۔ ایک منزل میں ہم اترے ، لوگ ادھر ادھر چلے گئے اور میں اور ابن صائد دونوں رہ گئے ، مجھے اس سے سخت وحشت ہوئی اس وجہ سے کہ لوگ اس کے باب میں جو کہا کرتے تھے (کہ دجال ہے) ۔ ابن صیاد اپنا اسباب لے کر آیا اور میرے اسباب کے ساتھ رکھ دیا (مجھے اور زیادہ وحشت ہوئی) ۔ میں نے کہا : گرمی بہت ہے اگر تو اپنا اسباب اس درخت کے نیچے رکھے تو بہتر ہے ۔ اس نے ایسا ہی کیا ، پھر بکریاں ہم کو دکھلائی دیں ۔ ابن صائد گیا اور دودھ لے کر آیا اور کہنے لگا : ابوسعید دودھ پی ۔ میں نے کہا : گرمی بہت ہے اور دودھ گرم ہے اور کوئی وجہ نہ تھی کہ میں دودھ نہ پیوں ۔ صرف یہی کہ برا معلوم ہوا اس کے ہاتھ سے پینا ۔ ابن صائد نے کہا : اے ابوسعید ! میں نے قصد کیا ہے کہ ایک رسی لوں اور درخت میں لٹکا کر اپنے تئیں پھانسی دے لوں ان باتوں کی وجہ سے جو لوگ میرے حق میں کہتے ہیں ۔ اے ابوسعید ! رسول اللہ ﷺ کی حدیث اتنی کس سے پوشیدہ ہے جتنی تم انصار کے لوگوں سے پوشیدہ ہے ؟ کیا تم سب لوگوں سے زیادہ رسول اللہ ﷺ کی حدیث کو نہیں جانتے ؟ کیا آپ ﷺ نے یہ نہیں فرمایا : ” دجال کافر ہو گا ۔ “ میں تو مسلمان ہوں ؟ کیا آپ ﷺ نے یہ نہیں فرمایا : ”کہ دجال لاولد ہو گا ۔ “ اور میری اولاد مدینہ میں موجود ہے ۔ کیا آپ ﷺ نے یہ نہیں فرمایا : ”دجال مدینہ اور مکہ میں نہ جائے گا ۔ “ اور میں مدینہ سے آ رہا ہوں اور مکہ کو جا رہا ہوں ۔ ابوسعید نے کہا : (اس نے ایسی باتیں کیں کہ) میں قریب تھا کہ اس کا طرف دار بن جاؤں (اور لوگوں کا کہنا اس کے باب میں غلط سمجھوں) ، پھر کہنے لگا : البتہ اللہ کی قسم ! میں دجال کو پہچانتا ہوں اور اس کے پیدائش کا مقام جانتا ہوں اور یہ بھی جانتا ہوں کہ اب وہ کہاں ہے ۔ میں نے اس سے کہا : خرابی ہو تیرے سارے دن پر ۔ (یعنی یہ تو نے کیا کہا پھر مجھے تیری نسبت شبہ ہو گیا) ۔

حدیث نمبر: 426 --- ‏‏‏‏ سیدنا عبداللہ بن عمر ؓ سے روایت ہے ، رسول اللہ ﷺ نے ایک دن لوگوں کے بیچ میں مسیح دجال کا ذکر کیا تو فرمایا : ”اللہ جل شانہ کانا نہیں ہے اور مسیح دجال کانا ہے داہنی آنکھ کا ، اس کی کانی آنکھ جیسے پھولا ہوا انگور“ (پس یہی ایک کھلی نشانی ہے اس بات کی کہ وہ مردود جھوٹا ہے خدائی کے دعوے میں) ، آپ ﷺ نے فرمایا : ”ایک رات خواب میں میں نے اپنے آپ کو کعبہ کے پاس دیکھا ایک شخص گیہوں رنگ جیسے بہت اچھا کوئی گیہوں رنگ کا آدمی اس کے پٹھے مونڈھوں تک تھے اور بالوں میں کنگھی کی ہوئی تھی سر میں سے پانی ٹپک رہا تھا اور اپنے دونوں ہاتھ دو آدمیوں کے مونڈھوں پر رکھے ہوئے طواف کر رہا تھا خانہ کعبہ کا ، میں نے پوچھا : یہ شخص کون ہے ؟ لوگوں نے کہا : یہ مسیح ہیں مریم علیہا السلام کے بیٹے اور ان کے پیچھے میں نے اور ایک شخص کو دیکھا جو سخت گھونگر بال والا داہنی آنکھ کا کانا تھا میں نے جو لوگ دیکھے ہیں ان سب میں ابن قطن اس سے زیادہ مشابہ ہے وہ بھی اپنے دونوں ہاتھ دو آدمیوں کے مونڈھوں پر رکھے طواف کر رہا تھا میں نے پوچھا : یہ کون ہے ؟ لوگوں نے کہا : یہ مسیح دجال ہے ۔ “

حدیث نمبر: 7278 --- ‏‏‏‏ سیدنا ابوہریرہ ؓ سے روایت ہے ، رسول اللہ ﷺ نے فرمایا : ” قیامت نہ قائم ہو گی یہاں تک کہ روم کے نصاریٰ کا لشکر اعماق میں یا دابق میں اترے گا (یہ دونوں مقام شام میں ہیں حلب کے قریب) پھر مدینہ میں ایک لشکر نکلے گا ان کی طرف جو ان دنوں تمام زمین والوں میں بہتر ہو گا ۔ جب صف باندھیں گے دونوں لشکر تو نصاریٰ کہیں گے : تم لوگ الگ ہو جاؤ ان لوگوں سے (یعنی ان مسلمانوں سے) جنہوں نے ہماری جورو لڑکے پکڑے اور لونڈی غلام بنائے ہم ان سے لڑیں گے ۔ مسلمان کہیں گے : نہیں اللہ کی قسم ! ہم کبھی اپنے بھائیوں سے الگ نہ ہوں گے ۔ پھر لڑائی ہو گی تو مسلمانوں کا ایک تہائی لشکر بھاگ نکلے گا ان کی توبہ کبھی اللہ تعالیٰ قبول نہ کرے گا اور تہائی لشکر مارا جائے گا وہ سب شہیدوں میں افضل ہوں گے ۔ اللہ کے پاس اور تہائی لشکر کی فتح ہو گی ۔ وہ عمر بھر کبھی فتنے اور بلا میں نہ پڑیں گے ۔ پھر قسطنطینیہ کو فتح کریں گے (جو نصاریٰ کے قبضہ میں آ گیا ہو گا ۔ اب تک یہ شہر مسلمانوں کے قبضہ میں ہے) تو وہ لوٹ کے مالوں کو بانٹ رہے ہوں گے اور اپنی تلواروں کو زیتون کے درختوں میں لٹکا دیا ہو گا ، اتنے میں شیطان آواز کر دے گا کہ دجال تمہارے پیچھے تمہارے بال بچوں میں آ پڑا تو مسلمان وہاں سے نکلیں گے حالانکہ یہ خبر جھوٹ ہو گی ۔ جب شام کے ملک میں پہنچیں گے تب دجال نکلے گا سو جس وقت مسلمان لڑائی کے لیے مستعد ہو کر صفیں باندھتے ہوں گے نماز کی تیاری ہو گی ۔ اسی وقت عیسٰی بن مریم علیہ السلام اتریں گے اور امام بن کر نماز پڑھائیں گے پھر جب اللہ کا دشمن دجال عیسیٰ علیہ السلام کو دیکھے گا تو اس طرح (ڈر سے) گھل جائے گا جیسے نمک پانی میں گھل جاتا ہے اور جو عیسیٰ علیہ السلام اس کو یونہی چھوڑ دیں تب بھی وہ خود بخود گل کر ہلاک ہو جائے لیکن اللہ تعالیٰ اس کو قتل کرے گا ۔ عیسٰی علیہ السلام کے ہاتھوں پر اور اس کا خون لوگوں کو دکھلائے گا عیسیٰ علیہ السلام کی برچھی میں ۔ “

حدیث نمبر: 7386 --- ‏‏‏‏ سیدنا عامر بن شراحیل ؓ سے روایت ہے ، انہوں نے کہا : فاطمہ بنت قیس ؓ سے ، جو بہن تھیں ضحاک بن قیس ؓ کی اور ان عورتوں میں سے تھیں جنہوں نے پہلے ہجرت کی تھی کہ بیان کرو مجھ سے ایک حدیث جو تم نے سنی ہو رسول اللہ ﷺ سے اور مت واسطہ کرنا اس میں اور کسی کا ، وہ بولیں : اچھا اگر تم یہ چاہتے ہو تو میں بیان کروں گی ۔ انہوں نے کہا : ہاں بیان کرو ۔ فاطمہ نے کہا : میں نے نکاح کیا ابن مغیرہ سے اور وہ قریش کے عمدہ جوانوں میں سے تھے ان دنوں ، پھر وہ شہید ہوئے پہلے ہی جہاد میں رسول اللہ ﷺ کے ساتھ ۔ جب میں بیوہ ہو گئی تو مجھ کو پیام بھیجا عبدالرحمٰن بن عوف ؓ اور کئی اصحاب نے رسول اللہ ﷺ کے اور رسول اللہ ﷺ نے بھی پیام بھیجا اپنے مولیٰ اسامہ بن زید ؓ کے لیے اور میں یہ حدیث سن چکی تھی کہ رسول اللہ ﷺ نے فرمایا : ”جو شخص مجھ سے محبت رکھے اس کو چاہیے کہ اسامہ سے بھی محبت رکھے ۔ “ جب رسول اللہ ﷺ نے مجھ سے اس باب میں گفتگو کی تو میں نے کہا : میرے کام کا اختیار آپ کو ہے ۔ آپ ﷺ جس سے چاہیں نکاح کر دیجئیے آپ ﷺ نے فرمایا : ” ام شریک کے گھر اٹھ جاؤ ۔ “ اور ام شریک ایک عورت تھی مالدار انصار میں بہت خرچنے والی اللہ کی راہ میں ۔ اس کے پاس مہمان اترتے تھے ۔ میں نے عرض کیا : بہت اچھا ۔ میں ام شریک کے پاس اٹھ جاؤں گی ۔ پھر آپ ﷺ نے فرمایا : ” ام شریک کے پاس مت جا اس کے پاس مہمان بہت آتے ہیں اور مجھے برا معلوم ہوتا ہے کہیں تیری اوڑھنی گر جائے یا تیری پنڈلیوں پر سے کپڑا ہٹ جائے اور لوگ تیرے بدن میں سے وہ دیکھیں جو تجھ کو برا لگے لیکن چلی جا اپنے چچا کے بیٹے عبداللہ بن عمرو بن ام مکتوم کے پاس ۔ “ اور وہ ایک شخص تھا بنی فہر میں سے اور فہر قریش کی ایک شاخ ہے اور وہ اس قبیلہ میں سے تھا جس میں سے فاطمہ بھی تھی ۔ پھر فاطمہ نے کہا : میں ان کے گھر میں چلی گئی ۔ جب میری عدت گزر گئی تو میں نے پکارنے والے کی آواز سنی وہ پکارنے والا منادی تھا رسول اللہ ﷺ کا ، پکارتا تھا نماز کے لیے جمع ہو جاؤ ۔ میں بھی مسجد کی طرف نکلی اور میں نے رسول اللہ ﷺ کے ساتھ نماز پڑھی ۔ میں اس صف میں تھی جس میں عورتیں تھیں لوگوں کے پیچھے ۔ جب آپ ﷺ نے نماز پڑھ لی تو منبر پر بیٹھے اور آپ ﷺ ہنس رہے تھے ۔ آپ ﷺ نے فرمایا : ” ہر ایک آدمی اپنی نماز کی جگہ پر رہے ۔ “ پھر فرمایا : ” تم جانتے ہو میں نے تم کو کیوں اکھٹا کی...

حدیث نمبر: 7367 --- ‏‏‏‏ سیدنا حذیفہ ؓ سے روایت ہے ، رسول اللہ ﷺ نے فرمایا : ” میں خوب جانتا ہوں دجال کے ساتھ کیا ہو گا ۔ اس کے ساتھ دو نہریں ہوں گی بہتی ہوئیں ایک تو دیکھنے میں سفید پانی معلوم ہو گی اور دوسری دیکھنے میں بھڑکتی ہوئی آگ معلوم ہو گی ، پھر جو کوئی یہ موقع پائے وہ اس نہر میں چلا جائے جو دیکھنے میں آگ معلوم ہوتی ہو اور اپنی آنکھ بند کر لے اور سر جھکا کر اس میں سے پئیے وہ ٹھنڈا پانی ہو گا اور دجال کی ایک آنکھ بالکل چٹ ہو گی ۔ اس پر ایک پھلی ہو گی موٹی اور اس کی دونوں آنکھوں کے بیچ میں کافر لکھا ہو گا جس کو ہر مؤمن پڑھ لے گا خواہ لکھنا جانتا ہو یا نہ جانتا ہو ۔ “

حدیث نمبر: 7378 --- ‏‏‏‏ سیدنا مغیرہ بن شعبہ ؓ سے روایت ہے ، رسول اللہ ﷺ سے کسی نے دجال کا حال اتنا نہیں پوچھا ، جتنا میں نے پوچھا ۔ آپ ﷺ نے فرمایا : ” تو کیوں فکر کرتا ہے ، دجال تجھ کو نقصان نہ پہنچائے گا ۔ “ میں نے کہا : یا رسول اللہ ! لوگ کہتے ہیں اس کے ساتھ کھانا ہو گا ، نہریں ہوں گی ۔ آپ ﷺ نے فرمایا : ”ہو گا پر اللہ تعالیٰ کے نزدیک وہ ذلیل ہے یعنی جو اس کے پاس ہو گا اس سے وہ مؤمنوں کو گمراہ نہ کر سکے گا ۔ “ (یہ حدیث کا حاصل ہے اور یہ حدیث اوپر گزر چکی ہے) ۔

حدیث نمبر: 7388 --- ‏‏‏‏ سیدہ فاطمہ بنت قیس ؓ سے روایت ہے ، رسول اللہ ﷺ کے پاس تمیم داری آئے اور آپ ﷺ کو خبر دی کہ جو سمندر میں سوار ہوئے تھے ان کا جہاز راہ سے ہٹ گیا اور ایک جزیرہ سے جا لگا ۔ وہ اس کے اندر گئے پانی کی تلاش میں ۔ وہاں ایک آدمی دیکھا جو اپنے بال کھینچ رہا تھا اور بیان کیا سارا قصہ حدیث کا ۔ پھر کہا کہ دجال نے کہا : اگر مجھ کو اجازت ملتی نکلنے کی تو میں سب شہروں میں ہو آتا سوائے طیبہ کے ۔ پھر رسول اللہ ﷺ نے تمیم کو لوگوں کے سامنے نکالا ۔ اس نے سارا قصہ بیان کیا ۔ آپ ﷺ نے فرمایا : ”طیبہ یہی ہے اور دجال وہی شخص ہے ۔ “

حدیث نمبر: 7284 --- ‏‏‏‏ سیدنا نافع بن عتبہ ؓ سے روایت ہے ، ہم رسول اللہ ﷺ کے ساتھ تھے ایک جہاد میں ، تو آپ ﷺ کے پاس کچھ لوگ مغرب کی طرف سے آئے جو بالوں کے کپڑے پہنے تھے اور رسول اللہ ﷺ سے ملے ایک ٹیلے کے پاس ، وہ لوگ کھڑے تھے اور آپ ﷺ بیٹھے تھے میرے دل نے کہا : تو چلا جا اور ان لوگوں کے اوپر آپ ﷺ کے بیچ میں کھڑا رہ ۔ ایسا نہ ہو کہ یہ لوگ فریب سے آپ ﷺ کو مار ڈالیں ۔ پھر میرے دل نے کہا : شاید آپ ﷺ چپکے سے کچھ باتیں ان سے کرتے ہوں (اور میرا جانا آپ ﷺ کو ناگوار گزرے) . پھر میں گیا اور ان لوگوں کے اور آپ ﷺ کے بیچ میں کھڑا ہو گیا ، میں نے اس وقت آپ ﷺ سے چار باتیں یاد کیں ، جن کو آپ ﷺ نے میرے ہاتھ پر گنا ۔ آپ ﷺ نے فرمایا : ” : پہلے تم عرب کے جزیرہ میں (کافروں سے) جہاد کرو گے ، اللہ اس کو فتح کر دے گا ، پھر فارس سے جہاد کرو گے ، اللہ تعالیٰ اس کو بھی فتح کر دے گا ۔ پھر نصاریٰ سے لڑو گے روم والوں سے ، اللہ تعالیٰ روم کو بھی فتح کر دے گا ۔ پھر دجال سے لڑو گے اللہ تعالیٰ اس کو بھی فتح کر دے گا ۔ “ (یہ حدیث آپ ﷺ کا بڑا معجزہ ہے) نافع نے کہا : اے جابر بن عمرو ! ہم سمجھتے ہیں دجال اس کے بعد نکلے گا جب روم کا ملک فتح ہو جائے گا ۔