حدیث نمبر: 7370 --- ‏‏‏‏ ربعی بن حراش نے کہا : میں عقبہ بن عمرو ابومسعود انصاری ؓ کے ساتھ سیدنا حذیفہ بن الیمان ؓ کے پاس گیا ۔ عقبہ نے کہا : سیدنا حذیفہ ؓ سے : تم مجھ سے بیان کرو جو تم نے رسول اللہ ﷺ سے دجال کے بارے میں سنا ہو ، سیدنا حذیفہ ؓ نے کہا : آپ ﷺ نے فرمایا : ” دجال نکلے گا اس کے ساتھ پانی ہو گا اور آگ ہو گی ۔ تو جس کو لوگ پانی دیکھیں گے وہ آگ ہو گی جلانے والی اور جس کو لوگ آگ دیکھیں گے وہ پانی ہو گا سرد اور شیریں ۔ پھر جو کوئی تم میں سے یہ موقع پائے اس کو چاہیے کہ جو آگ معلوم ہو اس میں گر پڑے ۔ اس لیے کہ وہ شیریں پاکیزہ پانی ہے ۔ “ عقبہ نے کہا : سیدنا حذیفہ ؓ کو سچ کرنے کے لیے کہ میں نے بھی یہ حدیث سنی ہے ۔

حدیث نمبر: 7367 --- ‏‏‏‏ سیدنا حذیفہ ؓ سے روایت ہے ، رسول اللہ ﷺ نے فرمایا : ” میں خوب جانتا ہوں دجال کے ساتھ کیا ہو گا ۔ اس کے ساتھ دو نہریں ہوں گی بہتی ہوئیں ایک تو دیکھنے میں سفید پانی معلوم ہو گی اور دوسری دیکھنے میں بھڑکتی ہوئی آگ معلوم ہو گی ، پھر جو کوئی یہ موقع پائے وہ اس نہر میں چلا جائے جو دیکھنے میں آگ معلوم ہوتی ہو اور اپنی آنکھ بند کر لے اور سر جھکا کر اس میں سے پئیے وہ ٹھنڈا پانی ہو گا اور دجال کی ایک آنکھ بالکل چٹ ہو گی ۔ اس پر ایک پھلی ہو گی موٹی اور اس کی دونوں آنکھوں کے بیچ میں کافر لکھا ہو گا جس کو ہر مؤمن پڑھ لے گا خواہ لکھنا جانتا ہو یا نہ جانتا ہو ۔ “

حدیث نمبر: 7378 --- ‏‏‏‏ سیدنا مغیرہ بن شعبہ ؓ سے روایت ہے ، رسول اللہ ﷺ سے کسی نے دجال کا حال اتنا نہیں پوچھا ، جتنا میں نے پوچھا ۔ آپ ﷺ نے فرمایا : ” تو کیوں فکر کرتا ہے ، دجال تجھ کو نقصان نہ پہنچائے گا ۔ “ میں نے کہا : یا رسول اللہ ! لوگ کہتے ہیں اس کے ساتھ کھانا ہو گا ، نہریں ہوں گی ۔ آپ ﷺ نے فرمایا : ”ہو گا پر اللہ تعالیٰ کے نزدیک وہ ذلیل ہے یعنی جو اس کے پاس ہو گا اس سے وہ مؤمنوں کو گمراہ نہ کر سکے گا ۔ “ (یہ حدیث کا حاصل ہے اور یہ حدیث اوپر گزر چکی ہے) ۔

حدیث نمبر: 7388 --- ‏‏‏‏ سیدہ فاطمہ بنت قیس ؓ سے روایت ہے ، رسول اللہ ﷺ کے پاس تمیم داری آئے اور آپ ﷺ کو خبر دی کہ جو سمندر میں سوار ہوئے تھے ان کا جہاز راہ سے ہٹ گیا اور ایک جزیرہ سے جا لگا ۔ وہ اس کے اندر گئے پانی کی تلاش میں ۔ وہاں ایک آدمی دیکھا جو اپنے بال کھینچ رہا تھا اور بیان کیا سارا قصہ حدیث کا ۔ پھر کہا کہ دجال نے کہا : اگر مجھ کو اجازت ملتی نکلنے کی تو میں سب شہروں میں ہو آتا سوائے طیبہ کے ۔ پھر رسول اللہ ﷺ نے تمیم کو لوگوں کے سامنے نکالا ۔ اس نے سارا قصہ بیان کیا ۔ آپ ﷺ نے فرمایا : ”طیبہ یہی ہے اور دجال وہی شخص ہے ۔ “

حدیث نمبر: 7284 --- ‏‏‏‏ سیدنا نافع بن عتبہ ؓ سے روایت ہے ، ہم رسول اللہ ﷺ کے ساتھ تھے ایک جہاد میں ، تو آپ ﷺ کے پاس کچھ لوگ مغرب کی طرف سے آئے جو بالوں کے کپڑے پہنے تھے اور رسول اللہ ﷺ سے ملے ایک ٹیلے کے پاس ، وہ لوگ کھڑے تھے اور آپ ﷺ بیٹھے تھے میرے دل نے کہا : تو چلا جا اور ان لوگوں کے اوپر آپ ﷺ کے بیچ میں کھڑا رہ ۔ ایسا نہ ہو کہ یہ لوگ فریب سے آپ ﷺ کو مار ڈالیں ۔ پھر میرے دل نے کہا : شاید آپ ﷺ چپکے سے کچھ باتیں ان سے کرتے ہوں (اور میرا جانا آپ ﷺ کو ناگوار گزرے) . پھر میں گیا اور ان لوگوں کے اور آپ ﷺ کے بیچ میں کھڑا ہو گیا ، میں نے اس وقت آپ ﷺ سے چار باتیں یاد کیں ، جن کو آپ ﷺ نے میرے ہاتھ پر گنا ۔ آپ ﷺ نے فرمایا : ” : پہلے تم عرب کے جزیرہ میں (کافروں سے) جہاد کرو گے ، اللہ اس کو فتح کر دے گا ، پھر فارس سے جہاد کرو گے ، اللہ تعالیٰ اس کو بھی فتح کر دے گا ۔ پھر نصاریٰ سے لڑو گے روم والوں سے ، اللہ تعالیٰ روم کو بھی فتح کر دے گا ۔ پھر دجال سے لڑو گے اللہ تعالیٰ اس کو بھی فتح کر دے گا ۔ “ (یہ حدیث آپ ﷺ کا بڑا معجزہ ہے) نافع نے کہا : اے جابر بن عمرو ! ہم سمجھتے ہیں دجال اس کے بعد نکلے گا جب روم کا ملک فتح ہو جائے گا ۔

حدیث نمبر: 3649 --- رقم الحديث ترقيم الباني: 2862... عمر بن ثابت انصاری کہتے ہیں کہ مجھے ایک صحابی رسول نے بیان کیا کہ ایک دن نبی کریم ﷺ نے انہیں دجال سے آگاہ کرتے ہوئے فرمایا : ”جان لو کہ کوئی بھی اپنے رب کو مرنے سے پہلے نہیں دیکھ سکتا اور اس دجال کی آنکھوں کے درمیان ‏‏‏‏ ”ک ف ر“ لکھا ہو گا ، اس کے عمل کو ناپسند کرنے والا ہر شخص یہ الفاظ پڑھ لے گا ۔ “

حدیث نمبر: 7372 --- ‏‏‏‏ سیدنا ابوہریرہ ؓ سے روایت ہے ، رسول اللہ ﷺ نے فرمایا : ” کیا میں تم سے دجال کی ایک بات ایسی نہ کہوں جو کسی نبی نے اپنی امت سے نہ کہی ؟ وہ کانا ہو گا اور اس کے ساتھ جنت اور دوزخ کی طرح دو چیزیں ہوں گی ، پر جس کو وہ جنت کہے گا حقیقت میں وہ آگ ہو گی اور میں نے تم کو دجال سے ڈرایا جیسے نوح علیہ السلام نے اپنی قوم کو ڈرایا ۔ “

حدیث نمبر: 7381 --- ‏‏‏‏ یعقوب بن عاصم بن عروہ مسعود ثقفی سے روایت ہے ، میں نے سیدنا عبداللہ بن عمر ؓ سے سنا ان کے پاس ایک شخص آیا اور کہنے یہ لگا : یہ حدیث کیا ہے جو تم بیان کرتے ہو کہ قیامت اتنی مدت میں ہو گی ؟ انہوں نے کہا : (تعجب سے) سبحان اللہ یا لا الہ الا اللہ یا اور کوئی کلمہ مانند ان کے پھر کہا : میرا قصد ہے کہ اب کسی سے کوئی حدیث بیان نہ کروں (کیونکہ لوگ کچھ کہتے ہیں اور مجھ کو بدنام کرتے ہیں) میں نے تو یہ کہا تھا : تم تھوڑے دنوں بعد ایک بڑا حادثہ دیکھو گے جو گھر جلائے گا ، اور وہ ہو گا ضرور ہو گا ۔ پھر کہا : کہ رسول اللہ ﷺ نے فرمایا : ” دجال میری امت میں نکلے گا اور چالیس دن تک رہے گا ۔ “ میں نہیں جانتا چالیس دن فرمایا یا چالیس مہینے یا چالیس برس ۔ ” پھر اللہ تعالیٰ عیسٰی بن مریم علیہ السلام کو بھیجے گا ان کی شکل عروہ بن مسعود کی سی ہے ۔ وہ دجال کو ڈھونڈیں گے اور اس کو ماریں گے ۔ پھر سات برس تک لوگ ایسے رہیں گے کہ دو شخصوں میں کوئی دشمنی نہ ہو گی ۔ پھر اللہ تعالیٰ ایک ٹھنڈی ہوا بھیجے گا شام کی طرف سے تو زمین پر کوئی ایسا نہ رہے گا جس کے دل میں رتی برابر ایمان یا بھلائی ہو مگر یہ ہوا اس کی جان نکال لے گی یہاں تک کہ اگر کوئی تم میں سے پہاڑ کے کلیجہ میں گھس جائے تو وہاں بھی یہ ہوا پہنچ کر اس کی جان نکال لے گی ۔ “ سیدنا عبداللہ ؓ نے کہا : میں نے رسول اللہ ﷺ سے سنا ، آپ ﷺ فرماتے تھے : ” پھر برے لوگ دنیا میں رہ جائیں گے جلد باز چڑیوں کی طرح یا بے عقل اور درندرں کی طرح ان کے اخلاق ہوں گے ۔ نہ وہ اچھی بات کو اچھا سمجھیں گے نہ بری بات کو برا ۔ پھر شیطان ایک صورت بنا کر ان کے پاس آئے گا اور کہے گا : تم شرم نہیں کرتے ۔ وہ کہیں گے : پھر تو کیا حکم دیتا ہے ہم کو ؟ شیطان کہے گا بت پرستی کرو ۔ وہ بت پوجیں گے اور باوجود اس کے ان کی روزی کشادہ ہو گی ، مزے سے زندگی بسر کریں گے ۔ پھر صور پھونکا جائے گا ۔ اس کو کوئی نہ سنے گا مگر ایک طرف سے گردن جھکائے گا اور دوسری طرف سے اٹھ لے گا (یعنی بے ہوش ہو کر گر پڑے گا) اور سب سے پہلے صور کو وہ سنے گا جو اپنے اونٹوں کے حوض پر کلاوہ کرتا ہو گا ۔ وہ بے ہوش ہو جائے گا اور دوسرے لوگ بھی بے ہوش ہو جائیں گے ۔ پھر اللہ تعالیٰ پانی برسائے گا جو نطفہ کی طرح ہو گا ۔ اس سے لوگوں کے بدن اگ آئیں گے ۔ پھر صور پھونکا جائے گا تو سب لوگ کھڑے ہ...

حدیث نمبر: 4204 --- حکم البانی: حسن... ابو سعید خدری ؓ کہتے ہیں کہ نبی اکرم ﷺ ہمارے پاس نکل کر آئے ، ہم مسیح دجال کا تذکرہ کر رہے تھے ، آپ ﷺ نے فرمایا : ” کیا میں تم کو ایسی چیز کے بارے میں نہ بتا دوں جو میرے نزدیک مسیح دجال سے بھی زیادہ خطرناک ہے “ ؟ ہم نے عرض کیا : ” کیوں نہیں “ ؟ آپ ﷺ نے فرمایا : ” وہ پوشیدہ شرک ہے جو یہ ہے کہ آدمی نماز پڑھنے کھڑا ہوتا ہے ، تو اپنی نماز کو صرف اس وجہ سے خوبصورتی سے ادا کرتا ہے کہ کوئی آدمی اسے دیکھ رہا ہے “ ۔ ... (ص/ح) ... حدیث متعلقہ ابواب: شرک خفی سے مراد چھپا ہو اشرک ہے جو انسان کے اندر چھپی ہوئی کیفیت کا نام ہے ، شرک خفی ، شرک اصغر بھی ہو سکتا ہے جیسا کہ ریا کار کا شرک اور شرک اکبر بھی ہو سکتا ہے جیسا کہ منافق کا شرک ۔ ریا اور دکھاوا شرک ہے ۔

حدیث نمبر: 3337 --- ہم سے عبدان نے بیان کیا ، کہا ہم کو عبداللہ بن مبارک نے خبر دی ، انہیں یونس نے ، انہیں زہری نے کہ سالم نے بیان کیا اور ان سے عبداللہ بن عمر ؓ نے بیان کیا کہ رسول اللہ ﷺ لوگوں میں خطبہ سنانے کھڑے ہوئے ۔ پہلے اللہ تعالیٰ کی ، اس کی شان کے مطابق ثنا بیان کی ، پھر دجال کا ذکر فرمایا اور فرمایا کہ میں تمہیں دجال کے فتنے سے ڈراتا ہوں اور کوئی نبی ایسا نہیں گزرا جس نے اپنی قوم کو اس سے نہ ڈرایا ہو ۔ نوح علیہ السلام نے بھی اپنی قوم کو اس سے ڈرایا تھا ۔ لیکن میں تمہیں اس کے بارے میں ایک ایسی بات بتاتا ہوں جو کسی نبی نے بھی اپنی قوم کو نہیں بتائی تھی ، تمہیں معلوم ہونا چاہئے کہ دجال کانا ہو گا اور اللہ تعالیٰ اس عیب سے پاک ہے ۔