حدیث نمبر: 7213 --- ‏‏‏‏ سیدنا ابوسعید خدری ؓ سے روایت ہے ، انہوں نے کہا : میں نے یہ حدیث رسول اللہ ﷺ سے نہیں بلکہ زید بن ثابت سے سنی ، وہ کہتے تھے : رسول اللہ ﷺ بنی نجار کے باغ میں ایک خچر پر جا رہے تھے ، ہم آپ ﷺ کے ساتھ تھے ، اتنے میں وہ خچر بھڑکا اور قریب ہوا کہ آپ ﷺ کو گرا دے ۔ وہاں پر چھ یا پانچ یا چار قبریں تھیں ۔ آپ ﷺ نے فرمایا : ”کوئی جانتا ہے یہ قبریں کن کن کی ہیں ؟ “ ایک شخص بولا : میں جانتا ہوں ۔ آپ ﷺ نے فرمایا : ”کب مرے ؟ “ وہ بولا : شرک کے زمانہ میں ۔ آپ ﷺ نے فرمایا : ”اس امت کا امتحان ہو گا قبروں میں ، پھر اگر تم دفن کرنا نہ چھوڑ دو تو میں اللہ تعالیٰ سے دعا کرتا تم کو قبر کا عذاب سنا دیتا جو میں سن رہا ہوں ۔ “ بعد اس کے آپ ﷺ ہماری طرف متوجہ ہوئے اور فرمایا : ”پناہ مانگو اللہ تعالیٰ کی جہنم کے عذاب سے ۔ “ لوگوں نے کہا : پناہ مانگتے ہیں ہم اللہ کی جہنم کے عذاب سے ۔ پھر آپ ﷺ نے فرمایا : ”پناہ مانگو اللہ تعالیٰ کی قبر کے عذاب سے ۔ “ لوگوں نے کہا : پناہ مانگتے ہیں ہم اللہ کی قبر کے عذاب سے ۔ آپ ﷺ نے فرمایا : ” : پناہ مانگو اللہ کی چھپے اور کھلے فتنوں سے ۔ “ لوگوں نے کہا : پناہ مانگتے ہیں ہم اللہ تعالیٰ کی چھپے اور کھلے فتنوں سے ۔ آپ ﷺ نے فرمایا : ”پناہ مانگو اللہ تعالیٰ کی دجال کے فتنہ سے ۔ “ لوگوں نے کہا : پناہ مانگتے ہیں ہم اللہ کی دجال کے فتنہ سے ۔

حدیث نمبر: 422 --- ‏‏‏‏ مجاہد سے روایت ہے ، ہم سیدنا عبداللہ بن عباس ؓ کے پاس بیٹھے تھے ۔ لوگوں نے ذکر کیا دجال کا اور کہا کہ اس کی دونوں آنکھوں کے بیچ میں کافر کا لفظ لکھا ہو گا ۔ سیدنا ابن عباس ؓ نے کہا : یہ تو میں نے نہیں سنا لیکن آپ ﷺ نے فرمایا : ”ابراہیم علیہ السلام تو ایسے ہیں جیسے تم اپنے صاحب کو دیکھتے ہو (یعنی میری مشابہ ہیں صورت میں) اور موسیٰ علیہ السلام ایک شخص ہیں گندم رنگ گھونگریالے بال والے یا گٹھے ہوئے بدن کے ، سرخ اونٹ پر سوار ہیں جس کی نکیل کھجور کی چھال کی ہے ، گویا میں ان کو دیکھ رہا ہوں جب اترتے ہیں وادی میں تو لبیک کہتے ہیں ۔ “

حدیث نمبر: 1323 --- ‏‏‏‏ ام المؤمنین سیدہ عائشہ ؓ سے روایت ہے ، میں نے سنا رسول اللہ ﷺ سے ، آپ ﷺ نماز میں دجال کے فتنہ سے پناہ مانگتے تھے ۔

حدیث نمبر: 418 --- ‏‏‏‏ قتادہ سے روایت ہے ، میں نے ابوعالیہ سے سنا ، وہ کہتے تھے : مجھے حدیث بیان کی تمہارے پیغمبر ﷺ کے چچا زاد بھائی نے ، یعنی سیدنا عبداللہ بن عباس ؓ نے کہ رسول اللہ ﷺ نے ذکر کیا معراج کا تو فرمایا : ”موسیٰ علیہ السلام گندمی رنگ کے ایک لمبے آدمی تھے ۔ گویا شنوءہ (ایک قبیلہ ہے عرب میں) کے آدمی اور عیسیٰ علیہ السلام کو گھونگریالے بال والے میانہ قد کے ۔ اور بیان کیا مالک کا جو داروغہ ہے جہنم کا اور ذکر کیا دجال کا ۔ “

حدیث نمبر: 7354 --- ‏‏‏‏ سیدنا عبداللہ بن عمر ؓ سے روایت ہے ، سیدنا عمر ؓ رسول اللہ ﷺ کے ساتھ چند لوگوں میں ابن صیاد کے پاس گئے پھر اس کو دیکھا لڑکوں کے ساتھ کھیلتے ہوئے بنی مغالہ کے پاس ۔ ان دنوں ابن صیاد جوانی کے قریب تھا اس کو خبر نہ ہوئی یہاں تک کہ رسول اللہ ﷺ نے اس کی پیٹھ پر اپنا ہاتھ مارا پھر آپ ﷺ نے اس سے پوچھا : ” کیا تو گواہی دیتا ہے اس بات کی کہ میں اللہ کا رسول ہوں ؟ “ ، ابن صیاد نے آپ ﷺ کی طرف دیکھا اور کہا کہ میں گواہی دیتا ہوں کہ تم رسول ہو امی لوگوں کے (امی کہتے ہیں ان پڑھ اور بے تعلیم کو) پھر ابن صیاد نے رسول اللہ ﷺ سے کہا : تم گواہی دیتے ہو اس بات کی کہ میں اللہ کا رسول ہوں ؟ رسول اللہ ﷺ نے اس بات کا کچھ جواب نہ دیا یا اس سے درخواست نہ کی مسلمان ہونے کی (کیونکہ آپ ﷺ مایوس ہو گئے اس کے اسلام سے اور ایک روایت میں « فَرَفَصَہ ٗ » صاد مہملہ سے (یعنی آپ ﷺ نے اس کو لات سے مارا) اور فرمایا : ” میں ایمان لایا اللہ پر اور اس کے رسولوں پر ۔ “ پھر رسول اللہ ﷺ نے اس سے پوچھا : ” تجھے کیا دکھائی دیتا ہے ؟ “ وہ بولا : میرے پاس کبھی سچا آتا ہے کبھی جھوٹا ۔ رسول اللہ ﷺ نے فرمایا : ” تیرا کام گڑبڑ ہو گیا ۔ “ (یعنی مخلوط حق وباطل دونوں سے) پھر آپ ﷺ نے فرمایا : ”میں نے تجھ سے پوچھنے کے لیے ایک بات دل میں چھپائی ہے ۔ “ ابن صیاد نے کہا : وہ « دخ » ہے (« دخ » بمعنی « دخان » یعنی دھواں) رسول اللہ ﷺ نے فرمایا : ”ذلیل ہو ، تو اپنی قدر سے کہاں بڑھ سکتا ہے ۔ “ سیدنا عمر ؓ نے کہا : مجھے چھوڑئیے یا رسول اللہ ! میں سے اس کی گردن مارتا ہوں ؟ رسول اللہ ﷺ نے فرمایا : ” اگر وہ وہی ہے (یعنی دجال) تو تو اس کو مارنہ سکے گا اور جو وہ نہیں ہے تو تجھے اس کا مارنا بہتر نہیں ۔ “

حدیث نمبر: 1333 --- ‏‏‏‏ سیدنا ابن عباس ؓ سے روایت ہے کہ تحقیق رسول اللہ ﷺ ان کو یہ دعا سکھاتے تھے جس طرح ان کو قرآن کی سورت سکھاتے کہ ”کہو : « اللَّہُمَّ إِنَّا نَعُوذُ بِكَ مِنْ عَذَابِ جَہَنَّمَ وَأَعُوذُ بِكَ مِنْ عَذَابِ الْقَبْرِ وَأَعُوذُ بِكَ مِنْ فِتْنَۃِ الْمَسِيحِ الدَّجَّالِ وَأَعُوذُ بِكَ مِنْ فِتْنَۃِ الْمَحْيَا وَالْمَمَاتِ » اے اللہ ! ہم پناہ مانگتے ہیں تجھ سے دوزخ کے عذاب سے ، قبر کے عذاب سے ، اور پناہ مانگتے ہیں تجھ سے دجال کے فتنہ سے اور پناہ مانگتے ہیں تجھ سے زندگی اور موت کے فتنہ سے ۔ “ کہا مسلم بن حجاج رحمہ اللہ نے پہنچا مجھ کو کہ طاؤس نے اپنے بیٹے سے کہا : تو نے نماز میں یہ دعا مانگی ؟ کہا : نہیں ۔ کہا : اپنی نماز پھر پڑھ تحقیق کہ طاؤس نے اس حدیث کو تین یا چار راویوں سے روایت کیا یا جیسا کہ کہا ۔

حدیث نمبر: 2098 --- ‏‏‏‏ عمرہ سے روایت ہے کہ ایک یہودی عورت سیدہ عائشہ ؓ سے آ کر سوال کرنے لگی اور اس نے کہا : اللہ تعالیٰ آپ ؓ کو عذاب قبر سے بچائے ۔ سیدہ عائشہ ؓ فرماتی ہیں : میں نے عرض کیا کہ اے اللہ کے رسول ! کیا لوگوں کو قبروں میں عذاب ہو گا ؟ عمرہ نے کہا کہ سیدہ عائشہ ؓ نے فرمایا کہ رسول اللہ ﷺ نے فرمایا : ”اللہ کی پناہ ۔ “ پھر سوار ہوئے رسول اللہ ﷺ ایک دن صبح کو ایک سواری پر اور سورج گہن ہوا ۔ فرمایا سیدہ عائشہ ؓ نے کہ میں بھی نکلی اور عورتوں کے ساتھ حجروں کے پیچھے سے مسجد میں آئی اور رسول اللہ ﷺ اپنی سواری سے اترے اور اپنی نماز کی جگہ تک تشریف لے گئے جہاں ہمیشہ امامت کرتے نماز میں اور کھڑے ہوئے اور بہت لمبا قیام کیا ۔ اور لوگ آپ ﷺ کے پیچھے کھڑے ہو گئے ۔ سیدہ عائشہ ؓ فرماتی ہیں کہ پھر آپ ﷺ نے بہت لمبا قیام کیا پھر رکوع کیا اور لمبا رکوع ، پھر اٹھے اور بہت لمبا قیام کیا مگر وہ پہلے قیام سے کم تھا ، پھر رکوع کیا اور لمبا رکوع کیا ، مگر وہ پہلے رکوع سے کم تھا ، پھر سر اٹھایا اور آفتاب صف ہوا ۔ اور فرمایا : کہ ”میں نے تم کو دیکھا کہ تم قبروں میں جانچے جاؤ گے ، جیسے دجال کے وقت جانچے جاؤ گے ۔ “ عمرہ نے کہا کہ میں نے سیدہ عائشہ ؓ سے سنا کہ فرماتی تھیں کہ میں نے اس کے بعد سنا رسول اللہ ﷺ پناہ مانگا کرتے تھے دوزخ کے عذاب سے اور قبر کے عذاب سے ۔

حدیث نمبر: 5624 --- ‏‏‏‏ سیدنا مغیرہ بن شعبہ ؓ سے روایت ہے ، رسول اللہ ﷺ سے دجال کے بارے میں کسی نے اتنا نہیں پوچھا جتنا میں نے پوچھا ۔ آخر آپ ﷺ نے فرمایا : ” بیٹا تو کیوں اس رنج میں ہے وہ تجھے رنج نہ دے گا ۔ “ میں نے عرض کیا ۔ لوگ کہتے ہیں اس کے ساتھ پانی کی نہریں اور روٹی کے پہاڑ ہوں گے ۔ آپ ﷺ نے فرمایا : ” وہ اسی سبب سے اللہ تعالیٰ کے نزدیک ذلیل ہو گا ۔ “

حدیث نمبر: 6451 --- ‏‏‏‏ ابوزرعہ سے روایت ہے کہ سیدنا ابوہریرہ ؓ نے کہا : میں ہمیشہ محبت رکھتا ہوں بنی تمیم سے تین باتوں کی وجہ سے جو میں نے سنیں رسول اللہ ﷺ سے ، میں نے سنا ، آپ ﷺ فرماتے تھے : ”وہ سب سے زیادہ سخت ہیں میری امت میں دجال پر ۔ “ اور ان کے صدقے آئے تو آپ ﷺ نے فرمایا : ”یہ ہماری قوم کے صدقے ہیں ۔ “ اور ایک عورت ان کی قیدی تھی سیدہ عائشہ ؓ کے پاس ۔ آپ ﷺ نے فرمایا : ”اس کو آزاد کر دے یہ اسمعیل علیہ السلام کی اولاد میں سے ہے ۔ “

حدیث نمبر: 1328 --- ‏‏‏‏ سیدنا ابوہریرہ ؓ سے روایت ہے کہ رسول اللہ ﷺ نے فرمایا : « اللَّہُمَّ إِنِّى أَعُوذُ بِكَ مِنْ عَذَابِ الْقَبْرِ وَعَذَابِ النَّارِ وَفِتْنَۃِ الْمَحْيَا وَالْمَمَاتِ وَشَرِّ الْمَسِيحِ الدَّجَّالِ » ” یا اللہ ! پناہ مانگتا ہوں میں تیری قبر کے عذاب سے اور دوزخ کے عذاب سے اور زندگی اور موت سے فساد اور دجال کی برائی سے ۔ “