حدیث نمبر: 1690 --- حکم البانی: صحيح... ام المؤمنین میمونہ ؓ کہتی ہیں کہ میری ایک لونڈی تھی ، میں نے اسے آزاد کر دیا ، میرے پاس نبی اکرم ﷺ تشریف لائے تو میں نے آپ کو اس کی خبر دی ، اس پر آپ ﷺ نے فرمایا : ” اللہ تعالیٰ تمہیں اجر عطا کرے ، لیکن اگر تو اس لونڈی کو اپنے ننھیال کے لوگوں کو دے دیتی تو یہ تیرے لیے بڑے اجر کی چیز ہوتی “ ۔ ... (ص/ح)

حدیث نمبر: 1689 --- حکم البانی: صحيح... انس ؓ کہتے ہیں جب « لن تنالوا البر حتى تنفقوا مما تحبون » کی آیت نازل ہوئی تو ابوطلحہ ؓ نے کہا : اللہ کے رسول ! میرا خیال ہے کہ ہمارا رب ہم سے ہمارے مال مانگ رہا ہے ، میں آپ کو گواہ بناتا ہوں کہ میں نے اریحاء نامی اپنی زمین اسے دے دی ، اس پر رسول اللہ ﷺ نے ان سے فرمایا : ” اسے اپنے قرابت داروں میں تقسیم کر دو “ ، تو انہوں نے اسے حسان بن ثابت اور ابی بن کعب ؓ کے درمیان تقسیم کر دیا ۔ ابوداؤد کہتے ہیں : مجھے محمد بن عبداللہ انصاری سے یہ بات معلوم ہوئی کہ ابوطلحہ کا نام : زید بن سہل بن اسود بن حرام بن عمرو ابن زید مناۃ بن عدی بن عمرو بن مالک بن النجار ہے ، اور حسان : ثابت بن منذر بن حرام کے بیٹے ہیں ، اس طرح ابوطلحہ ؓ اور حسان ؓ کا سلسلہ نسب حرام پر مل جاتا ہے وہی دونوں کے تیسرے باپ (پردادا) ہیں ، اور ابی ؓ کا سلسلہ نسب اس طرح ہے : ابی بن کعب بن قیس بن عتیک بن زید بن معاویہ بن عمرو بن مالک بن نجار ، اس طرح عمرو : حسان ، ابوطلحہ اور ابی تینوں کو سمیٹ لیتے ہیں یعنی تینوں کے جد اعلیٰ ہیں ، انصاری (محمد بن عبداللہ) کہتے ہیں : ابی ؓ اور ابوطلحہ ؓ کے نسب میں چھ آباء کا فاصلہ ہے ۔ ... (ص/ح)

حدیث نمبر: 1696 --- حکم البانی: صحيح... جبیر بن مطعم ؓ کہتے ہیں کہ نبی اکرم ﷺ نے فرمایا : ” رشتہ ناتا توڑنے والا جنت میں نہیں جائے گا “ ۔ ... (ص/ح)

حدیث نمبر: 1697 --- حکم البانی: صحيح... عبداللہ بن عمرو ؓ کہتے ہیں کہ رسول اللہ ﷺ نے فرمایا : ” رشتہ ناتا جوڑنے والا وہ نہیں جو بدلے میں ناتا جوڑے بلکہ ناتا جوڑنے والا وہ ہے کہ جب ناتا توڑا جائے تو وہ اسے جوڑے “ ۔ ... (ص/ح)

حدیث نمبر: 1698 --- حکم البانی: صحيح... عبداللہ بن عمرو ؓ کہتے ہیں کہ رسول اللہ ﷺ نے خطبہ دیا اور فرمایا : ” بخل و حرص سے بچو اس لیے کہ تم سے پہلے لوگ بخل و حرص کی وجہ سے ہلاک ہوئے ، حرص نے لوگوں کو بخل کا حکم دیا تو وہ بخیل ہو گئے ، بخیل نے انہیں ناتا توڑنے کو کہا تو لوگوں نے ناتا توڑ لیا اور اس نے انہیں فسق و فجور کا حکم دیا تو وہ فسق و فجور میں لگ گئے “ ۔ ... (ص/ح)

حدیث نمبر: 1699 --- حکم البانی: صحيح... اسماء بنت ابی بکر ؓ کہتی ہیں میں نے عرض کیا : اللہ کے رسول ! میرے پاس سوائے اس کے کچھ نہیں جو زبیر میرے لیے گھر میں لا دیں ، کیا میں اس میں سے دوں ؟ آپ ﷺ نے فرمایا : ” دو اور اسے بند کر کے نہ رکھو کہ تمہارا رزق بھی بند کر کے رکھ دیا جائے “ ۔ ... (ص/ح)

حدیث نمبر: 1684 --- حکم البانی: صحيح... ابوموسیٰ ؓ کہتے ہیں رسول اللہ ﷺ نے فرمایا : ” امانت دار خازن جو حکم کے مطابق پورا پورا خوشی خوشی اس شخص کو دیتا ہے جس کے لیے حکم دیا گیا ہے تو وہ بھی صدقہ کرنے والوں میں سے ایک ہے “ ۔ ... (ص/ح)

حدیث نمبر: 1668 --- حکم البانی: صحيح... اسماء ؓ کہتی ہیں کہ میرے پاس میری ماں آئیں جو قریش کے دین کی طرف مائل اور اسلام سے بیزار اور مشرکہ تھیں ، میں نے عرض کیا : اللہ کے رسول ! میری ماں میرے پاس آئی ہیں اور وہ اسلام سے بیزار اور مشرکہ ہیں ، کیا میں ان سے صلہ رحمی کروں ؟ آپ ﷺ نے فرمایا : ” ہاں ، اپنی ماں سے صلہ رحمی کرو “ ۔ ... (ص/ح)

حدیث نمبر: 1665 --- حکم البانی: ضعيف... حسین بن علی ؓ کہتے ہیں کہ رسول اللہ ﷺ نے فرمایا : ” سائل کا حق ہے اگرچہ وہ گھوڑے پر آئے “ ۔ ... (ص/ح)

حدیث نمبر: 1671 --- حکم البانی: ضعيف... جابر ؓ کہتے ہیں کہ رسول اللہ ﷺ نے فرمایا : ” اللہ کے نام پر سوائے جنت کے کوئی چیز نہ مانگی جائے “ ۔ ... (ض)