حدیث نمبر: 2513 --- حکم البانی: حسن صحيح... ابو سعید خدری ؓ کہتے ہیں کہ رسول اللہ ﷺ نے صدقہ فطر جَو یا کھجور یا پنیر سے ایک صاع فرض کیا ہے ۔ ... (ص/ح)

حدیث نمبر: 1587 --- حکم البانی: صحيح... عبدالرحمٰن بن عابس کہتے ہیں میں نے ابن عباس ؓ سے سنا کہ ایک آدمی نے ان سے پوچھا : کیا آپ عیدین کے لیے جاتے وقت رسول اللہ ﷺ کے ساتھ موجود تھے ؟ تو انہوں نے کہا : جی ہاں ، اور اگر میری آپ سے قرابت نہ ہوتی تو میں آپ کے ساتھ نہ ہوتا یعنی اپنی کم سنی کی وجہ سے ، آپ اس نشان کے پاس آئے جو کثیر بن صلت کے گھر کے پاس ہے ، تو آپ نے (وہاں) نماز پڑھی ، پھر خطبہ دیا ، پھر آپ عورتوں کے پاس آئے ، اور انہیں بھی آپ نے نصیحت کی اور (آخرت کی) یاد دلائی ، اور صدقہ کرنے کا حکم دیا ، تو عورتیں اپنا ہاتھ اپنے گلے کی طرف بڑھانے (اور اپنا زیور اتار اتار کر) بلال ؓ کے کپڑے میں ڈالنے لگیں ۔ ... (ص/ح)

حدیث نمبر: 3189 --- حکم البانی: صحيح... ابومسعود ؓ سے روایت ہے کہ ایک شخص نے مہار والی ایک اونٹنی اللہ کے راستے میں صدقہ میں دی تو رسول اللہ ﷺ نے فرمایا : ” قیامت کے دن (اس ایک اونٹنی کے بدلہ میں) سات سو مہار والی اونٹنیوں کے (ثواب) کے ساتھ آئے گا “ ۔ ... (ص/ح)

حدیث نمبر: 2525 --- حکم البانی: صحيح... ابوالملیح کے والد اسامہ بن عمیر ؓ کہتے ہیں کہ میں نے رسول اللہ ﷺ کو فرماتے ہوئے سنا : ” اللہ عزوجل بغیر پاکی کے کوئی نماز قبول نہیں کرتا ، اور نہ ہی حرام مال سے کوئی صدقہ قبول کرتا ہے “ ۔ ... (ص/ح)

حدیث نمبر: 2514 --- حکم البانی: صحيح... ابو سعید خدری ؓ کہتے ہیں کہ رسول اللہ ﷺ جب ہمارے درمیان موجود تھے تو ہم صدقہ فطر گی ہوں سے ایک صاع ، یا جو سے ، یا کھجور سے ، یا کشمش سے ، یا پنیر سے ایک صاع نکالتے تھے ۔ ... (ص/ح)

حدیث نمبر: 2502 --- حکم البانی: صحيح... عبداللہ بن عمر ؓ کہتے ہیں کہ رسول اللہ ﷺ نے آزاد ، غلام ، مرد اور عورت ہر ایک پر رمضان کی زکاۃ (صدقہ فطر) ایک صاع کھجور یا ایک صاع جَو فرض کی ہے ، پھر اس کے برابر لوگوں نے نصف صاع گیہوں کو قرار دے لیا ۔ ... (ص/ح)

حدیث نمبر: 2503 --- حکم البانی: صحيح... عبداللہ بن عمر ؓ کہتے ہیں کہ رسول اللہ ﷺ نے صدقہ فطر ہر مرد و عورت ، آزاد اور غلام پر ایک صاع کھجور یا ایک صاع جَو فرض کیا ہے ، پھر لوگوں نے آدھا صاع گیہوں کو اس کے برابر ٹھہرا لیا ۔ ... (ص/ح)

حدیث نمبر: 2516 --- حکم البانی: حسن صحيح دون ذكر الدقيق... ابو سعید خدری ؓ کہتے ہیں کہ ہم نے رسول اللہ ﷺ کے زمانہ میں صدقہ فطر کھجور سے ، یا جو سے ، یا کشمش سے ، یا آٹا یا پنیر سے ، یا بے چھلکے والی جو سے ایک صاع ہی نکالا ہے ۔ سفیان کو شک ہوا تو انہوں نے « من دقیق أوسلت » شک کے ساتھ روایت کی ہے ۔ ... (ص/ح)

حدیث نمبر: 2555 --- حکم البانی: صحيح... جریر بن عبداللہ ؓ کہتے ہیں کہ ہم دن کے ابتدائی حصہ میں رسول اللہ ﷺ کے پاس بیٹھے ہوئے تھے ، کچھ لوگ ننگے بدن ، ننگے پیر ، تلواریں لٹکائے ہوئے آئے ، زیادہ تر لوگ قبیلہ مضر کے تھے ، بلکہ سبھی مضر ہی کے تھے ۔ ان کی فاقہ مستی دیکھ کر رسول اللہ ﷺ کے چہرے کا رنگ بدل گیا ، آپ اندر گئے ، پھر نکلے ، تو بلال ؓ کو حکم دیا ، انہوں نے اذان دی ، پھر اقامت کہی ، آپ نے نماز پڑھائی ، پھر آپ نے خطبہ دیا ، تو فرمایا : ” لوگو ! ڈرو ، تم اپنے رب سے جس نے تم کو ایک جان سے پیدا کیا ، اور اسی جان سے اس کا جوڑا بنایا ۔ اور انہیں دونوں (میاں بیوی) سے بہت سے مرد اور عورتیں پھیلا دیئے ۔ اور اس اللہ سے ڈرو جس کے واسطے سے تم سب ایک دوسرے سے مانگتے ہو ۔ قرابت داریوں کا خیال رکھو کہ وہ ٹوٹنے نہ پائیں ، بیشک اللہ تمہارا نگہبان ہے ، اور اللہ سے ڈرو ، اور تم میں سے ہر شخص یہ (دھیان رکھے اور) دیکھتا رہے کہ آنے والے کل کے لیے اس نے کیا آگے بھیجا ہے ، آدمی کو چاہیئے کہ اپنے دینار میں سے ، اپنے درہم میں سے ، اپنے کپڑے میں سے ، اپنے گیہوں کے صاع میں سے ، اپنے کھجور کے صاع میں سے صدقہ کرے “ ، یہاں تک کہ آپ نے فرمایا : ” اگرچہ کھجور کا ایک ٹکڑا ہی سہی “ ، چنانچہ انصار کا ایک شخص (روپیوں سے بھری) ایک تھیلی لے کر آیا جو اس کی ہتھیلی سے سنبھل نہیں رہی تھی بلکہ سنبھلی ہی نہیں ۔ پھر تو لوگوں کا تانتا بندھ گیا ۔ یہاں تک کہ میں نے دیکھا کہ کھانے اور کپڑے کے دو ڈھیر اکٹھے ہو گئے ۔ اور میں نے دیکھا کہ رسول اللہ ﷺ کا چہرہ انور کھل اٹھا ہے گویا وہ سونے کا پانی دیا ہوا چاندی ہے (اس موقع پر) رسول اللہ ﷺ نے فرمایا : ” جو شخص اسلام میں کوئی اچھا طریقہ جاری کرے گا ، اس کے لیے دہرا اجر ہو گا : ایک اس کے جاری کرنے کا ، دوسرا جو اس پر عمل کریں گے ان کا اجر ، بغیر اس کے کہ ان کے اجر میں کوئی کمی کی جائے ۔ اور جس نے اسلام میں کوئی برا طریقہ جاری کیا ، تو اسے اس کے جاری کرنے کا گناہ ملے گا اور جو اس اس پر عمل کریں گے ان کا گناہ بھی بغیر اس کے کہ ان کے گناہ میں کوئی کمی کی جائے “ ۔ ... (ص/ح)

حدیث نمبر: 2546 --- حکم البانی: صحيح... ابومسعود ؓ کہتے ہیں کہ نبی اکرم ﷺ نے فرمایا : ” جب آدمی اپنی بیوی پر خرچ کرے اور اس سے ثواب کی امید رکھتا ہو تو یہ اس کے لیے صدقہ ہو گا “ ۔ ... (ص/ح)