حدیث نمبر: 1319 --- رقم الحديث ترقيم الباني: 2409... سیدنا عبداللہ بن عمرو ؓ بیان کرتے ہیں کہ ایک آدمی نبی کریم ﷺ کے پاس آیا اور کہا : میں نے اپنی ماں کو ایک باغ دیا تھا ، اب وہ فوت ہو گئی ہیں اور اس کا وارث صرف میں ہوں ؟ رسول اللہ ﷺ نے فرمایا : ”تیرا صدقہ بھی ثابت ہو گیا اور تیرا باغ بھی تیری طرف لوٹ آیا ۔ “

حدیث نمبر: 1729 --- رقم الحديث ترقيم الباني: 3984... سیدنا سلیمان ؓ سے بیان کرتے ہیں کہ میں نے رسول اللہ ﷺ کو یہ فرماتے سنا : ”زندوں کے چار اعمال کے ثواب کا سلسلہ مردوں کے لیے بھی جاری رہتا ہے (وہ چار اعمال یہ ہیں) مردے کے ایسے جانشین جو اس کے لیے دعا کریں ، ان کی دعا اسے پہنچتی ہے ، مردہ صدقہ جاریہ کر جائے ، جب تک (زندوں میں) اس کا سلسلہ جاری رہتا ہے اسے اجر ملتا رہتا ہے ، مردہ آدمی کا ایسا علم سکھا جانا جس پر اس کے بعد عمل کیا جاتا ہو ، عمل کرنے والے کے ثواب جتنا اجر اسے بھی ملتا ہے اور عامل کے اجر میں کوئی کمی نہیں آتی اور وہ مردہ جو سرحد پر پہرہ دیتے ہوئے مرا ، قیامت تک اسے اس عمل کا اجر ملتا رہے گا ۔ “

حدیث نمبر: 1861 --- رقم الحديث ترقيم الباني: 2546... سیدنا انس ؓ سے روایت ہے کہ نبی کریم ﷺ سیدہ عائشہ ؓ کے گھر داخل ہوئے اور گوشت دیکھ کر فرمایا : ”اس کا کچھ حصہ ہمارے لیے بھونو ۔ “ انہوں نے کہا : اے اللہ کے رسول ! یہ تو صدقہ ہے ۔ رسول اللہ ﷺ نے فرمایا : ”بس تم اس کا کچھ حصہ ہمارے لیے بھون دو ، یہ اپنے مقام پر پہنچ چکا ہے ۔ “

حدیث نمبر: 2195 --- رقم الحديث ترقيم الباني: 2470... سیدنا فضالہ بن عبید ؓ بیان کرتے ہیں کہ نبی کریم ﷺ نے فرمایا : ” (کوئی نیکی کر کے) اپنے اور آتش دوزخ کے درمیان پردہ لٹکائے رکھو ، اگرچہ وہ کھجور کے ایک ٹکڑے (کا صدقہ کرنے کی صورت میں ہو) ۔ “

حدیث نمبر: 2296 --- رقم الحديث ترقيم الباني: 162... زوجہ رسول سیدہ عائشہ ؓ کہتی ہیں کی میں نے رسول اللہ ﷺ سے اس آیت کے بارے میں سوال کیا : « وَالَّذِينَ يُؤْتُونَ مَا آتَوْا وَقُلُوبُہُمْ وَجِلَۃٌ » ”اور جو لوگ دیتے ہیں جو کچھ دیتے ہیں اور ان کے دل کپکپاتے ہیں ۔ “ (۲۳-المؤمنون : ۶۰) میں نے کہا : (اے اللہ کے رسول !) کیا اس آیت کا مصداق شراب پینے والے ، چوری کرنے والے لوگ ہیں ؟ آپ ﷺ نے فرمایا : ”نہیں ، اے بنت صدیق ! اس آیت سے مراد وہ لوگ ہیں جو روزے بھی رکھتے ہیں ، نماز بھی پڑھتے ہیں اور صدقہ و خیرات بھی کرتے ہیں ، لیکن اس کے ساتھ ساتھ انہیں یہ ڈر ہوتا ہے کہ کہیں ایسا نہ ہو کہ یہ اعمال قبول ہی نہ ہوں ۔ « أُولَـئِكَ يُسَارِعُونَ فِي الْخَيْرَاتِ » یہی لوگ ہیں جو جلدی جلدی بھلائیاں حاصل کرتے ہیں ۔ “ (۲۳-المؤمنون : ۶۱)

حدیث نمبر: 2344 --- رقم الحديث ترقيم الباني: 2955... ذیال بن عتبہ بن خنظلہ کہتے ہیں : میں نے اپنے دادا خظلہ بن حذیم سے سنا ، وہ کہتے ہیں کہ اس کے دادا حنیفہ نے حذیم سے کہا : میرے بیٹوں کو اکٹھا کرو ، میں وصیت کرنا چاہتا ہوں ۔ اس نے ان کو اکٹھا کیا ، حنیفہ نے کہا : میری سب سے پہلی وصیت یہ ہے کہ میرے زیر پرورش یتیم کے لیے سو اونٹ ہیں ، جس کو ہم جاہلیت میں ”مطیبہ“ کہتے تھے ۔ حذیم نے کہا : اے ابا جان ! میں نے آپ کے بیٹوں کو یہ کہتے ہوئے سنا : ہم مجمع میں باپ کے پاس تو اس کا اقرار کر لیں گے ، لیکن جب وہ فوت ہو جائے گا تو ہم (اپنے معاہدے سے) پھر جائیں گے ، حنفیہ نے کہا : تو پھر ہم اپنے مابین رسول اللہ ﷺ کو (شاہد بناتے ہیں) حذیم نے کہا : ہم اس بات پر راضی ہیں ۔ چنانچہ حذیم اور حنیفہ چلے پڑے اور ان کے ساتھ یتیم لڑکا بھی تھا وہ حذیم کے پیچھے بیٹھا ہوا تھا ۔ جب وہ رسول اللہ ﷺ کے پاس پہنچے تو انہوں نے آپ ﷺ کو سلام کہا : نبی کریم ﷺ نے پوچھا : (اے ابوحذیم ! کیسے آئے ہو) اس نے کہا : یہ ، پھر اس نے حذیم کی ران پر ہاتھ مارا اور کہا : پھر اندیشہ ہے کہ کہیں ایسا نہ ہو کہ بڑھاپا یا موت اچانک آ پڑے ، اس لیے میں نے ارادہ کیا کہ اپنے اس زیر تربیت بچے کے لیے سو اونٹوں کی وصیت کر دوں ، جس کو ہم جاہلیت میں ”مطیبہ“ کہتے تھے ۔ یہ سن کر رسول اللہ ﷺ غصے میں آ گئے ، حتی کہ ہم نے آپ ﷺ کے چہرے پر غصے کے آثار دیکھے ۔ پہلے آپ ﷺ بیٹھے ہوئے تھے ، (یہ سن کر) گھٹنوں کے بل ہو گئے اور فرمایا : ”نہیں ، نہیں ، نہیں ۔ صدقہ پانچ (اونٹوں کا ہو سکتا ہے) ، وگرنہ دس ، نہیں تو پندرہ ، یا پھر بیس ، (اگر کوئی اس سے تجاوز کرے تو) پچیس ، وگرنہ تیس ، یا پھر پینتیس ، اگر زیادہ کا (ارادہ ہو) تو چالیس ۔ “ انہوں نے آپ ﷺ کو الوداع کہا اور یتیم کے پاس ایک لاٹھی تھی ، جس سے وہ اونٹ کو مار رہا تھا ۔ نبی کریم ﷺ نے فرمایا : ”گراں گزرا ہے یتیم کا یہ چلنا ۔ “ سیدنا حنظلہ ؓ نے کہا : میرا باپ نبی کریم ﷺ کے قریب ہوا اور کہا : میرے بعض بیٹے باریش اور بعض کم عمر والے ہیں اور یہ ان میں سب سے چھوٹا ہے ، آپ اس کے لیے اللہ تعالیٰ سے دعا فرما دیں ۔ آپ ﷺ نے اس کے سر پر ہاتھ پھیرا اور فرمایا : ’’ اللہ تجھ میں برکت فرمائے یا تجھ میں برکت کر دی جائے ۔ “ ذیال نے کہا : میں نے حنظلہ کو دیکھا کہ اس کے پاس سوزش زدہ چہرے والا انسان لایا جاتا ...

حدیث نمبر: 2528 --- رقم الحديث ترقيم الباني: 3088... سیدنا ابن عباس ؓ سے روایت ہے ، وہ کہتے ہیں : رسول اللہ ﷺ نے ولید بن عقبہ بن ابی معیط کو بنو مصطلق کی طرف صدقات کی وصولی کے لیے بھیجا ۔ جب ان لوگوں کو ان کی آمد کی خبر ہوئی تو وہ بہت خوش ہوئے اور رسول اللہ ﷺ کے قاصد کے استقبال کے لیے باہر نکلے ، لیکن جب ولید کو ان کے استقبال کے طور پر باہر نکلنے کا بتلایا گیا تو وہ رسول اللہ ﷺ کے پاس واپس لوٹ آئے اور کہا : اے اللہ کے رسول ! بنو مصطلق نے صدقہ روک لیا ہے ۔ رسول اللہ ﷺ کو اس پہ بہت غصہ آیا ، ابھی آپ ان کے خلاف جہاد کا سوچ ہی رہے تھے کہ (‏‏‏‏بنو مصطلق) کا وفد آپ کے پاس پہنچ گیا اور انہوں نے کہا : اے اللہ کے رسول ! ہمیں پتہ چلا ہے کہ آپ کا قاصد نصف طریق سے واپس لوٹ آیا ہے اور ہم ڈر گئے کہ کہیں ایسا نہ ہو کہ آپ کو ہم پر غصہ آیا ہو ، جس کی وجہ سے آپ نے قاصد کو رقعہ لکھ کر واپس بلا لیا ہو ، ہم تو اللہ اور اس کے رسول ﷺ کے غصہ سے اللہ کی پناہ مانگتے ہیں ۔ رسول اللہ ﷺ نے ان کو راضی کیا ، حالانکہ آپ ﷺ (‏‏‏‏ان کے خلاف جنگ کرنے کا) ارادہ کر چکے تھے ۔ اللہ تعالیٰ نے (‏‏‏‏اپنی) کتاب میں ان کا عذر نازل فرمایا ۔ ”اے ایمان والو ! اگر کوئی فاسق تمہیں کوئی خبر دے تو تم اس کی اچھی طرح تحقیق کر لیا کرو ، کہیں ایسا نہ ہو کہ نادانی میں کسی قوم کو نقصان پہنچا دو پھر اپنے کئے پر پریشان ہونا پڑے ۔ “

حدیث نمبر: 3390 --- رقم الحديث ترقيم الباني: 3114... سیدنا ابوہریرہ ؓ کہتے ہیں : بنو تمیم کے حق میں تین باتیں رسول اللہ ﷺ سے سنیں ، ان تین باتوں کے بعد میں نے کبھی بھی بنو تمیم سے بغض نہیں رکھا ۔ (‏‏‏‏وہ باتیں ہیں) (‏‏‏‏۱) سیدہ عائشہ ؓ نے اسماعیل علیہ السلام کی اولاد سے ایک غلام آزاد کرنے کی نذر مانی تھی ، اتنے میں بنو عنبر کے کچھ لوگ قیدی بن گئے ، جب انہیں لایا گیا تو رسول اللہ ﷺ نے فرمایا : ”اگر تم اپنی نذر پورا کرنا چاہتی ہو تو ان میں سے ایک غلام آزاد کر دو ۔ “ یعنی آپ ﷺ نے ان کو اولاد اسماعیل ‏‏‏‏علیہ السلام قرار دیا ۔ ایک دفعہ آپ ﷺ کے پاس صدقہ کے اونٹ لائے گئے ، ان کے حسن و جمال نے آپ کو حیرت میں ڈال دیا ، آپ ﷺ نے فرمایا : ”‏‏‏‏یہ میری قوم کے اونٹ ہیں ۔ “ یعنی آپ ﷺ نے ان کو اپنی قرار دیا ۔ نیز فرمایا : (۳) ”وہ گھمسان کی جنگوں میں سخت لڑائی کرنے والے ہیں ۔ “

حدیث نمبر: 19 --- رقم الحديث ترقيم الباني: 826... سیدنا ابوذر ؓ کہتے ہیں : میں ایک رات کو نکلا ، کیا دیکھتا ہوں کہ رسول اللہ ﷺ اکیلے چل رہے تھے ، آپ کے ساتھ کوئی آدمی نہیں تھا ۔ میں نے سمجھا کہ شائد آپ ﷺ اس بات کو ناپسند کرتے ہیں کہ آپ کے ساتھ کوئی چلے ۔ میں نے چاند کے سائے میں چلنا شروع کر دیا ۔ آپ میری طرف متوجہ ہوئے ، مجھے دیکھا اور پوچھا : ” یہ کون ہے ؟ “ میں نے کہا : میں ابوذر ہوں ، اللہ مجھے آپ پر قربان کرے ۔ آپ ﷺ نے فرمایا : ” ابوذر ! ادھر آؤ ۔ “ میں آپ کے پاس گیا اور آپ کے ساتھ کچھ دیر چلتا رہا پھر آپ ﷺ نے مجھے فرمایا : ” قیامت والے روز کثیر مال و دولت والے اجر و ثواب میں کم ہوں گے ، مگر جس کو اللہ تعالیٰ نے مال دیا اور اس نے (صدقہ کرتے ہوئے) اسے دائیں بائیں اور آگے پیچھے بکھیر دیا اور اس کے ذریعے نیک اعمال کیے ۔ “ پھر میں آپ کے ساتھ چلتا رہا ، حتی کہ آپ ﷺ نے فرمایا : ” یہاں بیٹھ جاؤ ۔ “ آپ ﷺ نے مجھے ایسی ہموار زمین میں بٹھایا ، جس کے ارد گرد پتھر پڑے ہوئے تھے ۔ پھر فرمایا : ” میرے واپس آنے تک یہاں بیٹھے رہو ۔ “ پھر آپ ﷺ حرہ (کالے پتھروں والی زمین) کی طرف چلے گئے اور نظروں سے اوجھل ہو گئے ، آپ ﷺ وہاں کافی دیر تک ٹھہرے رہے ۔ پھر میں نے سنا آپ ﷺ یہ فرماتے ہوئے آ رہے تھے : ” اگرچہ وہ چوری بھی کرے اور زنا بھی کرے ۔ “ جب آپ ﷺ میرے پاس پہنچے تو مجھ سے صبر نہ ہو سکا اور میں نے کہا : اے اللہ کے نبی ! مجھے اللہ تعالیٰ آپ پر قربان کرے ! آپ حرہ زمین کے پاس کس سے گفتگو کر رہے تھے ؟ پھر آپ کو کوئی جواب بھی نہیں دے رہا تھا ۔ آپ ﷺ نے فرمایا : ” وہ جبریل تھا ، حرہ کے ساتھ ہی وہ مجھے ملا اور کہا : (اے محمد !) اپنی امت کو خوشخبری سنا دو کہ جو اس حال میں مرے کہ اس نے اللہ تعالیٰ کے ساتھ کسی کو شریک نہ ٹھہرایا ہو ، وہ جنت میں داخل ہو گا ۔ میں نے کہا : جبریل ! اگرچہ اس نے چوری بھی کی ہو اور زنا بھی کیا ہو ؟ ۔ اس نے کہا : جی ہاں ۔ میں نے کہا : اگرچہ اس نے چوری بھی کی ہو اور زنا بھی کیا ہو ؟ ۔ میں نے کہا : جی ہاں ۔ میں نے کہا : اگرچہ اس نے چوری بھی کی ہو اور زنا بھی کیا ہو ؟ ۔ اس نے کہا : جی ہاں اور اگرچہ اس نے شراب بھی پی ہو ۔ “

حدیث نمبر: 813 --- رقم الحديث ترقيم الباني: 3142... سیدنا ابوہریرہ ؓ سے مروی ہے ، رسول اللہ ﷺ نماز فجر سے فارغ ہوئے ، مسجد میں تشریف فرما عورتوں کے پاس آئے ، ان کے پاس کھڑے ہوئے اور فرمایا : ”عورتوں کی جماعت ! صدقہ کیا کرو ، میں نے عقل اور دین میں ناقص ہونےکے باوجود تم عورتوں سے زیادہ کسی عقل مند پر غالب آ جانے والا کوئی نہیں دیکھا اور میں نے قیامت کے دن جہنم میں اکثریت عورتوں کی دیکھی ، لہٰذا حسب استطاعت اللہ تعالیٰ کا قرب حاصل کرو ۔ “ عورتوں میں سیدنا عبد اللہ بن مسعود ؓ کی بیوی بھی موجود تھی . . . راوی نے پوری حدیث بیان کی ۔ اس عورت نےکہا : اے اللہ کے رسول ! ہمارے دین اور عقل میں کیا کمی ہے ؟ آپ ﷺ نےفرمایا : ”میں نے جو نقصان دین کی بات کی ، وہ یہ ہے کہ جب تم میں سے کسی کو حیض آتا ہے ، تو وہ اللہ کی مشیت کے مطابق نماز پڑھنے سے رکی رہتی ہے ، (اس سے دین میں کمی آ جاتی ہے) اور عقل کا نقصان یہ ہے کہ ایک عورت کی گواہی ، مرد کی نصف شہادت کے برابر ہے ۔ “