حدیث نمبر: 3831 --- حکم البانی: صحيح... قیس بن ابی غرزہ ؓ کہتے ہیں کہ ہم لوگ مدینے میں وسق بیچتے اور خریدتے تھے ، اور ہم اپنے کو « سماسرہ » (دلال) کہتے تھے ، لوگ بھی ہمیں دلال کہتے تھے ۔ ایک دن رسول اللہ ﷺ ہماری طرف نکل کر آئے تو آپ نے ہمیں ایک ایسا نام دیا جو اس نام سے بہتر تھا جو ہم اپنے لیے کہتے تھے یا لوگ ہمیں اس نام سے پکارتے تھے ، آپ نے فرمایا : ” اے تاجروں کی جماعت ! تمہاری خرید و فروخت میں (بلا قصد و ارادے کے) قسم اور جھوٹ کی باتیں بھی آ جاتی ہیں تو تم اس میں صدقہ ملا لیا کرو “ ۔ ... (ص/ح)

حدیث نمبر: 3624 --- حکم البانی: صحيح... عمرو بن حارث ؓ کہتے ہیں (رسول اللہ ﷺ انتقال فرما گئے) اور انتقال کے وقت رسول اللہ ﷺ نے سوائے اپنے سفید خچر کے جس پر سوار ہوا کرتے تھے اور اپنے ہتھیار کے اور زمین کے جسے اللہ کے راستہ میں دے دیا تھا کچھ نہ چھوڑا تھا نہ دینار نہ درہم نہ غلام نہ لونڈی ، (مصنف) کہتے ہیں (میرے استاذ) قتیبہ نے دوسری بار یہ بتایا کہ زمین کو صدقہ کر دیا تھا ۔ ... (ص/ح)

حدیث نمبر: 3806 --- حکم البانی: صحيح... ابوہریرہ ؓ کہتے ہیں کہ رسول اللہ ﷺ نے فرمایا : ” تم میں سے جو قسم کھائے اور کہے : لات (بت) کی قسم ، تو اسے چاہیئے کہ وہ لا الٰہ الا اللہ پڑھے ، اور جو اپنے ساتھی سے کہے : آؤ تمہارے ساتھ جوا کھیلیں گے) تو اسے چاہیئے کہ صدقہ کرے “ ۔ ... (ص/ح)

حدیث نمبر: 3724 --- حکم البانی: صحيح... عبداللہ بن عباس ؓ سے روایت ہے کہ نبی اکرم ﷺ نے فرمایا : ” صدقہ دے کر واپس لینے والے کی مثال کتے کی طرح ہے جو قے کرتا ہے اور دوبارہ اسی قے کو کھا لیتا ہے “ ۔ ... (ص/ح)

حدیث نمبر: 3626 --- حکم البانی: صحيح... عمرو بن حارث ؓ کہتے ہیں کہ میں نے رسول اللہ ﷺ کو دیکھا (آپ نے اپنے انتقال کے موقع پر) اپنے « شہباء » خچر ، ہتھیار اور اپنی زمین کے علاوہ جسے آپ صدقہ کر گئے تھے کچھ نہ چھوڑ کر گئے ۔ ... (ص/ح)

حدیث نمبر: 3625 --- حکم البانی: صحيح... عمرو بن حارث کہتے ہیں کہ رسول اللہ ﷺ سوائے اپنے سفید خچر ، ہتھیار اور زمین کے جسے آپ صدقہ کر گئے تھے کچھ چھوڑ کر نہ گئے تھے ۔ ... (ص/ح)

حدیث نمبر: 2463 --- حکم البانی: صحيح... جریر ؓ کہتے ہیں کہ رسول اللہ ﷺ نے فرمایا : ” جب صدقہ وصول کرنے والا تمہارے پاس آئے تو وہ اس حال میں لوٹے کہ وہ تم سے راضی ہو “ ۔ ... (ص/ح)

حدیث نمبر: 2325 --- حکم البانی: حسن... ام المؤمنین عائشہ ؓ کہتی ہیں کہ ایک بار رسول اللہ ﷺ گھوم کر میرے پاس آئے اور پوچھا : ” تمہارے پاس کوئی چیز (کھانے کی) ہے ؟ “ میں نے عرض کیا ، میرے پاس کوئی چیز نہیں ہے ، آپ ﷺ نے فرمایا : ” پھر تو میں روزہ رکھ لیتا ہوں “ ، پھر ایک اور بار میرے پاس آئے ، اس وقت ہمارے پاس حیس ہدیہ میں آیا ہوا تھا ، تو میں اسے لے کر آپ کے پاس حاضر ہوئی تو آپ نے اسے کھایا ، تو مجھے اس بات سے حیرت ہوئی ، میں نے عرض کیا : اللہ کے رسول ! آپ ہمارے پاس آئے تو روزہ سے تھے پھر بھی آپ ﷺ نے حیس کھا لیا ؟ آپ نے فرمایا : ” ہاں عائشہ ! جس نے کوئی روزہ رکھا لیکن وہ روزہ رمضان کا یا رمضان کی قضاء کا نہ ہو ، یا نفلی روزہ ہو تو وہ اس شخص کی طرح ہے جس نے اپنے مال میں سے (نفلی) صدقہ نکالا ، پھر اس میں سے جتنا چاہا سخاوت کر کے دے دیا اور جو بچ رہا بخیلی کر کے اسے روک لیا “ ۔ ... (ص/ح)

حدیث نمبر: 2095 --- حکم البانی: صحيح... انس بن مالک ؓ کہتے ہیں : ہم رسول اللہ ﷺ کے پاس مسجد میں بیٹھے تھے کہ اسی دوران ایک شخص اونٹ پر سوار آیا ، اس نے اسے مسجد میں بٹھا کر باندھا (اور) لوگوں سے پوچھا : تم میں محمد کون ہیں ؟ اور آپ ﷺ لوگوں کے درمیان ٹیک لگائے ہوئے تھے ۔ ہم نے اس سے کہا : یہ گورے چٹے آدمی ہیں جو ٹیک لگائے ہوئے ہیں ، تو (اس) شخص نے (پکار کر) آپ سے کہا : اے عبدالمطلب کے بیٹے ! تو رسول اللہ ﷺ نے اس سے فرمایا : ” میں نے تمہاری بات سن لی “ ، (کہو کیا کہنا چاہتے ہو) تو اس شخص نے کہا : اے محمد ! میں آپ سے کچھ پوچھنے والا ہوں (اور ذرا) سختی سے پوچھوں گا ، تو آپ ﷺ نے فرمایا : ” پوچھو جو تم پوچھنا چاہتے ہو “ ، تو اس آدمی نے کہا : میں آپ کو آپ کے ، اور آپ سے پہلے (جو گزر چکے ہیں) کے رب کی قسم دلاتا ہوں ! کیا اللہ تعالیٰ نے آپ کو تمام لوگوں کی طرف (رسول بنا کر) بھیجا ہے ؟ تو رسول اللہ ﷺ نے کہا : ” اے اللہ ! (گواہ رہنا) ہاں “ ، پھر اس نے کہا : میں آپ کو اللہ کی قسم دلاتا ہوں ! کیا اللہ تعالیٰ نے آپ کو سال کے اس ماہ کے روزے رکھنے کا حکم دیا ہے ؟ تو رسول اللہ ﷺ نے فرمایا : ” اے اللہ ! (گواہ رہنا !) ہاں “ ، (پھر) اس نے کہا : میں آپ کو اللہ کی قسم دلاتا ہوں ، کیا اللہ تعالیٰ نے آپ کو حکم دیا ہے کہ آپ ہمارے مالداروں سے یہ صدقہ لو اور اسے ہمارے غریبوں میں تقسیم کرو ، تو رسول اللہ ﷺ نے فرمایا : ” اے اللہ ! (گواہ رہنا) ہاں “ ، تب (اس) شخص نے کہا : میں آپ کی لائی ہوئی (شریعت) پہ ایمان لایا ، میں اپنی قوم کا جو میرے پیچھے ہے قاصد ہوں ، اور میں بنی سعد بن بکر کا فرد ضمام بن ثعلبہ ہوں ۔ عبیداللہ بن عمر نے ابن عجلان کی مخالفت کی ہے ۔ ... (ص/ح)

حدیث نمبر: 1786 --- حکم البانی: صحيح... ام المؤمنین عائشہ ؓ کہتی ہیں کہ رسول اللہ ﷺ نے فرمایا : ” جو کوئی رات میں کسی نماز کا عادی ہو ، اور کسی رات وہ نیند کی وجہ سے اسے نہ پڑھ سکے ، تو یہ اس پر اللہ کی طرف سے کیا ہوا صدقہ ہو گا ، اور وہ اس کے لیے اس کی نماز کا اجر لکھے گا “ ۔ ... (ص/ح)