حدیث نمبر: 2524 --- حکم البانی: صحيح... ابوہریرہ ؓ کہتے ہیں کہ رسول اللہ ﷺ نے فرمایا : ” ایک شخص نے کہا : میں ضرور صدقہ دوں گا ، تو وہ اپنا صدقہ لے کر نکلا اور اس نے اسے ایک چور کے ہاتھ میں رکھ دیا ، صبح کو لوگ باتیں کرنے لگے کہ ایک چور کو صدقہ دیا گیا ہے ، اس نے کہا : اللہ تیرا شکر ہے چور کے ہاتھ میں چلے جانے پر بھی ، میں اور بھی صدقہ دوں گا چنانچہ (دوسرے دن بھی) وہ اپنا صدقہ لے کر نکلا اور اس نے اسے لے جا کر ایک زانیہ عورت کے ہاتھ پر رکھ دیا ۔ صبح کو لوگ باتیں کرنے لگے کہ آج رات ایک زانیہ کو صدقہ دیا گیا ہے ۔ تو اس نے پھر کہا : اللہ تیرا شکر ہے زانیہ کے ہاتھ میں چلے جانے پر بھی ، میں پھر صدقہ دوں گا ، چنانچہ (تیسرے دن) پھر وہ صدقہ کا مال لے کر نکلا ، اور ایک مالدار شخص کو تھما آیا ، پھر صبح کو لوگ باتیں کرنے لگے کہ ایک مالدار شخص کو صدقہ کیا گیا ہے ، اس نے کہا : اللہ تیرا شکر ہے ، زانیہ ، چور اور مالدار کو دے دینے پر بھی ۔ تو خواب میں اس کے پاس آ کر کہا گیا : رہا تیرا صدقہ تو وہ قبول کر لیا گیا ہے ، رہی زانیہ تو (صدقہ پا کر) شاید وہ زناکاری سے باز آ جائے اور رہا چور تو صدقہ پا کر شاید وہ اپنی چوری سے باز آ جائے ، اور رہا مالدار آدمی (تو صدقہ پا کر) شاید وہ اس سے سبق سیکھے اور اللہ عزوجل نے اسے جو دولت دے رکھی ہے اس میں سے خرچ کرنے لگے “ ۔ ... (ص/ح)

حدیث نمبر: 2329 --- ‏‏‏‏ ابوالاسود دیلی سے روایت ہے کہ سیدنا ابوذر ؓ نے کہا کہ چند اصحاب ؓ ، نبی ﷺ کے پاس آئے اور عرض کی اے اللہ کے رسول ! مال والے سب مال لوٹ لے گئے ، اس لیے کہ وہ نماز پڑھتے ہیں جیسے ہم پڑھتے ہیں اور روزہ رکھتے ہیں جیسے ہم روزہ رکھتے ہیں اور صدقہ دیتے ہیں اپنے زائد مالوں سے ۔ آپ ﷺ نے فرمایا : ” تمہارے لیے بھی تو اللہ تعالیٰ نے صدقہ کا سامان کر دیا ہے کہ ہر تسبیح صدقہ ہے اور ہر تکبیر صدقہ ہے اور ہر تحمید صدقہ ہے اور ہر بار لا الہ الااللہ کہنا صدقہ ہے اور اچھی بات سکھانا صدقہ ہے اور بری بات سے روکنا صدقہ ہے اور ہر شخص کے بدن کے ٹکڑے میں صدقہ ہے ۔ “ لوگوں نے عرض کی کہ یا رسول اللہ ! ہم میں سے کوئی شخص اپنے بدن سے اپنی شہوت نکالتا ہے (یعنی اپنی بی بی سے صحبت کرتا ہے) تو کیا اس میں ثواب ہے ؟ آپ ﷺ نے فرمایا : ” کیوں نہیں دیکھو تو اگر اسے حرام میں صرف کر لے تو وبال ہوا کہ نہیں ؟ اسی طرح جب حلال میں صرف کرتا ہے تو ثواب ہوتا ہے ۔ “

حدیث نمبر: 1511 --- ہم سے ابوالنعمان نے بیان کیا ‘ انہوں نے کہا کہ ہم سے حماد بن زید نے بیان کیا ‘ انہوں نے کہا کہ ہم سے ایوب نے بیان کیا ‘ ان سے نافع نے بیان کیا اور ان سے عبداللہ بن عمر ؓ نے کہ نبی کریم ﷺ نے صدقہ فطر یا یہ کہا کہ صدقہ رمضان مرد ، عورت ، آزاد اور غلام (سب پر) ایک صاع کھجور یا ایک صاع جَو فرض قرار دیا تھا ۔ پھر لوگوں نے آدھا صاع گیہوں اس کے برابر قرار دے لیا ۔ لیکن ابن عمر ؓ کھجور دیا کرتے تھے ۔ ایک مرتبہ مدینہ میں کھجور کا قحط پڑا تو آپ نے جو صدقہ میں نکالا ۔ ابن عمر ؓ چھوٹے بڑے سب کی طرف سے یہاں تک کہ میرے بیٹوں کی طرف سے بھی صدقہ فطر نکالتے تھے ۔ ابن عمر ؓ صدقہ فطر ہر فقیر کو جو اسے قبول کرتا ، دے دیا کرتے تھے ۔ اور لوگ صدقہ فطر ایک یا دو دن پہلے ہی دے دیا کرتے تھے ۔ امام بخاری رحمہ اللہ نے کہا میرے بیٹوں سے نافع کے بیٹے مراد ہیں ۔ امام بخاری رحمہ اللہ نے کہا وہ عید سے پہلے جو صدقہ دے دیتے تھے تو اکٹھا ہونے کے لیے نہ فقیروں کے لیے (پھر وہ جمع کر کے فقراء میں تقسیم کر دیا جاتا) ۔ ... حدیث متعلقہ ابواب: صدقہ فطر ادا کرنے کا وقت آخری روزہ افطار کرنے کے بعد شروع ہوتا ہے ، لیکن عید سے ایک یا دو دن پہلے ادا کیا جا سکتا ہے ۔ صدقہ فطر گھر کے سر پرست کو گھر کے تمام افراد بیوی ، بچوں اور ملازموں کی طرف سے ادا کرنا چاہئے ۔ صدقہ فطر مرد و زن سب پر واجب ہے ۔

حدیث نمبر: 2803 --- رقم الحديث ترقيم الباني: 575... سیدنا ابوذر ؓ بیان کرتے ہیں کہ رسول اللہ ﷺ نے فرمایا : ”ہر روز ، جس میں سورج طلوع ہوتا ہے ، ہر نفس پر صدقہ کرنا ضروری ہے ۔ “ میں نے کہا : اے اللہ کے رسول ! میں کیسے صدقہ کروں ، میرے پاس تو مال نہیں ہے ؟ آپ ﷺ نے فرمایا : ” (‏‏‏‏صدقہ صرف مال کا خرچ کرنا ہی نہیں ہے بلکہ) یہ بھی صدقہ کی اقسام ہیں : « اللہ أكبر » کہنا ، « سبحان اللہ » کہنا ، « اَلْحَمْدُ لِلّٰہِ » کہنا ، « لَا إِلَـٰہَ إِلَّا اللَّـہُ » کہنا ، « استغفر اللہ » کہنا ، نیکی کا حکم دینا ، برائی سے منع کرنا ، لوگوں کی گزرگاہوں سے کانٹا ، پتھر اور ہڈی ہٹانا ، نابینے کی رہنمائی کرنا ، بہروں اور گونگوں کو اس اہل بنانا کہ وہ بات سمجھ سکیں ، رہنمائی طلب کرنے والے کسی ضرورت مند کی رہنمائی کرنا ، مدد کے لیے پکارنے والے مصیبت زدہ کی (‏‏‏‏مدد کرنے کے لیے) اس کی طرف دوڑ کر جانا ، کمزور آدمی کا بھرپور انداز میں تعاون کرنا ۔ یہ صدقہ کی اقسام ہیں ، ان کے ذریعے تو اپنے آپ پر صدقہ کر سکتا ہے ۔ اور بیوی سے جماع کرنے میں بھی اجر ہے ۔ “ سیدنا ابوذر ؓ نے کہا : جنسی شہوت پوری کرنے میں کون سا اجر ہے ؟ آپ ﷺ نے فرمایا : ”ذرا بتلاؤ کہ اگر تیرا بیٹا ہو ، وہ نوجوان ہو جائے اور تجھے اس کی خیر و بھلائی کی ا‏‏‏‏مید ہو ، لیکن وہ فوت ہو جائے تو کیا تو اس کی وفات پر ثواب کی توقع کے ساتھ صبر کرے گا ؟ “ میں نے کہا : جی ہاں ۔ آپ ﷺ نے پوچھا : ”کیا تو نے اسے پیدا کیا ؟ “ میں نے کہا : نہیں ، اسے تو اللہ تعالیٰ نے پیدا کیا ۔ آپ ﷺ نے پوچھا : ”کیا تو نے اسے ہدایت دی ؟ “ میں نے کہا : نہیں ، اسے تو اللہ نے ہدایت دی ۔ آپ ﷺ نے پوچھا : ”کیا تو نے اسے رزق دیا ؟ “ میں نے کہا : نہیں ، اللہ تعالیٰ نے اسے رزق دیا ۔ آپ ﷺ نے فرمایا : ”بس اسی طرح اپنے (عضو مخصوص) کو حلال جگہ کے لیے استعمال کر اور حرام سے بچا ۔ اگر اللہ نے چاہا تو اسے زندہ رکھے گا اور چاہا تو اسے مار دے گا اور تجھے اجر ملے گا ۔ “

حدیث نمبر: 2537 --- حکم البانی: حسن الإسناد... ابو سعید خدری ؓ کہتے ہیں کہ ایک شخص جمعہ کے دن مسجد میں داخل ہوا ، رسول اللہ ﷺ جمعہ کا خطبہ دے رہے تھے ، تو آپ نے فرمایا : ” تم دو رکعتیں پڑھو “ ، پھر وہ شخص دوسرے جمعہ کو بھی آیا اور نبی اکرم ﷺ خطبہ دے رہے تھے ، تو آپ نے فرمایا : ” تم دو رکعتیں پڑھو “ ، پھر وہ تیسرے جمعہ کو (بھی) آیا ، آپ نے فرمایا : ” دو رکعتیں پڑھو “ ، پھر آپ نے لوگوں سے فرمایا : ” صدقہ دو “ ، تو لوگوں نے صدقہ دیا ، تو آپ نے اس شخص کو دو کپڑے دئیے ، پھر آپ نے پھر فرمایا : ” لوگو صدقہ دو “ ، تو اس شخص نے اپنے ان دونوں کپڑوں میں سے ایک کو آپ کے سامنے ڈال دیا ، رسول اللہ ﷺ نے فرمایا : کیا تم لوگوں نے اس شخص کو نہیں دیکھا ؟ یہ خستہ حالت میں مسجد میں آیا ، میں نے امید کی کہ تم لوگ اسے دیکھ کر اس کی خستہ حالی کو تاڑ لو گے اور اسے صدقہ دو گے ، لیکن تم لوگوں نے ایسا نہیں کیا ، تو مجھ ہی کو کہنا پڑا کہ تم صدقہ دو ، تو تم لوگوں نے صدقہ دیا تو میں نے اسے دو کپڑے دئیے ، پھر لوگوں سے کہا : ” صدقہ دو “ ، تو اس نے ان کپڑوں میں سے (جو ہم نے اسے دیے تھے) ایک (ہمارے آگے) ڈال دیا ، (ارے بیوقوف) تم اپنا کپڑا لے لو ، آپ نے اسے ڈانٹا ۔ ... (ص/ح)

حدیث نمبر: 486 --- رقم الحديث ترقيم الباني: 577... سیدنا ابوذر ؓ سے روایت ہے ، رسول اللہ ﷺ نے فرمایا : ” تم میں سے ہر شخص کے ہر عضو پر صدقہ (واجب) ہے ، ہر مرتبہ « سبحان اللہ » کہنا صدقہ ہے اور ہر مرتبہ « الحمدللہ » کہنا صدقہ ہے اور ہر مرتبہ « لا إلہ إلا اللہ » کہنا صدقہ ہے اور ہر مرتبہ « اللہ اكبر » کہنا صدقہ ہے ، نیکی کا حکم دینا صدقہ ہے اور برائی سے روکنا صدقہ ہے اور ان سب سے وہ دو رکعتیں کافی ہو جائیں گی جو کوئی شخص چاشت کے وقت ادا کرے گا ۔ “

حدیث نمبر: 2335 --- ‏‏‏‏ سیدنا ابوہریرہ ؓ نے رسول اللہ ﷺ سے بہت راویتیں کیں انہی میں یہ بھی ہے کہ آپ ﷺ نے فرمایا : ” ہر آدمی کے ایک ایک جوڑ پر صدقہ واجب ہوتا ہے ہر روز جب آفتاب نکلتا ہے تو دو آدمیوں میں انصاف کر دینا یہ بھی ایک صدقہ ہے ، کسی کی مدد کر دینا اتنی بھی کہ اسے سواری پر چڑھا دیا ، یا اس کا مال لاد دیا یہ بھی ایک صدقہ ہے ۔ “ اور فرمایا ” عمدہ بات ، یہ بھی ایک صدقہ ہے اور ہر قدم جو وہ مسجد کو جاتے ہوئے رکھتا ہے نماز کیلئے یہ بھی ایک صدقہ ہے اور تکلیف کی چیز راہ سے ہٹا دینا یہ بھی ایک صدقہ ہے ۔ “

حدیث نمبر: 2355 --- ‏‏‏‏ سیدنا ابومسعود ؓ نے کہا : ہم کو حکم ہوا صدقہ کا اور ہم بوجھ ڈھویا کرتے تھے اور صدقہ دیا ابوعقیل نے آدھا صاع (یعنی دو سیر) اور ایک شخص نے کچھ اس سے زیادہ دیا تو منافق کہنے لگے : اللہ کو اس کے صدقہ کی کچھ پروا نہیں ہے اور اس دوسرے نے تو صرف دکھانے ہی کو صدقہ دیا ہے پھر یہ آیت اتری « الَّذِينَ يَلْمِزُونَ الْمُطَّوِّعِينَ مِنَ الْمُؤْمِنِينَ فِى الصَّدَقَاتِ وَالَّذِينَ لاَ يَجِدُونَ إِلاَّ جُہْدَہُمْ » ” جو لوگ طعن کرتے ہیں ۔ خوشی سے صدقہ دینے والے مؤمنوں کو اور ان لوگوں کو جو نہیں پاتے ہیں مگر اپنی مزدوری ۔ “ اور بشر کی روایت میں « مطوعين » کا لفظ نہیں ہے ۔

حدیث نمبر: 2808 --- رقم الحديث ترقيم الباني: 876... سیدنا عبداللہ بن عباس ؓ سے روایت ہے ، رسول اللہ ﷺ نے فرمایا : ”آدم کے بیٹے میں کل تین سو ساٹھ (‏‏‏‏۳۶۰) جوڑ یا ہڈیاں ہوتی ہیں ، ہر روز ہر جوڑ کی طرف سے صدقہ ادا کرنا ہوتا ہے ۔ (‏‏‏‏صدقے کی چند اقسام یہ ہیں) ہر اچھی بات صدقہ ہے ، آدمی کا اپنے بھائی کی مدد کرنا صدقہ ہے ، پانی کا ایک گھونٹ پلانا صدقہ ہے اور راستے سے تکلیف دہ چیز ہٹانا صدقہ ہے ۔ “

حدیث نمبر: 2359 --- ‏‏‏‏ سیدنا ابوہریرہ ؓ نے نبی کریم ﷺ سے روایت کی کہ فرمایا : ” مثال خرچ کرنے والے کی اور صدقہ دینے والے کی (یہاں راوی سے غلطی ہوئی اور صحیح یہ ہے کہ مثال بخیل کی اور صدقہ دینے والے کی) مانند اس شخص کی ہے کہ اس کے اوپر دو کرتے ہوں یا دو زرہیں (راوی کو شک ہے مگر دو زرہیں صحیح ہے) ان دونوں کی چھاتی سے گلے تک پھر جب خرچ کرنے والا چاہے اور دوسرے راوی نے کہا کہ جب صدقہ دینے والا صدقہ دینا چاہے تو وہ زرہ کشادہ ہو جائے اور اس کے سارے بدن پر پھیل جائے (یعنی اسی طرح صدقہ دینے والے کا دل کشادہ ہو جاتا ہے) اور جی کھول کر اللہ کی راہ میں خرچ کرتا ہے اور جب بخیل خرچ کرنا چاہے تو وہ زرہ اس پر تنگ ہو جائے اور ہر حلقہ اپنی جگہ پر کس جائے یہاں تک کہ ڈھانپ لے اس کے پورں تک کو اور مٹا دے اس کے قدموں کے نشان کو جو زمین پر ہوں ۔ “ اور سیدنا ابوہریرہ ؓ نے کہا کہ وہ اس کو کشادہ کرنا چاہتا ہے مگر کشادہ نہیں ہوتا ۔