حدیث نمبر: 3515 --- حکم البانی: صحيح... جابر ؓ کہتے ہیں کہ انصار کا آل عمرو بن حزم نامی گھرانہ زہریلے ڈنک پر جھاڑ پھونک کیا کرتا تھا ، جبکہ رسول اللہ ﷺ نے جھاڑ پھونک کرنے سے منع فرمایا تھا ، چنانچہ ان لوگوں نے آپ کی خدمت میں حاضر ہو کر عرض کیا کہ اللہ کے رسول ! آپ نے دم کرنے سے روک دیا ہے حالانکہ ہم لوگ زہریلے ڈنک پر جھاڑ پھونک کرتے ہیں ؟ تو آپ ﷺ نے فرمایا : ” اپنا جھاڑ پھونک (منتر) مجھے سناؤ “ ، تو انہوں نے آپ ﷺ کو پڑھ کر سنایا ، آپ ﷺ نے فرمایا : ” اس میں کوئی مضائقہ نہیں ، یہ تو « اقرارات ہیں » (یعنی ثابت شدہ ہیں) “ ۔ ... (ص/ح)

حدیث نمبر: 3418 --- حکم البانی: صحيح... ابو سعید خدری ؓ کہتے ہیں کہ رسول اللہ ﷺ کے اصحاب کی ایک جماعت ایک سفر پر نکلی اور عرب کے قبائل میں سے کسی قبیلے کے پاس وہ لوگ جا کر ٹھہرے اور ان سے مہمان نوازی طلب کی تو انہوں نے مہمان نوازی سے انکار کر دیا وہ پھر اس قبیلے کے سردار کو سانپ یا بچھو نے کاٹ (ڈنک مار دیا) کھایا ، انہوں نے ہر چیز سے علاج کیا لیکن اسے کسی چیز سے فائدہ نہیں ہو رہا تھا ، تب ان میں سے ایک نے کہا : اگر تم ان لوگوں کے پاس آتے جو تمہارے یہاں آ کر قیام پذیر ہیں ، ممکن ہے ان میں سے کسی کے پاس کوئی چیز ہو جو تمہارے ساتھی کو فائدہ پہنچائے (وہ آئے) اور ان میں سے ایک نے کہا : ہمارا سردار ڈس لیا گیا ہے ہم نے اس کی شفایابی کے لیے ہر طرح کی دوا دارو کر لی لیکن کوئی چیز اسے فائدہ نہیں دے رہی ہے ، تو کیا تم میں سے کسی کے پاس جھاڑ پھونک قسم کی کوئی چیز ہے جو ہمارے (ساتھی کو شفاء دے) ؟ تو اس جماعت میں سے ایک شخص نے کہا : ہاں ، میں جھاڑ پھونک کرتا ہوں ، لیکن بھائی بات یہ ہے کہ ہم نے چاہا کہ تم ہمیں اپنا مہمان بنا لو لیکن تم نے ہمیں اپنا مہمان بنانے سے انکار کر دیا ، تو اب جب تک اس کا معاوضہ طے نہ کر دو میں جھاڑ پھونک کرنے والا نہیں ، انہوں نے بکریوں کا ایک گلہ دینے کا وعدہ کیا تو وہ (صحابی) سردار کے پاس آئے اور سورۃ فاتحہ پڑھ کر تھوتھو کرتے رہے یہاں تک کہ وہ شفایاب ہو گیا ، گویا وہ رسی کی گرہ سے آزاد ہو گیا ، تو ان لوگوں نے جو اجرت ٹھہرائی تھی وہ پوری پوری دے دی ، تو صحابہ نے کہا : لاؤ اسے تقسیم کر لیں ، تو اس شخص نے جس نے منتر پڑھا تھا کہا : نہیں ابھی نہ کرو یہاں تک کہ ہم رسول اللہ ﷺ کے پاس آئیں اور آپ سے پوچھ لیں تو وہ لوگ رسول اللہ ﷺ کے پاس آئے اور آپ سے پورا واقعہ ذکر کیا ، آپ ﷺ نے ان سے پوچھا : ” تم نے کیسے جانا کہ یہ جھاڑ پھونک ہے ؟ تم نے اچھا کیا ، اپنے ساتھ تم میرا بھی ایک حصہ لگانا “ ۔ ... (ص/ح)

حدیث نمبر: 3888 --- حکم البانی: ضعيف الإسناد... سہل بن حنیف ؓ کہتے ہیں کہ ہم ایک ندی پر سے گزرے تو میں نے اس میں غسل کیا ، اور بخار لے کر باہر نکلا ، اس کی خبر رسول اللہ ﷺ کو پہنچی تو آپ نے فرمایا : ” ابوثابت کو شیطان سے پناہ مانگنے کے لیے کہو “ ۔ عثمان کی دادی کہتی ہیں کہ میں نے عرض کیا : میرے آقا ! جھاڑ پھونک بھی تو مفید ہے ، اس پر آپ ﷺ نے فرمایا : ” جھاڑ پھونک تو صرف نظر بد کے لیے یا سانپ کے ڈسنے یا بچھو کے ڈنک مارنے کے لیے ہے (ان کے علاوہ جو بیماریاں ہیں ان میں دوا یا دعا کام آتی ہے) “ ۔ ابوداؤد کہتے ہیں : « حمہ » سانپ کے ڈسنے کو کہتے ہیں ۔ ... (ص/ح)

حدیث نمبر: 2063 --- حکم البانی: صحيح ، ابن ماجة ( 2156 ) ... ابو سعید خدری ؓ کہتے ہیں کہ رسول اللہ ﷺ نے ہمیں ایک سریہ میں بھیجا ، ہم نے ایک قوم کے پاس پڑاؤ ڈالا اور ان سے ضیافت کی درخواست کی ، لیکن ان لوگوں نے ہماری ضیافت نہیں کی ، اسی دوران ان کے سردار کو بچھو نے ڈنک مار دیا ، چنانچہ انہوں نے ہمارے پاس آ کر کہا : کیا آپ میں سے کوئی بچھو کے ڈنک سے جھاڑ پھونک کرتا ہے ؟ میں نے کہا : ہاں ، میں کرتا ہوں ، لیکن اس وقت تک نہیں کروں گا جب تک کہ تم مجھے کچھ بکریاں نہ دے دو ، انہوں نے کہا : ہم تم کو تیس بکریاں دیں گے ، چنانچہ ہم نے قبول کر لیا اور میں نے سات بار سورۃ فاتحہ پڑھ کر اس پر دم کیا تو وہ صحت یاب ہو گیا اور ہم نے بکریاں لے لیں ، ہمارے دل میں بکریوں کے متعلق کچھ خیال آیا ، لہٰذا ہم نے کہا : جلدی نہ کرو ، یہاں تک کہ ہم رسول اللہ ﷺ کے پاس پہنچ جائیں ، جب ہم آپ ﷺ کے پاس پہنچے تو میں نے جو کچھ کیا تھا آپ سے بیان کر دیا ، آپ نے فرمایا : ” تم نے کیسے جانا کہ سورۃ فاتحہ رقیہ (جھاڑ پھونک کی دعا) ہے ؟ تم لوگ بکریاں لے لو اور اپنے ساتھ اس میں میرا بھی حصہ لگاؤ “ ۔ امام ترمذی کہتے ہیں : ۱- یہ حدیث حسن ہے ، ۲- شعبہ ، ابو عوانہ ہشام اور کئی لوگوں نے یہ حدیث « عن أبي المتوكل عن أبي سعيد عن النبي صلى اللہ عليہ وسلم » کی سند سے روایت کی ہے ، ۳- تعلیم قرآن پر معلم کے لیے اجرت لینے کو امام شافعی نے جائز کہا ہے اور وہ معلم کے لیے اجرت کی شرط لگانے کو درست سمجھتے ہیں ، انہوں نے اسی حدیث سے استدلال کیا ہے ۔ ... (ص/ح)

حدیث نمبر: 2055 --- حکم البانی: صحيح ، ابن ماجة ( 3489 ) ... مغیرہ بن شعبہ ؓ کہتے ہیں کہ رسول اللہ ﷺ نے فرمایا : ” جس نے بدن داغا یا جھاڑ پھونک کرائی وہ توکل کرنے والوں میں سے نہ رہا “ ۔ امام ترمذی کہتے ہیں : ۱- یہ حدیث حسن صحیح ہے ، ۲- اس باب میں ابن مسعود ، ابن عباس اور عمران بن حصین ؓ سے بھی احادیث آئی ہیں ۔ ... (ض)

حدیث نمبر: 3516 --- حکم البانی: صحيح... انس ؓ سے روایت ہے کہ نبی اکرم ﷺ نے زہریلے ڈنک ، نظر بد اور نملہ پر جھاڑ پھونک کی اجازت دی ہے ۔ ... (ص/ح)

حدیث نمبر: 2065 --- حکم البانی: ضعيف ، ابن ماجة ( 3437 ) // ضعيف سنن ابن ماجة برقم ( 749 ) ، وسيأتي برقم ( 379 / 2252 ) //... ابوخزامہ اپنے والد سے روایت کرتے ہیں ، وہ کہتے ہیں کہ میں نے رسول اللہ ﷺ سے پوچھا : اللہ کے رسول ! جس دم سے ہم جھاڑ پھونک کرتے ہیں ، جس دوا سے علاج کرتے ہیں اور جن بچاؤ کی چیزوں سے ہم اپنا بچاؤ کرتے ہیں (ان کے بارے میں آپ کا کیا خیال ہے ؟) کیا یہ اللہ کی تقدیر میں کچھ تبدیلی کرتی ہیں ؟ آپ نے فرمایا : ” یہ سب بھی اللہ کی لکھی ہوئی تقدیر ہی کا حصہ ہیں “ ۔ ... (ض)

حدیث نمبر: 3519 --- حکم البانی: ضعيف الإسناد... عمرو بن حزم ؓ کہتے ہیں کہ میں نے رسول اللہ ﷺ کے پاس سانپ کے ڈسے ہوئے کو پیش کیا ، تو آپ ﷺ نے اس پر دم (جھاڑ پھونک) کرنے کی اجازت دے دی ۔ ... (ض)

حدیث نمبر: 2059 --- حکم البانی: صحيح ، ابن ماجة ( 3510 ) ... عبید بن رفاعہ زرقی ؓ سے روایت ہے کہ اسماء بنت عمیس ؓ نے عرض کیا : اللہ کے رسول ! جعفر طیار ؓ کے لڑکوں کو بہت جلد نظر بد لگ جاتی ہے ، کیا میں ان کے لیے جھاڑ پھونک کراؤں ؟ آپ نے فرمایا : ” ہاں ، اس لیے کہ اگر کوئی چیز تقدیر پر سبقت کر سکتی تو اس پر نظر بد ضرور سبقت کرتی “ ۔ امام ترمذی کہتے ہیں : ۱- یہ حدیث حسن صحیح ہے ، ۲- یہ حدیث « عن أيوب عن عمرو بن دينار عن عروۃ بن عامر عن عبيد بن رفاعۃ عن أسماء بنت عميس عن النبي صلى اللہ عليہ وسلم » کی سند سے بھی مروی ہے ، ۳- اس باب میں عمران بن حصین اور بریدہ ؓ سے بھی احادیث آئی ہیں ۔ ... (ص/ح)

حدیث نمبر: 2064 --- حکم البانی: صحيح انظر ما قبله ( 2063 ) ... ابو سعید خدری ؓ کہتے ہیں کہ کچھ صحابہ (جن میں شامل میں بھی تھا) عرب کے ایک قبیلہ کے پاس سے گزرے ، انہوں نے ان کی مہمان نوازی نہیں کی ، اسی دوران ان کا سردار بیمار ہو گیا ، چنانچہ ان لوگوں نے ہمارے پاس آ کر کہا : آپ لوگوں کے پاس کوئی علاج ہے ؟ ہم نے کہا : ہاں ، لیکن تم نے ہماری مہمان نوازی نہیں کی ہے اس لیے ہم اس وقت تک علاج نہیں کریں گے جب تک تم ہمارے لیے اجرت نہ متعین کر دو ، انہوں نے اس کی اجرت میں بکری کا ایک گلہ مقرر کیا ، ہم میں سے ایک آدمی (یعنی میں خود) اس کے اوپر سورۃ فاتحہ پڑھ کر دم کرنے لگا تو وہ صحت یاب ہو گیا ، پھر جب ہم نبی اکرم ﷺ کے پاس آئے اور آپ سے اس واقعہ کو بیان کیا تو آپ نے فرمایا : ” تمہیں کیسے معلوم ہوا کہ سورۃ فاتحہ جھاڑ پھونک (کی دعا) ہے ؟ ابو سعید خدری ؓ نے آپ سے اس پر کوئی نکیر ذکر نہیں کی ، آپ نے فرمایا : ” کھاؤ اور اپنے ساتھ اس میں میرا بھی حصہ لگاؤ “ ۔ امام ترمذی کہتے ہیں : ۱- یہ حدیث صحیح ہے ، ۲- یہ حدیث اعمش کی اس روایت سے جو جعفر بن ایاس کے واسطہ سے آئی ہے زیادہ صحیح ہے ، ۳- کئی لوگوں نے یہ حدیث « عن أبي بشر جعفر بن أبي وحشيۃ عن أبي المتوكل عن أبي سعيد » کی سند سے روایت کی ہے ۔ ... (ص/ح)