سیدنا ابو موسیٰ اشعری رضی اللہ عنہ فرماتے ہیں کہ ایک شخص نبی صلی اللہ علیہ وسلم کے پاس آیا، اس نے عرض کی کہ ایک شخص مالِ غنیمت کے لیے لڑتا ہے، دوسرا شہرت کے لیے اور تیسرا ریاکاری کے لیے لڑتا ہے، تو ان میں سے اللہ کے راستے میں کون ہے؟ آپ صلی اللہ علیہ وسلم نے فرمایا: ”جو اللہ کے کلمے کو سربلندی کے لیے نکلے، وہ اللہ کے راستے میں ہے۔“ [السنن الكبرى للبيهقي/كِتَابُ السِّيَرِ/حدیث: 18544]

ابو موسیٰ اشعری رضی اللہ عنہ فرماتے ہیں کہ آپ صلی اللہ علیہ وسلم کے پاس ایک شخص آیا اور اس نے کہا: ”اے اللہ کے رسول صلی اللہ علیہ وسلم ! ایک شخص بہادری کے لیے، دوسرا عصبیت کے لیے اور تیسرا ریا کاری کے لیے جہاد کرتا ہے، تو ان میں سے کون اللہ کے راستے میں ہے؟“ آپ صلی اللہ علیہ وسلم نے فرمایا: ”جو صرف اس لیے لڑائی کرے تاکہ اللہ کا کلمہ بلند ہو جائے، وہی اللہ کے راستے میں ہے۔“ [السنن الكبرى للبيهقي/كِتَابُ السِّيَرِ/حدیث: 18545]

ابوموسیٰ اشعری رضی اللہ عنہ فرماتے ہیں کہ ایک شخص رسول اللہ صلی اللہ علیہ وسلم کے پاس آیا۔۔۔ باقی اسی طرح حدیث ذکر کی۔ [السنن الكبرى للبيهقي/كِتَابُ السِّيَرِ/حدیث: 18546]

سیدنا معاذ بن جبل رضی اللہ عنہ رسول اللہ صلی اللہ علیہ وسلم سے نقل فرماتے ہیں کہ: ”غزوہ دو قسم کا ہے؛ وہ شخص جو اللہ کی رضا مندی کے لیے اور امیر کی اطاعت میں پسندیدہ چیز کو خرچ کرتا ہے اور اپنے ساتھی سے مل کر رہتا ہے اور فساد سے بچتا ہے، اس کے سونے اور بیدار رہنے میں اجر ہے، اور جس نے فخر، ریاکاری، شہرت، امام کی نافرمانی اور زمین میں فساد کرنے کی کوشش کی، وہ برابری کے ساتھ بھی نہ لوٹے گا۔“
(ب) ابوبحریہ عبداللہ بن قیس رحمہ اللہ فرماتے ہیں:۔۔۔ جس کے آخر میں ہے کہ ”جس نے امام کی نافرمانی کی اور اپنی پسندیدہ چیز خرچ نہ کی، وہ برابری کے ساتھ بھی نہ لوٹے گا۔“ [السنن الكبرى للبيهقي/كِتَابُ السِّيَرِ/حدیث: 18547]

سیدنا عبداللہ بن عمرو رضی اللہ عنہما فرماتے ہیں کہ اے اللہ کے رسول صلی اللہ علیہ وسلم ! مجھے جہاد اور غزوہ کے بارے میں بتائیے۔ آپ صلی اللہ علیہ وسلم نے فرمایا: ”اے عبداللہ بن عمرو رضی اللہ عنہما! اگر تو نے صبر کے ساتھ اور ثواب کی نیت سے جہاد کیا تو اللہ تجھے صبر اور ثواب پانے کی صورت میں ہی اٹھائے گا۔ اگر تو نے ریاکاری یا مال کی زیادتی کے لیے لڑائی کی تو اللہ تجھے ریاکار اور زیادہ مال طلب کرنے والوں میں اٹھائے گا۔ اے عبداللہ بن عمرو! تو جس حال میں بھی لڑے یا قتل کیا جائے، اللہ تجھے اسی حال پر اٹھائے گا۔“ [السنن الكبرى للبيهقي/كِتَابُ السِّيَرِ/حدیث: 18548]

سلیمان بن یسار رحمہ اللہ فرماتے ہیں کہ لوگ سیدنا ابوہریرہ رضی اللہ عنہ کے پاس سے منتشر ہو گئے تو ناتل شامی نے سیدنا ابوہریرہ رضی اللہ عنہ سے کہا: آپ مجھے ایسی حدیث سنائیں جو رسول اللہ صلی اللہ علیہ وسلم سے سن رکھی ہو۔ انہوں نے کہا: میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم نے فرمایا: ”قیامت کے دن لوگوں میں سے جس کے بارے میں سب سے پہلے فیصلہ کیا جائے گا وہ تین شخص ہیں: شہید، اس کو اللہ رب العزت کے پاس لایا جائے گا، اللہ اسے اپنی نعمتوں کی پہچان کروائیں گے تو وہ ان کو پہچان لے گا، اللہ تعالیٰ پوچھیں گے: تو نے ان میں کیا عمل کیا؟ وہ بندہ کہے گا: اے اللہ! میں نے تیرے راستے میں جہاد کرتے ہوئے شہادت حاصل کی، اللہ تعالیٰ فرمائیں گے: تو نے جھوٹ بولا، تیرا تو ارادہ تھا کہ کہا جائے: فلاں بہادر ہے، تجھے دنیا میں بہادر کہہ دیا گیا، پھر اللہ رب العزت فرشتوں کو حکم دیں گے اور اسے چہرے کے بل گھسیٹ کر جہنم میں ڈال دیا جائے گا۔ دوسرا شخص عالمِ دین اور قاریِ قرآن ہو گا، اس کو اللہ کے سامنے لایا جائے گا، اللہ اسے اپنی نعمتوں کی پہچان کروائیں گے، وہ تمام نعمتوں کو پہچان لے گا تو اللہ تعالیٰ پوچھیں گے: تو نے ان میں کیا عمل کیا؟ وہ کہے گا: میں نے علم سیکھا اور قرآن پڑھا اور تیری خاطر اسے سکھایا، اللہ تعالیٰ فرمائیں گے: تو جھوٹ بولتا ہے، تیرا ارادہ یہ تھا کہ تجھے عالمِ دین اور قاریِ قرآن کہا جائے، وہ تجھے دنیا کے اندر کہہ دیا گیا، پھر اس کے بارے میں بھی اللہ رب العزت حکم فرمائیں گے اور اسے بھی منہ کے بل گھسیٹ کر جہنم میں پھینک دیا جائے گا اور تیسرا وہ شخص جسے اللہ نے ہر قسم کا مال عطا کیا، اسے اللہ کے سامنے لایا جائے گا، اللہ رب العزت اسے اپنی نعمتوں کی پہچان کرائیں گے، وہ نعمتوں کو پہچان لے گا تو اللہ تعالیٰ پوچھیں گے: تو نے ان میں کیا عمل کیا؟ تو وہ کہے گا: میں نے کوئی ایسی جگہ نہیں چھوڑی کہ جس میں تو خرچ کرنے کو پسند کرتا ہو مگر میں نے تیری رضا کے لیے وہاں خرچ نہ کیا ہو، تو اللہ رب العزت فرمائیں گے: تو نے جھوٹ بولا، تیرا تو صرف یہ ارادہ تھا کہ تجھے سخی کہا جائے، دنیا میں تجھے سخی کہہ دیا گیا، اللہ رب العزت اس کے بارے میں بھی حکم دیں گے، پھر اسے بھی چہرے کے بل گھسیٹ کر جہنم میں پھینک دیا جائے گا۔“ [السنن الكبرى للبيهقي/كِتَابُ السِّيَرِ/حدیث: 18549]

ابوعجفاء فرماتے ہیں کہ حضرت عمر رضی اللہ عنہ نے خطبہ ارشاد فرمایا کہ تم اس کے بارے میں جو غزوے میں قتل کیا جائے، کہتے ہو کہ فلاں شہید کیا گیا یا فلاں شہادت کی موت مرا، شاید کہ اس نے اپنی سواری کو سونے یا چاندی سے لاد رکھا ہو اور وہ دنیا یا تجارت کا قصد کیے ہوئے ہو، تم ان کے بارے میں یہ نہ کہو بلکہ اس طرح کہو جیسے نبی صلی اللہ علیہ وسلم نے فرمایا ہے: ”جو اللہ کے راستے میں قتل کر دیا گیا یا فوت ہو گیا تو وہ جنتی ہے۔“ [السنن الكبرى للبيهقي/كِتَابُ السِّيَرِ/حدیث: 18550]

سیدنا ابوہریرہ رضی اللہ عنہ سے روایت ہے کہ ایک شخص نے رسول اللہ صلی اللہ علیہ وسلم سے عرض کیا: جو شخص جہاد فی سبیل اللہ کا ارادہ رکھتا ہے اور دنیا کا مال حاصل کرنا چاہتا ہے، تو آپ صلی اللہ علیہ وسلم نے فرمایا: ”اس کا کوئی اجر نہیں ہے۔“ پھر اس شخص نے دوسری اور تیسری مرتبہ دوبارہ سوال کیا تو آپ صلی اللہ علیہ وسلم نے تب بھی فرمایا: ”اس کا کوئی اجر نہیں ہے۔“
شیخ فرماتے ہیں: یہ حدیث اس بات کا احتمال رکھتی ہے کہ اس نے صرف دنیا کی نیت کی، لیکن جو ثواب کی نیت کرے اور مالِ غنیمت کے ملنے کی امید رکھے (اس پر کوئی گناہ نہیں)۔ [السنن الكبرى للبيهقي/كِتَابُ السِّيَرِ/حدیث: 18551]

ابن زغب ایادی رحمہ اللہ فرماتے ہیں کہ نبی صلی اللہ علیہ وسلم کے صحابی سیدنا عبداللہ بن حوالہ رضی اللہ عنہ میرے ہاں مہمان ٹھہرے، اور ہمیں خبر ملی تھی کہ ان کے لیے دو سو کا وظیفہ مقرر کیا گیا ہے مگر انہوں نے سو کے سوا لینے سے انکار کر دیا۔ میں نے ان سے کہا: کیا وہ بات سچ ہے جو ہمیں پہنچی ہے کہ آپ کے لیے دو سو کا وظیفہ مقرر کیا گیا اور آپ نے سو کے سوا لینے سے انکار کر دیا؟ اللہ کی قسم! میرے ہاں مہمان ہونے کے باوجود انہوں نے یہ کہنے سے گریز نہ کیا: «لَا أُمَّ لَكَ» ”تیری ماں نہ رہے!“ کیا ابن حوالہ کے لیے ہر سال سو کافی نہیں؟ سیدنا ابن حوالہ رضی اللہ عنہ نے ہمیں رسول اللہ صلی اللہ علیہ وسلم سے حدیث بیان کی کہ آپ صلی اللہ علیہ وسلم نے ہمیں پیدل مدینہ کے ارد گرد روانہ کیا تاکہ ہم غنیمت حاصل کریں لیکن ہم نے غنیمت حاصل نہ کی۔ جب رسول اللہ صلی اللہ علیہ وسلم نے ہماری مشقت کو دیکھا تو فرمایا: «اللَّهُمَّ لَا تَكِلْهُمْ إِلَيَّ فَأَضْعُفَ عَنْهُمْ، وَلَا تَكِلْهُمْ إِلَى أَنْفُسِهِمْ فَيَعْجِزُوا عَنْهَا، وَلَا تَكِلْهُمْ إِلَى النَّاسِ فَيَسْتَأْثِرُوا عَلَيْهِمْ، وَلَكِنْ تَوَحَّدْ بِأَرْزَاقِهِمْ» ”اے اللہ! تو ان کو میرے سپرد نہ کر، میں ان سے کمزور ہوں، اور نہ ہی تو ان کو ان کے نفسوں کے سپرد کر دے کہ وہ اس سے عاجز آ جائیں، اور نہ ہی تو ان کو لوگوں کو سونپ دینا کہ وہ ان کی تذلیل کریں یا وہ ان کے اوپر دوسروں کو ترجیح دیں، بلکہ تو خود ہی ان کے رزق کا ذمہ لے لے۔“ پھر آپ صلی اللہ علیہ وسلم نے فرمایا: ”ملکِ شام فتح کیا جائے گا اور فارس و روم کے خزانے تمہارے درمیان تقسیم کیے جائیں گے اور تم میں سے کسی کو اتنا اتنا مال ملے گا کہ سو دینار دیے جانے کے باوجود وہ شخص ناراض ہوگا۔“ پھر آپ صلی اللہ علیہ وسلم نے میرے سر پر ہاتھ رکھ کر فرمایا: ”اے ابن حوالہ! جب تو دیکھے کہ خلافت ارضِ مقدسہ میں قائم ہو گئی ہے تو زلزلے، مصائب اور بڑے بڑے امور واقع ہوں گے اور قیامت لوگوں کے قریب ہو گی، (اتنی قریب جتنا) میرے اس ہاتھ سے جو تیرے سر کے اوپر ہے۔“ [السنن الكبرى للبيهقي/كِتَابُ السِّيَرِ/حدیث: 18552]