سیدنا عبداللہ بن عمر رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جب کوئی شخص مسجد میں داخل ہو اور امام اس وقت منبر پر موجود ہو تو پھر امام کے فارغ ہونے تک نہ تو کوئی نماز ادا کی جائے گی، اور نہ ہی کلام کیا جائے گا“۔
یہ روایت امام طبرانی نے معجم کبیر میں نقل کی ہے، اس کی سند میں ایک راوی ایوب بن نہیک ہے، اور وہ متروک ہے ایک جماعت نے اسے ضعیف قرار دیا ہے۔ ابن حبان نے اس کا تذکرہ کتاب ”الثقات“ میں کیا ہے، اور یہ بات بیان کی ہے یہ غلطی کرتا ہے۔ [مجمع الزاوئد ومنبع الفوائد/كِتَابُ الصَّلَاةِ/حدیث: 3120]

سیدنا سلیک رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جب کوئی شخص آئے اور امام اس وقت خطبہ دے رہا ہو، تو اسے دو مختصر رکعت ادا کر لینی چاہئیں“۔
یہ روایت امام أحمد نے اور امام طبرانی نے معجم کبیر میں نقل کی ہے، اور اس کے رجال ”صحیح“ کے رجال ہیں۔ [مجمع الزاوئد ومنبع الفوائد/كِتَابُ الصَّلَاةِ/حدیث: 3121]

سیدنا جابر بیان کرتے ہیں: سیدنا نعمان بن قوقل (جمعہ کے دن مسجد میں) داخل ہوئے نبی اکرم صلی اللہ علیہ وسلم اس وقت جمعہ کے دن خطبہ ارشاد فرما رہے تھے نبی اکرم صلی اللہ علیہ وسلم نے ان سے فرمایا تم دو رکعات ادا کر لو اور انہیں مختصر ادا کرنا جب کوئی شخص جمعہ کے دن آئے اور امام خطبہ دے رہا ہو تو اسے دو رکعات ادا کر لینی چاہئیں، اور انہیں مختصر ادا کرنا چاہیے“۔ (علامہ ہیثمی فرماتے ہیں:) میں یہ کہتا ہوں: ”صحیح“ میں اس حدیث میں سیدنا نعمان بن قوقل کا ذکر نہیں ہے۔ [مجمع الزاوئد ومنبع الفوائد/كِتَابُ الصَّلَاةِ/حدیث: 3122]