سیدنا کردم بن قیس رضی اللہ عنہ بیان کرتے ہیں: میں اور میرے چچازاد جن کا نام ابوثعلبہ تھا، ہم ایک گرم دن میں (سفر پر) نکلے میں نے جوتے پہنے ہوئے تھے اور ان کے پاس جوتے نہیں تھے، انہوں نے کہا: تم اپنے جوتے مجھے دے دو! میں نے کہا: جی نہیں! البتہ اگر آپ اپنی بیٹی کے ساتھ میری شادی کریں گے (تو میں دے دوں گا) انہوں نے کہا: تم مجھے دے دو! میں نے تمہاری شادی اس کے ساتھ کر دی، جب ہم واپس آئے، تو انہوں نے میرے جوتے مجھے بھجوا دیے اور کہا: تمہاری کوئی بیوی ہمارے پاس نہیں ہے، اس بات کا ذکر نبی اکرم صلی اللہ علیہ وسلم سے کیا گیا، تو نبی اکرم صلی اللہ علیہ وسلم نے فرمایا: تم اس عورت کو چھوڑ دو! تمہارے لئے اس میں بہتری نہیں ہے، میں نے عرض کی: یا رسول اللہ! میں نے ایک نذر مانی تھی کہ میں فلاں، فلاں جگہ پر اپنا اونٹ قربان کروں گا، نبی اکرم صلی اللہ علیہ وسلم نے فرمایا: ”تم اپنی نذر کو پورا کر دو! قطع رحمی کے بارے میں اور آدمی جس چیز کا مالک نہ ہو، اس کے بارے میں نذر کی کوئی حیثیت نہیں ہوتی ہے“۔
یہ روایت امام طبرانی نے نقل کی ہے، اس کی سند میں ایک راوی عبدالعزیز بن عبداللہ ہے اور وہ ضعیف ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7527]

عروہ بن رویم لخمی، سیدنا ابوثعلبہ رضی اللہ عنہ کے بارے میں یہ بات نقل کرتے ہیں: میں نے ان سے ملاقات بھی کی ہے اور ان سے بات چیت بھی کی ہے، وہ بیان کرتے ہیں: ایک مرتبہ میں نبی اکرم صلی اللہ علیہ وسلم کی خدمت میں حاضر ہوا، میں نے آپ سے سوال کیا، تو آپ نے فرمایا: چھوٹا معاملہ، میں نے عرض کی: یا رسول اللہ! بھلائی کا چھوٹا معاملہ یا خرابی کا چھوٹا معاملہ؟ نبی اکرم صلی اللہ علیہ وسلم نے فرمایا: جی نہیں! بلکہ بھلائی کا چھوٹا معاملہ، میں نے عرض کی: یا رسول اللہ! ایک مرتبہ میں سفر پر اپنے چچا کے ساتھ روانہ ہوا، انہیں جوتوں کی ضرورت پیش آئی، تو انہوں نے مجھے کہا: تم جو تے عاریت کے طور پر مجھے دے دو، میں نے کہا: میں یہ آپ کو عاریت کے طور پر نہیں دوں گا، اگر آپ اپنی بیٹی کے ساتھ میری شادی کرتے ہیں (تو پھر دے دوں گا) انہوں نے کہا: میں نے تمہاری شادی اس کے ساتھ کر دی جب ہم اپنے گھر واپس پہنچے، تو انہوں نے مجھے میرے جوتے بھجوا دیے اور بولے: تمہاری کوئی بیوی ہمارے پاس نہیں ہے، نبی اکرم صلی اللہ علیہ وسلم نے فرمایا: تمہارے لئے اس عورت میں بھلائی نہیں ہے۔۔۔۔۔۔۔۔ اس کے بعد راوی نے پوری حدیث ذکر کی ہے، جو اس سے پہلے گمشدہ چیز سے متعلق باب میں گزر چکی ہے۔
یہ روایت امام طبرانی نے نقل کی ہے، اس کی سند میں ایک راوی ابوفروہ یزید بن سنان ہے اور وہ ضعیف ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7528]